சில வீடியோக்களில் மருத்துவர் முழுமையாகக் கற்பனையாக உருவாக்கப்படுகிறார். வேறு சிலவற்றில், உண்மையான மருத்துவர்களின் முகம், குரல் அல்லது அடையாளம் அவர்களது அனுமதி இன்றி ஏஐ மூலம் நகலெடுக்கப்படுகிறது. இரண்டுமே பார்வையாளர்களுக்கு தகுதி பெற்ற மருத்துவர் ஆலோசனை வழங்குகிறார் என்ற தோற்றத்தை ஏற்படுத்துகின்றன.

ஏஐ மருத்துவர்களைப் பயன்படுத்தும் 29 போர்த்துகீசிய மொழி சேனல்களை, பிரேசிலின் லாப நோக்கமற்ற பத்திரிகை அமைப்பான CTRL+Z தனது ஆய்வில் வெளிக்கொணர்ந்தது. பின்னர் பிபிசி பிரேசில் சேவை, இதேபோன்ற தலைப்புகள் மற்றும் செயல்பாட்டு முறைகளை ஆய்வு செய்து மேலும் பல சேனல்களையும் கண்டறிந்தது.

இந்த ஆய்வின் ஒரு பகுதியாக, அந்த சேனல்களில் வெளியான வீடியோக்களில் பதிவான சுமார் 27,000 கருத்துகள் ஆய்வு செய்யப்பட்டன. அவற்றில் பயனாளர்கள் நடத்தை மாற்றங்களை வெளிப்படுத்தும் பதிவுகள் அடையாளம் காணப்பட்டன.

பல முதியவர்கள் ஏஐ மருத்துவர்களின் ஆலோசனைகளை பின்பற்றியதாக கருத்துகளில் தெரிவித்துள்ளனர். சிலர் வீட்டு வைத்தியங்களைத் தொடங்கியதாகவும், சிலர் மருத்துவர் பரிந்துரைத்த மருந்துகளை நிறுத்தியதாகவும் கூறியுள்ளனர்.

இதுபோல, 85 வயதான ஒருவர், வயிற்றில் அமில உற்பத்தியைக் குறைக்கும் ஒமேப்ரசோல் மருந்தை நிறுத்திவிட்டு, அதற்குப் பதிலாக சர்க்கரைவள்ளிக் கிழங்கு சாப்பிடத் தொடங்கியதாகத் தெரிவித்துள்ளார்.

ஒரு 77 வயது மூதாட்டி கடந்த மூன்று ஆண்டுகளாக மருத்துவரைச் சந்திக்கவில்லை என்றும் அல்ஜைமர் நோய் தொடர்பான ஆலோசனைகளுக்கு ஏஐ மருத்துவருக்கு நன்றி தெரிவித்திருந்தார். பிபிசி பிரேசில் சேவை கண்டறிந்த ஏஐ பயிற்சி வீடியோக்களில், பார்வையாளர்கள் உடனடி உடல்நல ஆபத்தில் இருப்பதாக உணரும்படி பயத்தையும் அவசர உணர்வையும் தூண்டும் தலைப்புகளை உருவாக்குமாறு கற்றுக் கொடுக்கப்படுவது தெரிய வந்தது.

இந்த சேனல்களை நடத்துவோர் யூடியூப் பார்வைகள் மூலமாகவும், தங்களது சேனல்களில் விளம்பரப்படுத்தப்படும் மின் புத்தகங்கள் மற்றும் பிற பொருட்கள் மூலமாகவும் வருமானம் ஈட்டுகின்றனர்.

பிரேசிலை சேர்ந்த பயிற்சியாளர் ஜெஃப் கோயிம்ப்ரா, இத்தகைய சேனல்களை நடத்துபவர்கள் மாதத்திற்கு 30,000 ரெய்ஸ் (சுமார் 5,816 அமெரிக்க டாலர்) வரை சம்பாதிக்க முடியும் என்று கூறியுள்ளார்.

ஒரு வீடியோவில், “நீங்கள் உறங்கச் செல்லும் முன் இதைக் கவனியுங்கள். தூக்கத்திலேயே உயிரிழக்காமல் இருக்க எச்சரிக்கையாக இருங்கள்” போன்ற அச்சுறுத்தும் மொழியைப் பயன்படுத்த வேண்டும் என்றும் அவர் விளக்கியிருந்தார்.

பிபிசி பிரேசில் சேவை இதுகுறித்து தொடர்புகொண்ட பிறகு, அந்த வீடியோக்களில் ஒன்று பொது மக்கள் பார்வையில் இருந்து அகற்றப்பட்டது.

விளக்கம் அளித்த கோயிம்ப்ரா, காட்டப்பட்ட ஏஐ சேனல்கள் தனது சொந்த சேனல்கள் அல்ல, எடுத்துக்காட்டுகளாக மட்டுமே பயன்படுத்தப்பட்டவை என்று தெரிவித்தார். மேலும், இந்தத் தகவல்கள் மருத்துவருக்கு மாற்றாக இருக்க வேண்டுமென்ற நோக்கமின்றி ஏஐ தகவல் உள்ளடக்கங்களை உருவாக்குவது குறித்தே தான் பயிற்சி அளிப்பதாகவும் கூறினார்.

பிரபல பிரேசிலிய மருத்துவர் ஹெலியோ பிராசிலெய்ரோவின் உருவத்தை அவரது அனுமதியின்றிப் பயன்படுத்தி, பயத்தை தூண்டும் உடல்நலக் கூற்றுகள் மற்றும் மருந்துகளுக்குப் பதிலான இயற்கை சிகிச்சைகளை விளம்பரப்படுத்தும் குறைந்தது ஐந்து யூடியூப் சேனல்கள் இருப்பது கண்டறியப்பட்டது.

சுமார் மூன்று இலட்சம் சந்தாதாரர்களைக் கொண்ட தனது யூடியூப் சேனலை நடத்தி வரும் மருத்துவர் ஹெலியோ பிராசிலெய்ரோ, இந்த வீடியோக்கள் தொடர்பாக யூடியூப் நிறுவனத்திடம் புகார் அளித்ததுடன், சாவோ பாவ்லோ காவல்துறையில் வழக்கு ஒன்றும் பதிவு செய்துள்ளார்.

“இதை உருவாக்குவோருக்கு எந்த மனிதாபிமானமும் இல்லை. பணம் சம்பாதிக்க இதுபோன்று செயல்படுவது முதியவர்களின் உயிரையே பறிக்கக்கூடும்,” என்று அவர் பிபிசி பிரேசில் சேவையிடம் கூறினார்.

அவர், தனது முகம் தவறாகப் பயன்படுத்தப்பட்டது ஒருபுறம் என்றாலும், அந்த வீடியோக்களை பார்த்து முதியவர்கள் மருந்துகளை நிறுத்திவிடக் கூடும் என்பதே உண்மையான கவலை என்றார்.

சாவோ பாவ்லோவின் ஆல்பர்ட் ஐன்ஸ்டீன் இஸ்ரேலைட் மருத்துவமனையில் பணியாற்றும் குடலியல் நிபுணர் டாக்டர் ஜெய்மே சலடெக் கில், இதனால் ஏற்படும் மிகப்பெரிய ஆபத்து குறித்து எச்சரிக்கிறார்.

அவரது கூற்றுப்படி, “மருத்துவ பலன் தராதவற்றை நோயாளிகள் பயன்படுத்தத் தொடங்கலாம். அது நோயை மேலும் மோசமாக்குவதோடு மட்டுமின்றி, சரியான நோயறிதலை தாமதப்படுத்தவும் செய்யும்,” என்று அவர் கூறுகிறார்.

மேலும், “ஒரேயொரு வீடியோ அனைத்து பிரச்னைகளுக்கும் தீர்வு தருமென நம்புவதற்குப் பதிலாக, முறையான மருத்துவப் பரிசோதனைகளும் வலுவான சுகாதார அமைப்பும்தான் தேவை,” என்றும் அவர் வலியுறுத்துகிறார்.

பிரேசிலிய சட்ட நிபுணர்களின் கூற்றுப்படி, தங்களை மருத்துவர்களாக பொய்யாகக் காட்டிக் கொண்டு உள்ளடக்கங்களை உருவாக்குவோர் மீது குற்றவியல் நடவடிக்கை எடுக்கப்படலாம்.

வீடியோக்களில் இடப்படும் ஏஐ குறிச்சொற்கள் மற்றும் எச்சரிக்கை லேபிள்கள், அந்த உள்ளடக்கம் மாற்றியமைக்கப்பட்டதா அல்லது ஏஐ மூலம் உருவாக்கப்பட்டதா என்பதை பார்வையாளர்கள் புரிந்துகொள்ள உதவுவதாகவும் கூகுள் கூறியுள்ளது.

CTRL+Z அமைப்பின் ஆய்வு தொடர்பாக பிபிசி பிரேசில் சேவை கூகுளை தொடர்புகொண்ட பின்னர், யூடியூப் சில பெரிய சேனல்களை நீக்கியது. அந்த சேனல்கள் மட்டும் சேர்ந்து சுமார் 4.1 கோடி பார்வைகளைப் பெற்றிருந்தன.

இதற்கிடையில், செலி பெரெய்ரா இணையத்தில் தாம் பார்க்கும் தகவல்களை மேலும் நுட்பமாக அடையாளம் காணக் கற்றுக்கொள்ள விரும்புவதாகக் கூறுகிறார்.

“என் வயதுக்கு நான் கணினியை நன்றாகப் பயன்படுத்துகிறேன் என்று நினைக்கிறேன். ஆனால், எது ஏஐ உருவாக்கியது, எது உண்மையானது என்பதை இன்னும் என்னால் தெளிவாகக் கண்டறிய முடியவில்லை,” என்று அவர் தெரிவித்துள்ளார்.

– இது, பிபிசிக்காக கலெக்டிவ் நியூஸ்ரூம் வெளியீடு