வக்ஃப் திருத்தச் சட்டத்திற்கு எதிராக நடைபெற்ற போராட்டத்தில் ஏற்பட்ட வன்முறை காரணமாக, மேற்கு வங்கம் முர்ஷிதாபாத்தில் மூன்று பேர் கொல்லப்பட்டனர். இந்த பின்னணியில் வங்கதேசம் இத்தகைய கேள்வியை எழுப்பியுள்ளது.

மேற்கு வங்க முதல்வர் மமதா பானர்ஜி, “இந்த வன்முறையில் வங்கதேசத்தின் தலையீடு இருப்பதாக சிலர் கூறுகின்றனர். அது உண்மையாக இருப்பின், இதற்கு மத்திய அரசே பொறுப்பு. ஏன் என்றால் எல்லை பாதுகாப்புப்படைதான் (பி.எஸ்.எஃப்) எல்லையோரத்தில் பாதுகாப்புப் பணியை மேற்கொண்டு வருகிறது. அந்த படை மத்திய உள்துறை அமைச்சகத்தின் கீழ் செயல்பட்டு வருகிறது,” என்று கூறியுள்ளார்.

இந்த விவகாரத்தில் வங்கதேசத்தின் பெயர் அடிபட்ட நிலையில், இதற்கு பதில் அளித்துள்ளது அந்த நாடு.

வங்கதேச இடைக்கால அரசின் செய்தித்துறை செயலாளர் ஷஃபிகுல் ஆலம், “முர்ஷிதாபாத்தில் நடைபெற்ற வன்முறைக்கு வங்கதேசத்தை காரணம் காட்டும் அனைத்து குற்றச்சாட்டுகளையும் நான் நிராகரிக்கிறேன். மேற்கு வங்கத்தில் இஸ்லாமியர்கள் மீது நடத்தப்பட்ட தாக்குதலுக்கு கண்டனத்தை தெரிவித்துக் கொள்கிறது எங்கள் நாடு. மேலும் இந்தியா மற்றும் வங்கதேச அரசு கூட்டாக இணைந்து சிறுபான்மை இஸ்லாமிய சமூகத்தின் பாதுகாப்பை உறுதி செய்ய தேவையான நடவடிக்கைகளை மேற்கொள்ள வேண்டும் என்று நாங்கள் வலியுறுத்துகிறோம்,” என்று கூறியுள்ளார்.

ஷஃபிகுல் ஆலமின் கருத்துக்கு இந்திய வெளியுறவுத்துறை அமைச்சகம் வெள்ளிக்கிழமை (ஏப்ரல் 18) அன்று விளக்கம் அளித்துள்ளது.

“மேற்கு வங்கத்தில் நடைபெற்ற சம்பவம் தொடர்பாக வங்கதேசம் தெரிவித்த கருத்தை நாங்கள் நிராகரிக்கிறோம். வங்கதேச சிறுபான்மையினருக்கு எதிராக நடைபெறும் வன்முறைக்கு எதிராக தொடர்ச்சியாக இந்தியா குரல் எழுப்பி வருகிறது.

தற்போது அதே போன்ற கருத்துகளை வேண்டுமென்றே வங்கதேசம் இந்த விவகாரத்தில் தெரிவித்துள்ளது. தேவையற்ற கருத்துக்களை வெளியிடுவதற்கு பதிலாக, வங்கதேசம் அந்த நாட்டில் உள்ள சிறுபான்மையினரின் உரிமைகளை பாதுகாக்க கவனம் செலுத்த வேண்டும்,” என்று இந்திய வெளியுறவுத்துறை அமைச்சகம் தெரிவித்துள்ளது.

வங்கதேசமும் பாகிஸ்தானும் நெருக்கமாக செயல்பட ஆரம்பித்துள்ளன.

பாகிஸ்தானின் வெளியுறவுத்துறை செயலாளர் அம்னா பலோச் வங்கதேசத்திற்கு வருகை புரிந்துள்ளார். அவர் முகமது யூனஸை சந்தித்து பேச்சுவார்த்தையும் நடத்தியுள்ளார். அவரிடம் இரு நாட்டு உறவையும் பலப்படுத்த தேவையான நடவடிக்கைகளை எடுக்க வலியுறுத்தினார் யூனஸ்.

இரு நாட்டு உறவுகளையும் மேம்படுத்த சாத்தியமான வாய்ப்புகள் அதிகமாக உள்ளது என்று அம்னா பலோச் தெரிவித்தார்.

ஏப்ரல் மாத இறுதியில் பாகிஸ்தானின் துணை பிரதமரும் வெளியுறவுத்துறை அமைச்சருமான இஷ்க் தார் வங்கதேசத்திற்கு பயணம் மேற்கொள்ள உள்ளார் என்றும் பலோச் தெரிவித்துள்ளார்.

அவருடைய வருகை இவ்விரு நாட்டு உறவை மேலும் மேம்படுத்தும் என்றும் பலோச் கூறியுள்ளார்.

அதற்கு பதில் அளித்த முகமது யூனஸ், அனைத்து அண்டை நாடுகளுடன் நெருக்கமான உறவை மேம்படுத்த விரும்புவதாக தெரிவித்தார்.