இந்த அறிக்கையின் அடிப்படையில் 2022ஆம் ஆண்டில் மட்டும் இந்தியாவில் சாலை விபத்துகளில் மரணமடைந்த 18 வயதுக்கு உட்பட்டோரின் எண்ணிக்கை 16,443 இது கடந்த 2011ஆம் ஆண்டு நிகழ்ந்த சாலை விபத்து மரணங்களைக் காட்டிலும் (7,700) 113 சதவீதம் அதிகம்.

இந்த 10 ஆண்டு இடைவெளியில் மொத்த சாலை விபத்து மரணங்களின் எண்ணிக்கை 18 சதவீதம் மட்டுமே அதிகரித்துள்ள நிலையில், 18 வயதுக்கு உட்பட்ட குழந்தைகளின் மரணம் 73 சதவீதம் அதிகரித்துள்ளது. சாலை விபத்துகளில் மரணமடைவோரின் மொத்த எண்ணிக்கையில் சுமார் 10 சதவீதம் பேர் 18 வயதுக்கு உட்பட்டவர்கள்.

இந்தப் புள்ளிவிவரங்கள் சாலை விபத்துகளின் தீவிரத்தை உணர்த்துவதோடு, இதில் குழந்தைகளுக்கு இருக்கும் ஆபத்துகளைச் சுட்டிக்காட்டுகின்றன. சாலை விபத்துகள் வெறும் போக்குவரத்து சார்ந்த பிரச்னை அல்ல, மாறாக குழந்தைகளின் அடிப்படை உரிமைகளைப் பாதிக்கும் செயல் என கூறுகிறது யுனிசெஃப்.

உலக வங்கியின் கூற்றுப்படி, சாலை விபத்துகளை 10 சதவீதம் குறைப்பது ஒரு நாட்டின் தனிநபர் வருவாய் அடிப்படையிலான உள்ளாட்டு உற்பத்தி 3.6 சதவீதம் அதிகரிக்க உதவும்.

பிபிசி தமிழிடம் பேசிய யுனிசெஃப் அமைப்பின் சுகாதாரப் பிரிவுக்கான இந்திய தலைவர் டாக்டர் விவேக் வீரேந்திர சிங், உடல், உளவியல், சமூக மற்றும் அறிவாற்றல் ரீதியாக வளர்ச்சியடையும் நிலையில் இருக்கும் குழந்தைகள் சாலை விபத்துக்கு எளிதில் இலக்காகக் கூடியவர்களாக இருப்பதாகத் தெரிவித்தார்.

“உடல் ரீதியாக ஏற்படும் பாதிப்புகளைத் தாண்டி, நீண்டகால உளவியல் சிக்கல்களுக்கும், கல்வி இடைநிற்றல்களுக்கும் பல நேரங்களில் விபத்துகள் காரணமாகலாம். குழந்தைகள் காயமடையும்போது அந்தக் குடும்பமே மருத்துவச் செலவு, பெற்றோர்களின் பணி பாதிப்பது உள்ளிட்ட காரணங்களால் வறுமைக்குள் தள்ளப்படலாம்” எனவும் விவேக் கூறுகிறார்.

ஒரு சாலை விபத்து ஏற்பட்டால் உடனடியாக சிகிச்சை அளிப்பதற்கான அவசர சிகிச்சையில் இந்திய மருத்துவத்துறை குறிப்பிடத்தக்க வளர்ச்சியை அடைந்திருப்பதாகக் கூறும் விவேக் 108 ஆம்புலன்ஸ் சேவை நாடு முழுவதும் உடனடி சிகிச்சை வழங்குவதில் முக்கியப் பங்கு வகிப்பதைச் சுட்டிக்காட்டுகிறார். ஜி.வி.கே. அவசர மேலாண்மை மற்றும் ஆராய்ச்சி நிறுவனத்தால் இந்தியாவில் நம்பத்தன்மை வாய்ந்த அவசர ஆம்புலன்ஸ் சேவை வழங்கப்படுவதாகவும் அவர் குறிப்பிடுகிறார்.

ஆனால் குழந்தைகளுக்கான அவசர சிகிச்சை தனித்துவமானது என்பதோடு, இதற்கான உள்கட்டமைப்புகள் இந்தியாவில் இன்னமும் வளரும் நிலையிலேயே இருப்பதாகவும், குழந்தைகளுக்கு சிகிச்சை அளிப்பதில் பயிற்சி பெற்ற அவசர சேவை மருத்துவர்கள் போன்றவற்றில் இருக்கும் குறைபாடுகளையும் அவர் சுட்டிக்காட்டுகிறார்.

நிதி ஆயோக்கின் நிதி உதவியுடன் டெல்லி எய்ம்ஸ் மருத்துவமனையால் நாடு முழுவதும் நடத்தப்பட்ட ஆய்வு ஒன்றின்படி 2019-20ஆம் நிதியாண்டில் 34 சதவீத ஆம்புலன்ஸ்கள் மட்டுமே பயிற்சி பெற்ற துணை மருத்துவப் பணியாளர்களுடன் இயக்கப்படுகின்றன.

குழந்தைகளை மீட்பதற்கான உயிர் காக்கும் கருவிகளைக் கொண்ட ஆம்புலன்ஸ்கள் குறித்த சரியான தரவுகள் இல்லை. 75 சதவீத மருத்துவமனைகள் குழந்தைகளுக்கு அவசர சிகிச்சை வழங்குவதற்கான உபகரணங்கள் இன்றி இயங்குவதும் தெரிய வந்துள்ளதாக டாக்டர் விவேக் கூறுகிறார்.

சாலை விதிகளை அமல்படுத்துவதில் இந்தியா போன்ற மக்கள் தொகை அதிகம் கொண்ட நாடுகளில் இருக்கும் நடைமுறைச் சிக்கல்களும் பல நேரங்களில் விபத்துகளுக்குக் காரணமாக அமைகின்றன.

இரு சக்கர வாகனங்கள் இருவருக்கே என்பது விதியாக இருந்தாலும் சாலைகளில் இயல்பில் அப்படியான சட்டங்களை நடைமுறைப்படுத்த முடிவதில்லை. பெற்றோருடன் பயணிக்கும் குழந்தைகள் பெட்ரோல் டாங்கில் அமர்ந்து பயணிப்பது சாலைகளில் அன்றாடம் பார்க்கும் காட்சிதான். இன்னும் சில நேரங்களில் 2+2 என இரண்டு குழந்தைகளும், அதற்கு மேலும் ஏறிச் செல்வதையும் காணலாம்.

சென்னையில் தனியார் வங்கியில் வேலை பார்க்கும் அருண்குமார் பிபிசி தமிழிடம் பேசியபோது, “நானும் எனது மனைவியும் தென் மாவட்டத்தைச் சேர்ந்தவர்கள். இருவருமே தனியார் பணியில் இருக்கிறோம். எங்களுக்கு ஒரு ஆண் குழந்தை உள்ளது.

கார் என்பதை அத்தியாவசியமான தேவையாக நாங்கள் உணரவில்லை என்பதால் நாங்கள் தற்போது வரை வாங்கவில்லை. நகருக்குள் குறைவான தூரம் பயணிக்கும்போது, எனது மகனை எனக்கு முன்னதாக அமர வைத்து பயணிப்பதை வசதியாக உணர்கிறேன். இதுவே நீண்ட தூரம் செல்வதென்றால் வாடகைக்கு கார் எடுத்துக் கொள்வோம்,” என்றார்.

ஓரளவுக்கு பொருளாதாரச் சூழல் இருப்பவர்களும்கூட இருசக்கர வாகனங்களில் 3வது நபராக குழந்தைகளை அழைத்துச் செல்வதைப் பாதுகாப்பானதாகவே கருதுகின்றனர்.

குழந்தைகள் பெரும்பாலும் 14 வயதை எட்டுவதற்கு முன்பாக பெற்றோருடன் பயணிக்கும்போதே விபத்துகளில் சிக்குகின்றனர். இதிலும் பெரியவர்களும், குழந்தைகளும் சேர்ந்து பயணிக்கும் ஒரு வாகனம் விபத்தில் சிக்கினால், இதில் அதிக பாதிப்பை எதிர்கொள்வது குழந்தைகள்தான் என்கிறார் இந்திய தானியங்கி ஆராய்ச்சிக் கூட்டமைப்பின் (ARAI) பொறியியல் வடிவமைப்புத் துறை துணை இயக்குநரான ராகுல் மகாஜன்.

இரு சக்கர வாகனங்கள் வடிவமைப்பு ரீதியாகவே நிலையற்றவை எனக் கூறும் ராகுல் மகாஜன் அவற்றில் பாதுகாப்பு அம்சங்களை மேம்படுத்த முடியாது எனக் கூறுகிறார்.

எனவே தவிர்க்க முடியாத காரணத்தால் இரு சக்கர வாகனங்களில் குழந்தைகளை அழைத்துச் செல்ல நேரிட்டால் அவர்களும் ஹெல்மெட் அணிந்திருப்பதை உறுதி செய்ய வேண்டும்.

வாகனத்தின் இயக்க விதிகளுக்கு மாறாக குழந்தைகளை இருசக்கர வாகனத்தின் பின்புறத்தில் பின் நோக்கியவாறு அமர வைப்பது, பெட்ரோல் டாங்க் மீது அமர வைப்பது போன்றவற்றைச் செய்யக்கூடாது என ராகுல் மகாஜன் கூறுகிறார்.