கடந்த மூன்று மக்களவைத் தேர்தல்களில் வெற்றி பெற்று பாஜக மத்தியில் அதிகாரத்தில் உள்ளது. அந்த கட்சி பல சட்டப்பேரவைத் தேர்தல்களிலும் வெற்றி பெற்றுள்ளது.

அதே நேரம், நிறுவப்பட்டு நூறு ஆண்டுகளை நிறைவு செய்யும் நிலையில் உள்ள ஆர்எஸ்எஸ் சங்கமும் வலுவான நிலையில் உள்ளது. சங்கத்தின் கூற்றுப்படி, ஷாகாவில் சேருவோரின் எண்ணிக்கை அதிகரித்துள்ளது.

பாஜகவின் தேர்தல் வெற்றிகளில் சங்கத்தின் அடிமட்ட அமைப்புக்கு ஒரு பெரிய பங்கு இருப்பது ஒன்றும் ரகசியம் அல்ல.

ஆர்.எஸ்.எஸ்-க்கும், பாஜகவுக்குமான உறவு வரவிருக்கும் காலங்களில் எப்படி இருக்கும்?

பிரதீப் சிங்கின் கூற்றுப்படி ஆர்.எஸ்.எஸ்-க்கும், பாஜகவுக்கும் இடையிலான உறவு ஒன்றை ஒன்று சார்ந்தே இருக்கிறது.

“இது ஒரு இணைவாழ்வு உறவு. இரு தரப்பும் பயனடைகின்றன. எனவே இது தொடரும். எந்தவொரு உறவிலும் ஒருவர் மட்டும் பயனடைந்தால், அதில் பிரச்னைகள் எழும். கடந்த மக்களவத் தேர்தலும், அதற்கு பிந்தைய சட்டப்பேரவைத் தேர்தல்களும் சங்கம் இல்லாமல் அவர்களால் இயங்க முடியாது என்பதை பாஜகவுக்கு தெளிவாக தெரிவித்தன”, என்கிறார் அவர்.

“அவர்கள் மூன்றுமுறை தடைகளை சந்தித்தது ஆர்.எஸ்.எஸ்-க்கு தெரியும். அரசு உங்களுடன் இல்லாவிட்டால், பணி செய்வதில் பல சிரமங்கள் உள்ளன. அரசு உங்களுடையதாக இருந்து உங்களை ஆதரித்தால் பல அனுகூலங்கள் உள்ளன. எனவே, இப்போதிருக்கும் ஒரே கேள்வி, யார் சொல்வது கேட்கப்படும், அது எவ்வளவு தூரம் கேட்கப்படும் என்பதுதான். அதற்கு பேச்சுவார்த்தை மூலம் மட்டுமே தீர்வு காண முடியும்.”

ஆர்.எஸ்.எஸ்-க்கு எந்த நேரடி அரசியல் நோக்கமும் இல்லை, அதன் நோக்கம் பாஜகவின் மூலம்தான் என்கிறார் சிங். அவர் கூறுகையில், “இன்றும் கூட, மாநில அளவிலோ, தேசிய அளவிலோ அமைப்பை சேர்ந்த ஒருவர் பாஜகவில் ஒரு அமைச்சராக இருந்தால் அவர் ஆர்.எஸ்.எஸ்-ஐ சேர்ந்தவர். அந்த உறவில் பெரிய மாற்றங்கள் இருக்க முடியாது. அப்படி ஒரு மாற்றத்தால் யாரும் பயனடையப் போவதில்லை, இருவரும் இழப்புகளை சந்திப்பார்கள். எனவே இந்த மேல்-கீழ் நிலை தொடரும்.

அதற்காக எதிர்காலத்தில் பாஜக ஆர்எஸ்எஸ்-ன் அனைத்து கோரிக்கைகளையும் ஏற்றுக்கொள்ளும் என்றோ, ஆர்எஸ்எஸ் பாஜகவின் அனைத்து கோரிக்கைகளையும் ஏற்றுக்கொள்ளும் என்றோ அர்த்தமில்லை என்கிறார் பிரதீப் சிங். “பல விஷயங்களில், நீங்கள் என் கோரிக்கையை ஏற்றுக்கொள்ளுங்கள் நாங்கள் உங்கள் கோரிக்கையை ஏற்றுக்கொள்கிறோம் என பரஸ்பர ஒப்பந்தமாக இருக்கிறது.”

ஆர்.எஸ்.எஸ் என்பது ஒரு குடும்பம் போன்றது என புரிந்துகொண்டால் இது தெளிவாகும் என்கிறார் விஜய் திரிவேதி.

அவர் கூறுகையில், “ஒரு குடும்பத்தில் நான்கு மகன்கள் இருக்கிறார்கள் என்றால், அதில் ஒரு மகன் ஐஏஎஸ் அதிகாரி ஆகிவிட்டால், பெற்றோருக்கு எத்தனை செல்வாக்கு இருக்கிறது?”

திரிவேதியின் கூற்றுப்படி, ஆர்எஸ்எஸ் மற்றும் பிஜேபி இடையிலான உறவு இதேபோல் தொடரும், எந்த குடும்பத்தையும் போல் அதில் ஏற்ற இறக்கங்கள் இருக்கும்.

– இது, பிபிசிக்காக கலெக்டிவ் நியூஸ்ரூம் வெளியீடு