ஏப்ரல் 22-ஆம் தேதி அன்று பஹல்காமில் நடத்தப்பட்ட தாக்குதலைத் தொடர்ந்து, இந்தியா “பதில் தாக்குதல் நடத்த வேண்டும்” என்ற கோரிக்கைகள் வலுத்தன. அப்போதே, இந்தியாவின் உடனடி பதில் நடவடிக்கைகள் குறித்த செய்திகள் வெளியாக ஆரம்பித்தன.

பாகிஸ்தானின் முன்னாள் வெளியுறவுத் துறை செயலர் மற்றும் இஸ்லாமாபாத்தை மையமாகக் கொண்டு செயல்படும், பிராந்திய படிப்புகளுக்கான மையத்தின் தலைவருமான ஜோஹர் சலீம் இது குறித்து பேசிய போது, “ஆரம்ப கட்டத்தில் இந்தியா பின்பற்றிய ஆத்திரமூட்டும் போக்கானது,” பாகிஸ்தானை இக்கட்டான நிலைக்கு தள்ளியது என்று கூறுகிறார்.

இந்தியாவின் செயல்களுக்கு “எதிர்வினையாற்றுவதற்குப் பதிலாக, முன்னெச்சரிக்கையான ராஜாங்க நடவடிக்கைகளை தேர்வு செய்தது பாகிஸ்தானின் அணுகுமுறையில் ஏற்பட்ட மாற்றம் என்பது அப்போது தெளிவானது,” என்று அவர் தெரிவித்தார்.

ஆனால் பாகிஸ்தானின் முயற்சி இந்தியாவை தாக்குதல் நடத்துவதில் இருந்து தடுத்து நிறுத்தவில்லை. “நூற்றுக்கும் மேற்பட்ட தீவிரவாதிகள்” கொல்லப்பட்டதாகவும், அவர்களின் முகாம்கள் அழிக்கப்பட்டதாகவும், பாகிஸ்தானின் விமானப்படை தளங்கள் மற்றும் வான்வழி பாதுகாப்பு அமைப்புகளை தாக்கியதாகவும் இந்தியா கூறுகிறது.

அதனைத் தொடர்ந்து உடனடியாக பாகிஸ்தான் பதில் தாக்குதல் நடத்த இருப்பதாக அறிவித்தது. சில மணி நேரத்தில், 3 ரஃபேல் உட்பட இந்தியாவின் 6 போர் விமானங்களை சுட்டு வீழ்த்தியதாகவும் பாகிஸ்தான் கூறியது.

இதுகுறித்து இந்தியா உறுதி செய்யவில்லை. இருப்பினும் இந்தியாவின் தலைமை தளபதி அனில் சௌஹானின் சமீபத்திய கருத்து, இந்த தாக்குதலின் போது இந்தியா போர் விமானங்களை இழந்திருப்பதை மறைமுகமாக ஒப்புக்கொள்ளும் வகையில் இருக்கிறது என்று பலரும் கருதுகின்றனர்.

“போர் விமானங்கள் சுட்டு வீழ்த்தப்பட்டன என்பதைக் காட்டிலும் எதற்காக சுட்டுவீழ்த்தப்பட்டன என்பதே முக்கியமானது,” என்று அவர் ப்ளூம்பர்க் டிவிக்கு பேட்டியளித்த போது அவர் கூறினார்.

இந்தியாவின் தாக்குதலுக்கு பதில் தாக்குதலை பலமாக நடத்தியதாகக் கூறும் பாகிஸ்தான், தாக்குதல் நடைபெற்ற இடங்களில் ஒன்றாக பஹவல்பூரையும் பட்டியலில் சேர்த்துள்ளது.

“துல்லியமாக இலக்கை குறி வைத்து அழிக்கும் ஏவுகணைகள் மற்றும் டிரோன்கள் ஆகியவற்றை பயன்படுத்தி, எல்லை தாண்டாமலே, இந்தியாவால் பாகிஸ்தானில் உள்ள ‘தீவிரவாத உள்கட்டமைப்புகளை’ அழிக்க முடிந்தது,” என்று இந்திய கடற்படையின் முன்னாள் அதிகாரியும், பாதுகாப்பு நிபுணருமான கமோதரே அனில் ஜெய் சிங் கூறுகிறார்.

9 தீவிரவாத முகாம்களை தாக்கி, முக்கிய தீவிரவாத தளபதிகளை கொன்றுவிட்டதாக கூறும் இந்தியா, பாகிஸ்தானின் வான்வழி பாதுகாப்பு அமைப்பில் இருந்த பலவீனத்தை வெளிச்சத்திற்கு கொண்டு வந்ததாகக் கூறுகிறது.

இந்தியாவின் இந்த கூற்றை பாகிஸ்தான் நிராகரிக்கும் வேளையில், இஸ்லமாபாதை மையமாகக் கொண்டு செயல்படும் பாதுகாப்புத்துறை நிபுணரான அமீர் ராணா, “தன்னைவிட அதிக பலம் கொண்ட எதிரி நாட்டின் தாக்குதலை எதிர்கொண்டு, பல முனைகளில் இருந்து தாக்குதல் நடத்த இயலும் என்பது பாகிஸ்தானுக்கு நம்பிக்கை அளித்துள்ளது. இது இந்தியாவுக்கும் ஆச்சர்யத்தை ஏற்படுத்தியது,” என்று கூறுகிறார்.

இந்த தாக்குதலுக்குப் பிறகு பாகிஸ்தான் ராணுவத்தின் புகழ் வலுப்பெற்றுள்ளது. அதன் தலைமை தளபதி அசீம் முனீர் பாகிஸ்தானில் மிகவும் சக்தி வாய்ந்த ஆளாக கருதப்படுகிறார். இதற்கு முன்பு உள்நாட்டு அரசியலில் தலையீடு செய்தது மற்றும் இம்ரான் கான் ஆதரவாளர்களை குறி வைத்தது தொடர்பாக எழுந்த விமர்சனங்களை தாக்குதலுக்கு பிந்தைய சூழல் தவிடுபொடியாக்கிவிட்டது.

தாக்குதல்களுக்குப் பிறகு ஃபீல்ட் மார்ஷல் என்ற கௌரவம் அவருக்கு கிடைத்துள்ளது.

கமோதரே சிங் இது குறித்து பேசும் போது, “இந்தியாவின் தாக்குதல் நடவடிக்கையானது தீவிரவாத தாக்குதல்களைத் தடுத்து நிறுத்தும். ஆனால் அது மேலும் தொடர்ந்தால், பாகிஸ்தான் தன்னுடைய அழிவை நோக்கிச் செல்கிறது என்று பொருள்,” என்றார்.

இருப்பினும், எழுத்தாளரும், தீவிரவாத எதிர்ப்புக் கொள்கைகளின் நிபுணருமான அஜய் சஹ்னி, “பாகிஸ்தான் ஏற்கனவே வெற்றி பெற்றதற்கான ஒரு கதையை” உருவாக்கி வருவதை சுட்டிக் காட்டி, இந்தியாவின் தடுப்பு நடவடிக்கை பலனளிக்காது என்று கூகிறார்.

விமானப்படைத் தளங்கள் தாக்குதலுக்கு உள்ளாகியிருப்பதாக பாகிஸ்தான் ஒப்புக் கொண்டாலும், அந்நாட்டின் பிரதமர் ஷெபாஸ் ஷரீஃப், “பாகிஸ்தான், இந்தியாவுக்கு எதிராக நிலைமைகளை மாற்றியது” என்று கூறினார்.

“இந்த நடவடிக்கைகளால் பாகிஸ்தானில் எத்தகைய மாற்றமும் ஏற்படவில்லை. அப்படி ஏற்படும் பட்சத்தில், பாகிஸ்தானில் செயல்பட்டு வரும் தீவிரவாத அமைப்புகள் புதிய சூழலுக்கு தங்களை பழக்கிக் கொள்ளும் செயல்முறையை கற்று கொள்ளும்,” என்று சஹ்னி கூறுகிறார்.

இஸ்லாமாபாத்தை மையமாகக் கொண்டு செயல்படும் பாதுகாப்புத்துறை நிபுணர் ராணா, போர் நிறுத்த ஒப்பந்தம் நடைமுறையில் இருப்பதால் ராணுவ நடவடிக்கைகள் முடிவுக்கு வந்துவிட்டன என்று கூறிவிட இயலாது என்று வாதிடுகிறார். உண்மையில், இந்த தாக்குதல், “புதிய ஆயுதப் போட்டியை உருவாக்கும் அபாயத்தை ஏற்படுத்தியுள்ளது,” என்று கூறினார்.

தாக்குதல் நடைபெற்ற போது சீனாவின் ஆயுத தொழில்நுட்பங்களை பாகிஸ்தான் பயன்படுத்துவது தொடர்பாக கவனம் செலுத்தப்பட்டது. ஆனால் அந்த கூட்டமைப்புப் பற்றிய புதிய தகவல்கள் ஏதும் இல்லை என்பதையும் ராணா மேற்கோள்காட்டினார்.

சீனாவின் தொழில்நுட்பத்தை பாகிஸ்தான் எவ்வளவு திறம்பட பயன்படுத்தியது என்பது தான் முக்கியம் என்று ராணா தெரிவித்தார்.

இது குறித்து ஆழமான யோசனையை செலுத்திய இந்திய நிபுணர் சஹ்னி பாகிஸ்தானின் நடவடிக்கைகள், சர்வதேச அளவில் ராணுவ “தொழில்நுட்ப சக்தி” என்ற பெருமை கொண்ட சீனாவுக்கு பாரிய உத்வேகம் அளிக்கும் என்று தெரிவித்தார்.

“இதன் விளைவாக சீனாவுக்கும் இந்தியாவுக்குமான பிளவு அதிகரிக்கும். அதே நேரத்தில் பாகிஸ்தானுடனான சீனாவின் உறவும் ஆழமாகும்,” என்றும் அவர் தெரிவித்தார்.