டொனால்ட் டிரம்ப் ஏப்ரல் 2ஆம் தேதியன்று அவரது புதிய பரஸ்பர வரி விதிப்பு குறித்த அறிவிப்புகளை வெளியிட்டார். இந்த வரி விதிப்பு அமெரிக்காவின் வெற்றிக்கு வித்திடும் என்றும் அவர் குறிப்பிட்டார்.
நிர்வாக உத்தரவின் மூலம் டிரம்ப் விதித்துள்ள வரிகள், உலகம் முழுவதும் பொருளாதார அதிர்வலைகளை ஏற்படுத்தும் என எதிர்பார்க்கப்படுகிறது. வெள்ளை மாளிகை சுமார் 100 நாடுகளின் பட்டியலையும், அவற்றுக்கு அமெரிக்கா விதிக்கும் வரி விகிதங்களையும் வெளியிட்டது.
இந்தப் பரஸ்பர வரி விதிப்பு திட்டத்தின் அடிப்படைக் கூறுகள் என்ன? இதன் அடிப்படையில் இந்தியாவுக்கு எவ்வளவு வரி விதிக்கப்படுகிறது?
இறக்குமதிப் பொருட்களுக்கு அடிப்படை வரி விகிதம்
டிரம்பின் உரைக்கு முன்பாக, வெள்ளை மாளிகையின் மூத்த அதிகாரி ஒருவர் செய்தியாளர்களிடம் பேசுகையில், அதிபர் அனைத்து நாடுகளுக்கும் “அடிப்படை வரி” விதிக்கப்படும் என்று தெரிவித்ததாக கூறினார்.
அதாவது, அடிப்படையில் அனைத்து நாடுகளுக்கும் 10% இறக்குமதி வரி விதிக்கப்படும். இந்த நடைமுறை ஏப்ரல் 5 முதல் அமலுக்கு வரும் எனவும் தெரிவிக்கப்பட்டுள்ளது.
பட மூலாதாரம், AFP via Getty Images
மேலும், ஒரு சில நாடுகள் இந்த அடிப்படை வரியை மட்டுமே எதிர்கொள்ளும். அவை,
பிரிட்டன்
சிங்கப்பூர்
பிரேசில்
ஆஸ்திரேலியா
நியூசிலாந்து
துருக்கி
கொலம்பியா
அர்ஜென்டினா
எல் சால்வடார்
ஐக்கிய அரபு எமிரேட்ஸ்
சௌதி அரேபியா
இந்திய பொருட்களுக்கு 26% வரி
ஏப்ரல் 9 முதல் நடைமுறைக்கு வரும் வகையில், “மோசமான குற்றவாளிகள்” என்று குறிப்பிடப்பட்ட பட்டியலில் இருக்கும் சுமார் 60 நாடுகளுக்கு பரஸ்பர வரிகளை விதிக்கப் போவதாக வெள்ளை மாளிகை அதிகாரிகள் தெரிவித்தனர்.
அமெரிக்க பொருட்களுக்கு அதிக வரிகளையோ அல்லது வரிகள் தவிர்த்துப் பிற தடைகளையோ அல்லது அமெரிக்க பொருளாதார இலக்குகளைக் குறைமதிப்பிற்கு உட்படுத்துவதாகவோ அரசு கருதும் நாடுகளுக்கு இந்த வரி விதிப்பு செயல்படுத்தப்படும் என அறிவிக்கப்பட்டுள்ளது.
அந்தந்த நாடுகளின் வரிக்கு ஏற்ப விதிக்கப்படும் இந்த வரிகளை எதிர்கொள்ளப்போகும் நாடுகள்:
ஐரோப்பிய ஒன்றியம் – 20%
சீனா – 34%
இந்தியா – 26%
வியட்நாம் – 46%
தாய்லாந்து – 36%
ஜப்பான் – 24%
கம்போடியா – 49%
தென்னாப்பிரிக்கா – 30%
தைவான் – 32%
மலேசியா – 24%
வங்கதேசம் – 37%
பாகிஸ்தான் – 29%
இலங்கை – 44%
மியான்மர் – 44%
கனடா, மெக்சிகோவின் நிலை என்ன?
இந்தப் புதிய பரஸ்பர வரி அறிவிப்புகளில் கனடாவும் மெக்சிகோவும் குறிப்பிடப்படவில்லை.
எல்லைப் பாதுகாப்பு, அமெரிக்காவுக்குள் போதைப் பொருள் நுழைவதைக் கட்டுப்படுத்துவது போன்றவற்றுக்கு அழுத்தம் கொடுக்கும் முயற்சியாக முன்பு கனடா, மெக்சிகோவுக்கு அழுத்தம் தரப்பட்டது. இந்த இரு நாடுகளையும் அதைப் பயன்படுத்தியே கையாளப் போவதாக வெள்ளை மாளிகை தெரிவித்துள்ளது.
முன்னதாக, இந்த நாடுகள் மீது 25% வரி விதிப்பதாக அறிவிக்கப்பட்டது. பின்னர் அவற்றில் சில விலக்குகளைச் செய்யவும், இந்த வரி விதிப்பைத் தள்ளிப் போடவும் டிரம்ப் முடிவு செய்தார்.
வாகன இறக்குமதிகளுக்கு 25% வரி
மேலும் அமெரிக்கா, “அனைத்து வெளிநாட்டு வாகனங்களுக்கும் 25% வரி” விதிக்கும் என்று அதிபர் டிரம்ப் அறிவித்துள்ளார்.
இந்த வரி விதிப்பு ஏப்ரல் 3ஆம் தேதி நள்ளிரவு முதல் உடனடியாக அமலுக்கு வரும்.
இந்தியா, சீனா பற்றி டிரம்ப் கூறியது என்ன?
பட மூலாதாரம், Reuters
பரஸ்பர வரிகள் தொடர்பாக, அமெரிக்கா மீது மற்ற நாடுகள் விதித்த வரிகளையும் அந்த நாடுகள் மீதான அமெரிக்காவின் வரியையும் ஒப்பிடும் ஒரு பெரிய விளக்கப்பட்டத்தைப் பிடித்தவாறு அமெரிக்க அதிபர் பேசினார்.
அதன்படி, பிரிட்டனில் இருந்து இறக்குமதி செய்யப்படும் பொருட்களுக்கு 10%, ஐரோப்பிய ஒன்றிய இறக்குமதிகள் மீது 20% வரி விதிக்கப்படும்.
அதுகுறித்துப் பேசியபோது, “அவர்கள் நம்மிடம் கட்டணம் வசூலிக்கிறார்கள். நாமும் அவர்களிடம் அதையே வசூலிக்கிறோம். இதற்கு யாராவது வருத்தப்படலாமா?” என்றும் டிரம்ப் கேள்வியெழுப்பினார்.
மற்றவர்களுடன் ஒப்பிடுகையில், சீனா மற்றும் ஐரோப்பிய ஒன்றியம் குறித்துப் பேசிய டிரம்ப், “அவர்கள் நம்மை வரிகளால் பிழிந்தெடுக்கிறார்கள். மிகவும் வருத்தமாக இருக்கிறது. இது மிகவும் பரிதாபகரமானது,” என்று குறிப்பிட்டார்.
வர்த்தக கொள்கைகளைப் பொருத்தவரை, இந்தியா மிகவும் கடினமாக நடந்துகொள்வதாகவும் டிரம்ப் தெரிவித்தார். இந்திய சந்தையில் அமெரிக்க இறக்குமதிகள் போட்டியிடுவதை இந்தியாவின் வர்த்தகக் கொள்கைகள் மிகவும் கடினமாக்குவதைக் குறிப்பிட்ட அவர், “இந்தியா மிகவும் கடினமாக நடந்துகொள்கிறது. மிக மிகக் கடினமாக…” என்றார்.
பட மூலாதாரம், Getty Images
பல தசாப்தங்களாக அமெரிக்கா மற்ற நாடுகள் மீதான வர்த்தகத் தடைகளைக் குறைத்துள்ளதாகக் கூறிய அவர், ஆனால் “அந்த நாடுகள் நமது பொருட்கள் மீது பெரியளவிலான வரிகளை விதித்து வந்தன” என்றும் தெரிவித்தார்.
“பல சந்தர்ப்பங்களில்” பணம் சார்ந்த தடைகளைவிட பணம் சாராத தடைகளே மோசமாக இருந்ததாகவும் அவர் கூறினார்.
அமெரிக்காவின் அறிவுசார் சொத்துகளைத் திருடுவது, நியாயமற்ற விதிகளை நடைமுறைப்படுத்துவது உள்ளிட்ட பல்வேறு விஷயங்களைச் செய்வதாக டிரம்ப் பிற நாடுகள் மீது குற்றம் சாட்டினார்.
அமெரிக்காவின் வர்த்தகப் பிரதிநிதி அறிக்கையை உயர்த்திப் பிடித்துக்கொண்டு, “இதை நீங்கள் படித்தால் வெளிப்படையாக வருத்தமளிக்கும்” என்றும் கூறினார்.
மேற்கொண்டு பேசியவர், “ஆனால், அந்த நாட்கள் முடிவுக்கு வந்துவிட்டதாகவும்” அவர் தெரிவித்தார்.
இறக்குமதி செய்யப்படும் மோட்டார் வாகனங்களுக்கு அமெரிக்கா 2.4% வரி விதிப்பதாகக் குறிப்பிட்ட டிரம்ப், “தாய்லாந்து மற்றும் பிற நாடுகள் 60% வரைக்கும் அதிகமான வரியை வசூலிப்பதாகவும், இந்தியா 70% வசூலிப்பதாகவும் குறிப்பிட்டார்.
அமெரிக்காவில் தயாரிக்கப்பட்ட வாகனங்களுக்கு வரி விதிப்பதற்காக ஐரோப்பிய ஒன்றியம் மற்றும் ஆசிய நாடுகளை டிரம்ப் தொடர்ந்து விமர்சித்து வருகிறார்.
