“அவர்களுக்குப் பாலங்கள் இருக்காது”, “அவர்களுக்கு மின் உற்பத்தி நிலையங்கள் இருக்காது”என்றும் டிரம்ப் மிரட்டியுள்ளார்.

அமெரிக்காவின் கோரிக்கைகளை இரான் முன்னதாக நிராகரித்திருந்த போதிலும், அமெரிக்க மற்றும் இஸ்ரேலியத் தாக்குதல்களில் இரானின் தலைமைப் பீடத்திற்கு அடுத்தடுத்த வந்த தலைவர்கள் கொல்லப்பட்ட பிறகு, இரான் நல்லெண்ணத்துடன் பேச்சுவார்த்தை நடத்துகிறது என்ற நம்பிக்கையை டிரம்ப் தொடர்ந்து வெளிப்படுத்தினார்.

“நாங்கள் அதைக் கண்டறிவோம்” என்று டிரம்ப் தெரிவித்தார்.

பேச்சுவார்த்தைகள் குறித்து நன்கு அறிந்த பிராந்திய அதிகாரி ஒருவரின் கூற்றுப்படி, முதலில் போர் நிறுத்தம் ஏற்படாமல் எந்தவொரு பேச்சுவார்த்தையிலும் அர்த்தமுள்ள முன்னேற்றம் ஏற்பட வாய்ப்பில்லை.

பேச்சுவார்த்தைகளின் முக்கியத்துவம் காரணமாகப் பெயர் குறிப்பிட விரும்பாத அந்த அதிகாரி கூறுகையில், தற்போது நிலவிவரும் தகவல் தொடர்புத் தடைக்கு மத்தியில், இரானிய அதிகாரிகளுக்குச் செய்திகளை அனுப்புவதிலும் அங்கிருந்து பெறுவதிலும் உள்ள சிரமங்களால் பேச்சுவார்த்தைகள் சிக்கலாகியுள்ளன என்று தெரிவித்தார்.

“இரானுக்குச் செய்திகளைத் தெரிவிக்கவும், நியாயமான நேரத்திற்குள் பதிலைப் பெறவும் முடிவதில்லை” என்று கூறிய அந்த அதிகாரி, “பதிலைப் பெறுவதற்கான சராசரி நேரம் ஒரு நாள் அல்லது அதற்கு மேலாக இருக்கிறது”என்கிறார்.

பாகிஸ்தான், துருக்கி மற்றும் எகிப்து ஆகிய நாடுகள் மத்தியஸ்த முயற்சிகளில் ஈடுபட்டுள்ளன.

அரசாங்கத்தின் அடுத்தக்கட்டத் திட்டங்கள் குறித்து டிரம்ப் மிகக் குறைவான விபரங்களையே வழங்கினார்.

தன்னிடம் “சிறந்த திட்டம்” இருப்பதாகவும், ஆனால் அதை ஊடகங்களுக்குத் தெரிவிக்க மாட்டேன் என்றும் மட்டுமே அவர் கூறினார்.

இரானிய உள்கட்டமைப்புகள் மீது திட்டமிட்டுத் தொடர்ச்சியாக நடத்தப்படும் தாக்குதல்கள் போர்க்குற்றமாக அமையக்கூடும் என்று சட்ட வல்லுநர்கள் எச்சரித்துள்ளனர்.

“அனைத்து மின் உற்பத்தி நிலையங்களையும் அழிப்பது, ஒரு அரசாங்கத்தைப் பேச்சுவார்த்தை மேசைக்குக் கொண்டு வருவதற்காக பொது மக்களுக்கு எதிராகக் கட்டாய நடவடிக்கைகளை மேற்கொள்வதாக அச்சுறுத்துவது போன்ற செயல்கள் அனைத்தும் முற்றிலும் சட்டவிரோதமானவை” என்று ஒபாமா காலத்துத் தேசிய பாதுகாப்பு கவுன்சிலின் முன்னாள் சட்ட ஆலோசகர் டெஸ் பிரிட்ஜ்மேன், பிபிசியின் அமெரிக்கப் பங்காளியான சிபிஎஸ்-ஸிடம் (CBS) தெரிவித்தார்.

அன்றைய தினத்தின் முற்பகுதியில், அத்தகைய சாத்தியக்கூறுகள் குறித்துத் தான் “கவலைப்படவில்லை” என்று டிரம்ப் கூறினார்.

இரானிய அரசாங்கத்தைக் கவிழ்ப்பது தனது நோக்கமாக இல்லாவிட்டாலும், இரானின் மக்கள் “சுதந்திரத்தைப் பெறுவதற்காகத் துயரங்களை அனுபவிக்கத் தயாராக இருப்பார்கள்” என்று அந்தச் செய்தியாளர் சந்திப்பில் அவர் குறிப்பிட்டார்.

நேட்டோ மற்றும் பிரிட்டன், தென்கொரியா உள்ளிட்ட முக்கிய அமெரிக்க நட்பு நாடுகளையும் டிரம்ப் மீண்டும் விமர்சித்தார். இந்த மோதலின் போது அந்த நாடுகள் அமெரிக்காவிற்கு உதவத் தவறிவிட்டதாக அவர் கூறினார்.

“அது நேட்டோ மீது ஒருபோதும் மறையாத ஒரு வடுவாக இருக்கும்” என்று கூறிய அவர், அமெரிக்காவிற்குப் பிரிட்டன் “தேவையில்லை” என்றும் குறிப்பிட்டார்.

அமெரிக்க ராணுவத்தின் மத்திய கட்டளைத் தலைமையகம் திங்களன்று வெளியிட்ட தகவலின்படி, போர் தொடங்கியதிலிருந்து இரான் முழுவதும் அமெரிக்கப் படைகள் 13,000-க்கும் மேற்பட்ட தாக்குதல்களை நடத்தியுள்ளன.

– இது, பிபிசிக்காக கலெக்டிவ் நியூஸ்ரூம் வெளியீடு