எல்ல ரயில் நிலையத்துக்கும் பதுளைக்கும் இடையில் சுமார் ஒரு வார காலமாக ரயில் சேவை குறைக்கப்படுவதற்கு ஈடாக நஷ்ட ஈடு வழங்கப்பட்டுள்ளதா என பிபிசி சிங்கள மொழிச் சேவை ரயில்வே துறையிடம் வினவியது.

இதுகுறித்து, ரயில்வே துறை சார்பில், அதன் துணைப் பொது மேலாளர் (போக்குவரத்து) என்.ஜே.இண்டிபொலாகே, படப்பிடிப்பு காலகட்டத்திற்கான பணம் வசூலிக்கப்பட்டுள்ளதாகத் தெரிவித்தார்.

“இந்தத் திரைப்படத் தயாரிப்பு நிறுவனம் ஏற்கனவே ரயில்வே துறைக்கு 2.3 கோடி ரூபாய் செலுத்தியுள்ளது. மேலும் 4.8 கோடி ரூபாய் பாதுகாப்புத் தொகையாகச் செலுத்தியுள்ளது,” என்றார்.

“ரயில்வே கட்டமைப்புகளுக்கு ஏதேனும் பாதிப்பு ஏற்பட்டாலோ, வேறு ஏதேனும் சம்பவத்தால் பணம் வசூலிக்க நேர்ந்தாலோ, இந்தப் பாதுகாப்புத் தொகையில் இருந்து வசூலிப்போம்,” என்றார் அவர்.

ரயில் சேவை தடைபடுவதால், முன்பதிவு செய்த ரயில் பயணிகளுக்கு ஏற்படும் அசௌகரியங்கள் குறித்து பிபிசி சிங்களம் அவரிடம் வினவியது.

எல்ல ரயில் நிலையத்தில் இருந்து பதுளை வரை பயணிகள் சிரமமின்றிச் செல்வதற்குத் தேவையான போக்குவரத்து வசதிகள் செய்து கொடுக்கப்பட்டுள்ளதாக துணை பொது மேலாளர் (போக்குவரத்து) என்.ஜே.இண்டிபொலாகே தெரிவித்தார்.

“பெரும்பாலான நேரங்களில், மிகக் குறைந்த எண்ணிக்கையிலான பயணிகள் மட்டுமே எல்ல-வில் இருந்து பதுளைக்கு ரயிலில் பயணிக்கின்றனர். ஏனெனில் பல சுற்றுலாப் பயணிகள் ‘நானு ஓயா’ பகுதியில் இருந்து எல்ல-வுக்குத் தான் செல்கிறார்கள்,” என்றார்.

“ரயில் எந்தத் தொந்தரவும் இல்லாமல் எல்ல-விற்குச் செல்கிறது. அதனுடன் அங்கிருந்து பதுளை செல்லும் பயணிகளுக்கு பஸ்களை ஏற்பாடு செய்திருக்கிறோம். படப்பிடிப்பை நடத்துபவர்களே இந்தப் பேருந்துகளை ஏற்பாடு செய்துள்ளனர். அதை மேற்பார்வையிட எங்கள் துறையைச் சேர்ந்த இரண்டு அதிகாரிகளை நியமித்துள்ளோம்,” என்றார்.

“எல்ல-வில் இருந்து பண்டாரவளைக்குச் செல்ல விரும்பும் ரயில் பயணிகளுக்குக் குளிரூட்டப்பட்ட பேருந்து ஏற்பாடு செய்யப்பட்டுள்ளது. மற்ற பயணிகளுக்கும் பஸ் வசதி செய்யப்பட்டுள்ளது,” என்றார்.

“இந்தப் படத்தின் ஷூட்டிங் நடப்பதால் கொழும்பில் இருந்து பதுளைக்கு இரவு நேரத்தில் ஓடும் மெயில் ரயிலுக்கு எந்த இடையூறும் ஏற்படாது,” என்றார்.