இன்று ஆர்எஸ்எஸ் பொதுவெளியில் மூவர்ணக் கொடியை ஏற்றுகிறது. ஆர்எஸ்எஸ் நிகழ்ச்சிகள் மற்றும் அணிவகுப்புகளில் மூவர்ணக் கொடியை அடிக்கடி பார்க்க முடிகிறது. தேசியக் கொடியை மதிப்பதாக ஆர்எஸ்எஸ் கூறுகிறது.

ஆனால் சுதந்திரத்திற்கு முன்னும் பின்னும் பல தசாப்தங்களாக மூவர்ணக் கொடி தொடர்பான ஆர்எஸ்எஸ்-ன் நிலைப்பாட்டில் பல கேள்விக்குறிகள் இருந்தன.

ஆர்எஸ்எஸ் அமைப்பின் இரண்டாவது தலைவர் மாதவ் சதாசிவராவ் கோல்வால்கர் இந்தியாவின் மூவர்ணக் கொடியை விமர்சித்தார். பஞ்ச் ஆஃப் தாட்ஸ் என்ற தனது புத்தகத்தில் அவர் “மூவர்ணக் கொடி, நமது தேசிய வரலாறு மற்றும் பாரம்பரியத்தின் அடிப்படையிலான தேசியப் பார்வை அல்லது உண்மையால் ஊக்கம் பெற்று உருவாக்கப்பட்டது அல்ல,” என்று அவர் எழுதினார்.

மூவர்ணக் கொடியை ஏற்றுக்கொண்ட பிறகு அது வெவ்வேறு சமூகங்களின் ஒற்றுமையைக் குறிப்பதாக விளக்கப்பட்டது. அதாவது இந்துக்களுக்கு காவி நிறம், முஸ்லிம்களுக்கு பச்சை மற்றும் மற்ற அனைத்து சமூகங்களுக்கு வெள்ளை நிறம் என்று கோல்வால்கர் குறிப்பிட்டார்.

“இந்து அல்லாத சமூகங்களில் முஸ்லிம்களின் பெயர் குறிப்பாக எடுக்கப்பட்டது. ஏனெனில் அந்த முக்கியத் தலைவர்களின் மனதில் முஸ்லிம்கள் முதன்மையானவர்கள் என்ற எண்ணம் இருந்தது. அந்தப் பெயரை எடுக்காமல் நமது தேசியவாதம் முழுமையடையும் என்று அவர்கள் நினைக்கவில்லை. இது வகுப்புவாத மனப்பான்மையைக் குறிப்பதாக சிலர் சுட்டிக்காட்டியபோது, காவி நிறம் தியாகத்தின் அடையாளம், வெள்ளை நிறம் தூய்மையின் அடையாளம், பச்சை நிறம் அமைதியின் அடையாளம் என்று புதிய விளக்கம் எழுந்தது,” என்று அவர் எழுதினார்.

“கடந்த 1929இல் லாகூர் காங்கிரஸ் மாநாட்டில் முழு சுயராஜ்ஜியம் பற்றிப் பேசப்பட்டபோது, 1930 ஜனவரி 26ஆம் தேதியை சுதந்திர தினமாகக் கொண்டாடி மூவர்ணக் கொடி ஏற்றுவது என்று முடிவு செய்யப்பட்டது. அன்றும் ஆர்எஸ்எஸ் மூவர்ணக் கொடியின் இடத்தில் காவிக்கொடியை ஏற்றியது,” என்று எழுத்தாளரும் பத்திரிக்கையாளருமான நீலாஞ்சன் முகோபாத்யாய் சுட்டிக்காட்டினார்.

திரேந்திர ஜா ஆர்எஸ்எஸ் பற்றி விரிவான ஆராய்ச்சி செய்த புகழ்பெற்ற எழுத்தாளர். சமீபத்தில் ஆர்எஸ்எஸ் அமைப்பின் இரண்டாவது தலைவர் கோல்வால்கர் பற்றிய அவரது புத்தகம் வெளியிடப்பட்டது. இதற்கு முன் அவர் நாதுராம் கோட்ஸே மற்றும் இந்துத்துவம் பற்றிய புத்தகங்களையும் எழுதியுள்ளார்.

ஹெட்கேவார் 1930 ஜனவரி 21ஆம் தேதி எழுதிய கடிதத்தில் ‘சங்கத்தின் கிளைகளில் மூவர்ணக் கொடியை அல்ல, காவிக்கொடி ஏற்றுவது’ பற்றியே பேசியதாக ஜா கூறுகிறார்.

இந்தக் குற்றச்சாட்டுகளை ஆர்எஸ்எஸ் மறுத்து வருகிறது. 1930இல் மூவர்ணக் கொடிக்கு தேசியக் கொடி அந்தஸ்து இருக்கவில்லை.

“ஹெட்கேவரின் வாழ்க்கையின் ஒரே நோக்கம் தேசத்தின் பெருமை மற்றும் சுதந்திரத்தை அடைவது. அப்படி இருக்கும்போது சங்கத்திற்கு வேறு இலக்கு எப்படி இருக்க முடியும்? சங்கத்தினர் நமது சுதந்திரத்தின் அனைத்து சின்னங்கள் மீதும் அபரிமிதமான மரியாதையும் அர்ப்பணிப்பும் கொண்டுள்ளனர். இதுதவிர வேறு எதையும் சங்கத்தால் நினைக்க முடியாது,” என்று 2018ஆம் ஆண்டில் மோகன் பாகவத் கூறினார்.

ராம் பகதூர் ராய் நன்கு அறியப்பட்ட பத்திரிகையாளராக இருந்து தற்போது இந்திரா காந்தி தேசிய கலை மையத்தின் தலைவராக உள்ளார். அவர் இந்திய அரசியலமைப்பு மற்றும் முன்னாள் ஆர்எஸ்எஸ் தலைவர் பாலாசாஹேப் தியோரஸ் பற்றிய புத்தகங்களை எழுதியுள்ளார்.

கடந்த 1930இல் ஆர்.எஸ்.எஸ் மூவர்ணக் கொடியை ஏற்றியதா என்பது பற்றி கருத்து தெரிவித்த அவர், “மூவர்ணக் கொடி ஏற்றப்பட்டிருக்காது என்று நான் நம்புகிறேன். நீங்கள் உளவியல் கண்ணோட்டத்தில் பாருங்கள். மூவர்ணக் கொடி அப்போது சுதந்திரத்தைப் பிரதிநிதித்துவப்படுத்தவில்லை. அந்தக் காலத்தில் மூவர்ணக் கொடி காங்கிரஸை பிரதிநிதித்துவப்படுத்தியது” என்றார்.

“அப்போது தேசிய அளவில் சுதந்திரப் போராட்டத்தின் மையமாக காங்கிரஸ் இருந்தது உண்மைதான். ஆர்எஸ்எஸ் அமைப்பும் சுதந்திரக் குறிக்கோளால் ஈர்க்கப்பட்டது. ஆனால் ஆர்எஸ்எஸ் காங்கிரஸில் இருந்து வேறுபட்டது. மேலும் ஆர்எஸ்எஸ் அமைப்பின் அடையாளம் காவி நிறம். எனவே ஹெட்கேவர் எழுதிய கடிதத்தில் இரண்டு விஷயங்கள் இருப்பதாக நான் நினைக்கிறேன். ‘நாம் சுதந்திர இயக்கத்தில் ஈடுபட்டுள்ளோம். ஆனால் நம் அமைப்பு தனிப்பட்டது. எனவே நாம் நம் கொடியை ஏற்ற வேண்டும்’ என்று அவர் கூறியதாக நான் கருதுகிறேன்,” என்று ராய் குறிப்பிட்டார்.

ஆர்எஸ்எஸ் செய்தித் தொடர்பாளர் சுனில் ஆம்பேகர் தனது ‘RSS: Roadmap for the 21st Century’ என்ற புத்தகத்தில், “ஹிந்தியில் ‘திரங்கா’ என்று அழைக்கப்படும் தேசியக் கொடி நம் அனைவருக்கும் மிகவும் பிடித்தமானது. 1947 ஆகஸ்ட் 15ஆம் தேதி இந்தியா சுதந்திரம் அடைந்த நாளன்றும், 1950 ஜனவரி 26ஆம் தேதி குடியரசு தினத்தன்றும் நாக்பூரில் உள்ள ஆர்எஸ்எஸ் தலைமையகத்தில் மூவர்ணக் கொடி ஏற்றப்பட்டது,” என்று எழுதியுள்ளார்.

கடந்த 1963ஆம் ஆண்டு குடியரசு தின அணிவகுப்பில் பங்கேற்றபோது ஆர்எஸ்எஸ் தொண்டர்கள் மூவர்ணக் கொடியை ஏந்திச் சென்றதாகவும் ஆம்பேகர் குறிப்பிடுகிறார்.

கடந்த 1962இல் நடந்த சீனாவுடனான போருக்குப் பிறகு, அப்போதைய பிரதமர் ஜவஹர்லால் நேரு 1963 குடியரசு தின அணிவகுப்பில் கலந்துகொள்ள ஆர்எஸ்எஸ்-ஐ பிரத்யேகமாக அழைத்தார் என ஆர்எஸ்எஸ் உடன் தொடர்புடையவர்கள் அடிக்கடி மேற்கோள் காட்டுகிறார்கள்.

“கடந்த 1963ஆம் ஆண்டு குடியரசு தின அணிவகுப்பில் முதன்முறையாக சங்கத்தினரின்(ஆர்எஸ்எஸ்) கைகளில் மூவர்ணக் கொடி காணப்பட்டது” என்று திரேந்திர ஜா கூறுகிறார். ஆனால் இந்த அணிவகுப்பில் ஆர்எஸ்எஸ் மட்டுமே அழைக்கப்படவில்லை. அனைத்து தொழிற்சங்கங்கள், பள்ளிகள், கல்லூரிகள் அழைக்கப்பட்டதாக அவர் மேலும் தெரிவித்தார்.

“இந்த அணிவகுப்பு மக்கள் அணிவகுப்பாகக் கருதப்பட்டது. ஏனெனில் 1962 போர் முடிந்து படைகள் எல்லையில் இருந்தன. பாரதிய மஸ்தூர் சங்கம், அகில இந்திய தொழிற்சங்க காங்கிரஸ் மற்றும் இந்திய தேசிய தொழிற்சங்க காங்கிரஸ் போன்ற அமைப்புகள் அழைக்கப்பட்டன. அவர்கள் (ஆர்எஸ்எஸ்) சீருடை அணிந்து பங்கேற்றனர். ஏனென்றால் அவர்களுக்கு அங்கீகாரம் தேவைப்பட்டது. மகாத்மா காந்தியின் படுகொலைக்குப் பிறகு இந்த அமைப்பு சட்டவிரோதமாக அறிவிக்கப்பட்டது,” என்று ஜா கூறுகிறார்.

யாரும் தங்கள் சொந்தக் கொடியை கொண்டு வரக்கூடாது என்றும், அனைவரும் மூவர்ணக் கொடியை மட்டுமே கைகளில் வைத்திருக்க வேண்டும் என்றும் அப்போதைய பிரதமர் ஜவஹர்லால் நேரு தெளிவாகக் கூறியதால் அப்போது ஆர்எஸ்எஸ் தொண்டர்களின் கைகளில் மூவர்ணக் கொடி காணப்பட்டதாக ஜா கூறுகிறார்.

“நேரு, ஆர்எஸ்எஸ் அமைப்புக்கு அழைப்பு விடுத்ததாக ஆர்எஸ்எஸ் பின்னர் ஒரு கட்டுக்கதையைப் பரப்பத் தொடங்கியது,” என்று திரேந்திர ஜா குறிப்பிட்டார். “ஆர்எஸ்எஸ்-க்கு மூவர்ணக் கொடியுடன் சுமுகமான உறவு இருக்கவில்லை. வெகுகாலத்திற்குப் பிறகு மூவர்ணக் கொடி, அரசியலமைப்பு மற்றும் காந்தி இந்த நாட்டின் ஆன்மா என்பதை சங்கம்(ஆர்எஸ்எஸ்) புரிந்துகொள்ளத் தொடங்கியது. அதன் பிறகு அவர்கள் மூவர்ண கொடி மீது மரியாதை இருப்பதாக காட்டிக்கொள்ள ஆரம்பித்தனர்,” என்று அவர் மேலும் கூறினார்.

ஆர்எஸ்எஸ் தன் தலைமையகத்தில் இந்திய தேசியக் கொடியை ஏற்றுவதில்லை என்று ஒரு விமர்சனம் நிலவுகிறது. கடந்த 1950க்குப் பிறகு முதன்முறையாக ஆர்எஸ்எஸ் தனது தலைமையகத்தில் 2002 ஜனவரி 26ஆம் தேதி மூவர்ணக் கொடியை ஏற்றியது.

இதற்குப் பதிலளித்த ஆர்எஸ்எஸ் ஆதரவாளர்களும் தலைவர்களும், ‘2002 வரை ஆர்எஸ்எஸ் தேசியக் கொடியை ஏற்றவில்லை. ஏனென்றால் 2002 வரை தனிப்பட்ட முறையில் குடிமக்கள் தேசியக் கொடியை ஏற்ற அனுமதி இருக்கவில்லை’ என்று தெரிவித்தனர்.

ஆனால் 2002ஆம் ஆண்டு வரை அமலில் இருந்த கொடி சட்ட விதிகள் குடியரசு தினம், சுதந்திர தினம், காந்தி ஜெயந்தி ஆகிய நாட்களில் எந்தவொரு இந்தியரும் அல்லது அமைப்பும் கொடி ஏற்றுவதைத் தடுக்கவில்லை என்று ஒரு வாதம் முன்வைக்கப்படுகிறது.

கடந்த 1950, 60 மற்றும் 70களில் கூட தனியார் நிறுவனங்கள் ஆகஸ்ட் 15, ஜனவரி 26 ஆகிய தேதிகளில் தேசியக் கொடியை ஏற்றியதாக முகோபாத்யாய் கூறுகிறார். “தேசியக் கொடியின் அவமதிப்பைத் தடுப்பதே கொடி சட்ட விதிகளின் நோக்கம்,” என்றார் அவர்.

“பல அமைப்புகள் மற்றும் அரசுத் துறைகளைப் போலவே, ஆர்எஸ்எஸ் அமைப்புக்கும் அதன் சொந்தக் கொடி உள்ளது. அதாவது காவிக்கொடி. காவிக்கொடி பல நூற்றாண்டுகளாக இந்தியாவின் கலாசார டிஎன்ஏவை பிரதிநிதித்துவப்படுத்துகிறது. 2004ஆம் ஆண்டு கொடிச் சட்ட விதிகள் தாராளமயமாக ஆக்கப்பட்டதில் இருந்து ஆர்எஸ்எஸ் அலுவலங்களில் உச்ச மரியாதையுடன் முவர்ணக் கொடி ஏற்றப்படுகிறது. குடியரசு தினம் மற்றும் சுதந்திர தினத்தில் நாட்டின் அனைத்துப் பகுதிகளிலும் மூவர்ணக் கொடி ஏற்றப்படுகிறது. இந்த விழாக்களில் காவிக் கொடியும் ஏற்றப்படுகிறது,” என்று ஆம்பேகர் எழுதுகிறார்.

மூவர்ணக் கொடி இந்தியாவின் தேசியக் கொடியாக மாறியபோது அதுவொரு மோசமான கொடி என்று ஆர்எஸ்எஸ் கூறியது என்று பேராசிரியர் ஷம்சுல் இஸ்லாம் குறிப்பிட்டார்.

“இந்தியாவின் ஜனநாயகத்தின் அடையாளங்களாக இருந்தவற்றை ஆர்எஸ்எஸ் மதிக்கவில்லை. ஏனெனில் அவர்களின் கருத்துப்படி இந்தச் சின்னங்கள் இந்து தேசத்திற்குச் சொந்தமானவை அல்ல,” என்றார் அவர்.