வியாழக்கிழமை, எர்துவான், “நாங்கள் பாகிஸ்தான் மக்களுடன் நிற்கிறோம். நான் சகோதரர் ஷாபாஸ் ஷெரீப்பை அழைத்து நாம் இதில் ஒன்றாக இருக்கிறோம் என்று சொன்னேன். எதிர்காலத்திலும் பாகிஸ்தானுக்கு ஆதரவாக நாங்கள் தொடர்ந்து நிற்போம்” என்றார்.

டெல்லியில் உள்ள ஜவஹர்லால் நேரு பல்கலைக் கழகத்தின் மேற்கு ஆசிய ஆய்வுகள் மையத்தின் பேராசிரியர் அஸ்வினி மகாபத்ரா கூறுகையில், பல காரணங்களால் எர்துவானின் தன்னம்பிக்கை அதிகரித்துள்ளது என்கிறார்.

“எர்துவான் சிரியா மற்றும் லிபியாவில் அவர் விரும்பும் அரசாங்கத்தை உருவாக்கினார். ஆர்மீனியாவுக்கு எதிராக அஜர்பைஜானின் கையை ஓங்க வைத்தார். சிரிய அரசையும் டிரம்ப் அங்கீகரித்தார். இத்தகைய சூழ்நிலையில், மேற்கு ஆசியாவைப் போலவே, தெற்காசியாவிலும் அவர் என்ன வேண்டுமானாலும் செய்யலாம் என்று எர்துவான் நினைக்கிறார். எர்துவான் பாகிஸ்தானை ஆதரிக்கும் விதம், இந்தியாவுடனான பதற்றத்தை மேலும் அதிகரிக்கும்” என்று பேராசிரியர் மஹாபத்ரா கூறுகிறார்.

ஆனால் தெற்காசியா மேற்கு ஆசியாவைப் போன்றது அல்ல என்பதை எர்துவான் புரிந்து கொள்ள வேண்டும் என்கிறார் பேராசிரியர் மஹாபத்ரா.

“எர்துவான் தெற்காசியாவில் இஸ்லாத்தின் பெயரால் பாகிஸ்தானில் தன்னை பொருத்தமானவராக ஆக்கிக் கொள்ளலாம், ஆனால் அவர் வேறு எங்கும் வெற்றி பெற மாட்டார். துருக்கி விவகாரத்தில் இந்தியா ராஜ தந்திர ரீதியில் இன்னும் தீவிரமாக செயல்பட வேண்டும். ஆர்மீனியா மற்றும் கிரீஸுடன் உறவுகளை வலுப்படுத்துவது, சைப்ரஸுக்கு உதவிகளை அதிகரிப்பது, கலாசார ரீதியாகவும் போட்டியிடுவது போன்றவற்றை செய்ய வேண்டும்” என்கிறார்.

“துருக்கி ஒருபோதும் இந்தியாவுடன் இருந்ததில்லை, ஆனால் இப்போது எர்துவான் இஸ்லாத்தின் பெயரில் இந்தியாவுக்கு எதிரான பிரசாரத்தை முன்னெடுத்து வருகிறார்” என்று மஹாபத்ரா சுட்டிக்காட்டுகிறார்.

இந்திய பிரதமர் நரேந்திர மோதியையும், துருக்கி அதிபர் எர்துவானையும் அடிக்கடி ஒப்பிட்டு பேசுவது வழக்கம். இருவரின் அரசியலையும் ஆளுமையையும் பகுப்பாய்வு செய்ததில் பல ஒற்றுமைகள் காணப்படுகின்றன.

எர்துவான் இஸ்தான்புல்லின் மேயர் பதவியிலிருந்து 1994 -ல் பிரதமர் மற்றும் அதிபர் பதவிக்கு உயர்ந்தார். நரேந்திர மோதி 2001-ல் குஜராத்தின் முதலமைச்சராகவும், 2014 -ல் இந்தியப் பிரதமராகவும் ஆனார்.

2020 ஆகஸ்ட் மாதத்தில் அயோத்தியில் ராமர் கோயிலுக்கு அடிக்கல் நாட்டிய போது, நரேந்திர மோதி, பல நூற்றாண்டுகளின் காத்திருப்பு முடிந்துவிட்டது என்று கூறியிருந்தார்.

ஜூலை 2020 -ல், துருக்கி அதிபர் எர்துவான் இஸ்தான்புல்லில் உள்ள ஹாகியா சோபியா அருங்காட்சியகத்தை மசூதியாக மாற்றிய போது, “இது எங்கள் இளைஞர்களின் பெரிய கனவு, அது இப்போது நிறைவேறியுள்ளது” என்று அவர் கூறினார்.

நரேந்திர மோதியின் அடையாளம் ஒரு இந்து தேசியவாதி மற்றும் எர்துவானின் அடையாளம் ஒரு இஸ்லாமிய தலைவர். இரு தலைவர்களும் நாகரிகங்களின் போரில் வலுவான போட்டியாளர்களாகத் தோன்றுகிறார்கள்.

இருவரும் மதச் சார்பற்ற நாட்டை வழிநடத்துகிறார்கள், ஆனால் இருவரும் தேசத்திலும் அரசிலும் மதம் ஒரு முக்கிய இடத்தைப் பெற விரும்புகிறார்கள்.

எர்துவான் துருக்கியின் பெயரை துருக்கியே என்று மாற்றியுள்ளார், பாஜக தலைவர்களும் இந்தியாவின் பெயரை பாரத் என்று மாற்ற விரும்புகிறார்கள். ஹேகியா சோபியா அருங்காட்சியகம் முதலில் ஒரு கிறித்துவ தேவாலயமாக இருந்தது. இது ஆறாம் நூற்றாண்டில் பைசன்டைன் பேரரசர் ஜஸ்டினியனால் கட்டப்பட்டது. ஒட்டோமான் பேரரசின் எழுச்சியுடன், இது 1453 இல் ஒரு மசூதியாக மாற்றப்பட்டது.

ஒட்டோமான் பேரரசு முடிவுக்குப் பிறகு, முஸ்தபா கமல் பாஷா ஆட்சிக்கு வந்தார். அவர் இந்த மசூதியை 1934 -ல் ஒரு அருங்காட்சியகமாக மாற்ற முடிவு செய்தார். இதன் மூலம் மதச் சார்பற்ற துருக்கியில் ஒரு செய்தியை அனுப்ப முஸ்தபா கமால் பாஷா நினைத்தார். ஆனால் மீண்டும் எர்துவான் அதை மசூதியாக மாற்றியுள்ளார். எர்துவான் தனது ஆட்சியின் 17 வது ஆண்டில் இந்த இலக்கை அடைந்தார்.

நரேந்திர மோதி 1990 களில் ராம ஜென்மபூமி இயக்கத்தில் ஈடுபட்டார். இதையடுத்து அயோத்தியில் பாபர் மசூதி இடிக்கப்பட்டு, உச்ச நீதிமன்ற தீர்ப்புப்படி அங்கு ராமர் கோயில் கட்டப்பட்டுள்ளது.