திகாமடுல்ல மாவட்டத்தில் தேசிய மக்கள் சக்தி அதிக ஆசனங்களை கைப்பற்றி, வெற்றியீட்டியுள்ளது.

தேசிய மக்கள் சக்திக்கு திகாமடுல்ல தேர்தல் மாவட்டத்தில் 146,313 வாக்குகள் கிடைத்துள்ளதுடன், அந்த மாவட்டத்தில் 4 ஆசனங்கள் கிடைத்துள்ளன.

இரண்டாவது இடத்தை ஸ்ரீலங்கா முஸ்லிம் காங்கிரஸ் பெற்றுக்கொண்டுள்ளது.

ஸ்ரீலங்கா முஸ்லிம் காங்கிரஸிற்கு 46,899 வாக்குகளும், அகில இலங்கை மக்கள் காங்கிரஸிற்கு 33,911 வாக்குகளும்,இலங்கை தமிழ் அரசுக் கட்சிக்கு 33,632 வாக்குகளும் கிடைத்துள்ளன.

ஸ்ரீலங்கா முஸ்லிம் காங்கிரஸ், அகில இலங்கை மக்கள் காங்கிரஸ் மற்றும் இலங்கை தமிழ் அரசுக் கட்சி ஆகியவற்றிற்கு தலா ஒவ்வொரு ஆசனங்கள் கிடைத்துள்ளன.

இந்திய வம்சாவளித் தமிழர்கள் அதிகளவில் வாழும் நுவரெலியா, கண்டி, மாத்தளை, பதுளை, இரத்தினபுரி, களுத்துறை உள்ளிட்ட பகுதிகளில் தேசிய மக்கள் சக்தி வெற்றியீட்டியுள்ளது.

மலையகம் உள்ளிட்ட ஏனைய பகுதிகளில் தமிழர்கள் செறிந்து வாழ்ந்தாலும், அந்த பகுதிகளிலுள்ள தமிழ் கட்சிகள் பெரும்பாலும் தேசிய கட்சிகளுடன் கூட்டணி அமைத்தவாறே தேர்தலை எதிர்கொள்வது வழக்கமானது.

எனினும், வடக்கு மற்றும் கிழக்கு மாகாணங்களிலுள்ள தேர்தல் மாவட்டங்களில் மாத்திரமே தமிழ் கட்சிகள் தனித்து போட்டியிடுகின்றன.

இந்த நிலையில், இம்முறை வடக்கு மற்றும் கிழக்கு மாகாணங்களிலுள்ள தேர்தல் மாவட்டங்களிலும், மலையகம் உள்ளிட்ட ஏனைய தமிழர்கள் வாழும் பகுதிகளிலும் முழுமையான ஆதிக்கத்தை தேசிய மக்கள் சக்தி செலுத்தியுள்ளது.

வடக்கு மற்றும் கிழக்கு மாகாணங்களில் தமிழர்கள், தமிழ் கட்சிகள் மீது வைத்திருந்த நம்பிக்கையை இழந்துள்ளமை, இந்த தேர்தல் முடிவுகளில் வெளிப்படுவதாக அரசியல் ஆய்வாளர்கள் கூறுகின்றனர்.

– இது, பிபிசிக்காக கலெக்டிவ் நியூஸ்ரூம் வெளியீடு