மத்திய மியான்மரில் உள்ள மாண்டலேயில் உள்ள “ஏஜென்சி” ஒன்றுக்கு தான் மக்களை பரிந்துரைத்ததாக அவர் கூறினார், அந்த ஏஜென்சி அதற்கான ஏற்பாடுகளை செய்யும்.

“ஆனால், சிறுநீரகம் வழங்குபவர்கள் குறித்து கவலை வேண்டாம்,” என கூறுகிறார் அவர். “தங்கள் சிறுநீரகங்களை வழங்க வரிசையில் நிற்கும் நபர்களின் பட்டியல் எங்களிடம் உள்ளது.”

முன்பின் தெரியாதவர்களை, திருமண உறவால் உறவினரானவர்கள் என காட்ட போலியாக ஆவணங்கள் தயார் செய்ததாக அவர் கூறினார். இப்படி உதவுவதற்கு அவர் பணம் ஏதும் பெறுவாரா என கேட்டதற்கு, அவர் பதில் அளிக்கவில்லை.

2010-ல் இருந்து உறுப்பு மாற்று அறுவை சிகிச்சைகள் உலகம் முழுவதும் 50 சதவிகிதத்துக்கும் மேல் அதிகரித்துள்ளது, ஆண்டுதோறும் 150,000 உறுப்பு மாற்று அறுவை சிகிச்சைகள் நடைபெறுவதாக, உலக சுகாதார மையம் தெரிவித்துள்ளது. ஆனால், உலகளவில் தேவையான மாற்று உறுப்புகளில், 10% உறுப்புகள் மட்டுமே கிடைப்பதாகவும் அது கூறியுள்ளது.

மனித உடல் உறுப்புகளை வணிக நோக்கில் வாங்குவதோ, விற்பதோ கிட்டத்தட்ட அனைத்து நாடுகளிலும் சட்ட விரோதமானது, ஆனால் அதை மதிப்பிடுவது கடினமானது. 2007ல் 5-10% உறுப்புகள் கள்ள சந்தையிலிருந்து வந்ததாகவும் ஆனால் உண்மையான எண்ணிக்கை இன்னும் அதிகமாக இருக்கலாம் என்றும் உலக சுகாதார மையம் கூறியுள்ளது.

நேபாளம், பாகிஸ்தான், இந்தோனீசியா, ஆப்கானிஸ்தான், இந்தியா மற்றும் வங்கதேசம் உட்பட ஆசியா முழுவதும் சமீப ஆண்டுகளாக வறுமையால் சட்ட விரோத சிறுநீரக விற்பனை நடைபெற்று வருவது பதிவாகியுள்ளது.

இந்தியா நீண்ட காலமாக மருத்துவ நோக்கங்களுக்காக பயணம் மேற்கொள்பவர்களின் முக்கிய நாடாக உள்ளதால், அங்கு சிறுநீரக விற்பனை அதிகரித்து வருவதாக கவலை எழுந்துள்ளது. ஊடக செய்திகள் மற்றும் சமீபத்தில் நடைபெற்ற காவல் துறை விசாரணையை அடுத்து இந்த கவலை எழுந்துள்ளது.

சிறுநீரக விற்பனையில் ஈடுபட்டதில் தொடர்புடையவர்களாக இந்திய மருத்துவர் மற்றும் அவருடைய உதவியாளர் உட்பட ஏழு பேரை கைது செய்ததாக இந்திய காவல்துறை கடந்தாண்டு ஜூலை மாதம் தெரிவித்தது.

வங்கதேசத்தை சேர்ந்த ஏழை நபர்கள் தங்கள் சிறுநீரகங்களை விற்க போலியான ஆவணங்கள் மூலம் உறுப்பு மாற்று அறுவை சிகிச்சைக்கு ஒப்புதல் பெற அந்த குழு ஏற்பாடு செய்ததாக போலீசார் கூறுகின்றனர்.

டெல்லியில் உள்ள புகழ்பெற்ற இந்திரபிரஸ்தா அப்பல்லோ மருத்துவமனையின் மருத்துவர் விஜயா ராஜகுமாரி, சில கிலோமீட்டர் தூரத்தில் உள்ள யதார்த் எனும் வேறொரு மருத்துவமனையின் ஆலோசனை மருத்துவராக இத்தகைய அறுவை சிகிச்சைகளை மேற்கொண்டதாக குற்றம்சாட்டப்பட்டுள்ளது.

அவருடைய வழக்கறிஞர் இந்த குற்றச்சாட்டுகளை மறுத்து பிபிசியிடம் கூறுகையில், “அனைத்து புகார்களும் அடிப்படை ஆதாரமற்றவை” என்றும், அங்கீகார குழுக்களால் ஒப்புதல் வழங்கப்படும் அறுவை சிகிச்சைகளையே மேற்கொண்டதாகவும் எப்போதும் சட்டபூர்வமாகவே செயல்பட்டதாகவும் கூறினார். அவருடைய ஜாமீன் உத்தரவின்படி, போலியாக ஆவணங்களை தயார் செய்ததாக அவர் மீது குற்றம் சாட்டப்படவில்லை.

ஆலோசனை மருத்துவர்கள் மேற்கொள்வது உட்பட அனைத்து உறுப்பு மாற்று அறுவை சிகிச்சைகளும், “கடுமையான விதிமுறைகளை பின்பற்றியும் சட்ட மற்றும் தார்மீக விதிமுறைகளுக்கு ஏற்ப மேற்கொள்ளப்பட்டதாகவும்” யதார்த் மருத்துவமனை நிர்வாகம் பிபிசியிடம் தெரிவித்தது.

“வருங்காலத்தில் இத்தகைய நிலைமை ஏற்படாமல் இருக்க தங்கள் நடைமுறைகளை மேம்படுத்தியுள்ளோம்,” எனவும் மருத்துவமனை தெரிவித்துள்ளது.

அவருடைய கைதுக்கு பின்னர் கருத்து தெரிவித்த அப்பல்லோ மருத்துவமனை நிர்வாகம், ராஜகுமாரி மருத்துவமனை ஊழியர் அல்லாத ஒரு ஆலோசனை மருத்துவர் (சிகிச்சை வழங்கும் நோயாளிகளுக்கு மட்டும் கட்டணம் பெறும் மருத்துவர்) என்றும், அனைத்து விதமான மருத்துவ தொடர்புகளையும் அவரிடமிருந்து துண்டித்துவிட்டதாகவும் கூறியுள்ளது.

டாக்டர் ராஜகுமாரி தற்போது நீதிமன்றத்தில் எந்த குற்றச்சாட்டுகளையும் எதிர்கொள்ளவில்லை.