கேப்டன் பிரபாகரன் திரைப்படத்தில் இளையராஜாவுடனான தனது பயணம் குறித்து இயக்குநர் ஆர்கே செல்வமணி பகிர்ந்தவை.

“இளையராஜா அவர்களின் பெயர் இல்லையென்றால் அன்றைய தேதியில் படம் வெளியாகாது. எனது முதல் படம் புலன் விசாரணையில் பாடல்கள் இல்லை. அவர் படத்தின் முதல் பிரதியைப் பார்த்துவிட்டு, ஏன் படத்தில் பாடல்களே இல்லை என்று கேட்டார். ஏற்கனவே படத்தில் வணிக ரீதியான அம்சங்கள் இல்லை என்று பலர் என்னை நச்சரித்துக் கொண்டிருந்தனர்.

இவரும் இப்படிக் கேட்டதால், ‘உங்கள் பாட்டை வைத்து அனைவரும் படத்தை ஓட வைக்கப் பார்க்கின்றனர். நான் உங்கள் பாடல் இல்லாமல் ஓட்ட நினைக்கிறேன்’ என்று கோபத்தில் கூறிவிட்டேன். அவர் என்னை அமைதியாகப் பார்த்துவிட்டுச் சென்றார். சுற்றியிருந்தவர்கள் பதறிவிட்டனர். எனக்கும் அதன் பிறகு வருத்தமாகிவிட்டது.

படம் வெளியானது. வெற்றி பெற்றது. என்னை அழைத்தார். இப்போது எனது பின்னணி இசை இல்லாமல் இந்தப் படத்தைப் பார், திரையரங்கில் ஒரு நாள் ஓடுமா என்று சொல் என்றார். நான் அதன் பின் அவரிடம் மன்னிப்புக் கேட்டேன்.

இதன் பிறகு கேப்டன் பிரபாகரன் படத்தில் கடைசி பாடலுக்கான சூழல். தேனியில் அந்தப் பாடலுக்கான படப்பிடிப்பு நடந்து கொண்டிருக்கிறது. நான் பாடல் மெட்டமைக்கச் செல்லவில்லை. அந்தச் சூழலுக்கான பாடல் ஒன்று வந்தது. அது எனக்குப் பிடிக்கவில்லை.

தொலைபேசியில் இளையராஜாவிடம் பேசினேன். அவரோ, பாடல் மெட்டமைக்கவும் நீங்கள் யாரும் வருவதில்லை, போட்ட பாடலும் பிடிக்கவில்லை என்றால் என்ன செய்வது. என்னதான் வேண்டும் என்று கேட்டார். அதற்கு நான், எனது திரைப்படத்தை ஷோலேவைப் போல நான் எடுத்திருக்கிறேன். அதில் வரும் மெஹபூபா பாடலைப் போல ஒரு பாடல் வேண்டும் என்றேன்.

நான் சொன்னதை வைத்து அன்றே மெட்டமைத்து, பதிவு செய்து அடுத்த நாள் எங்கள் படப்பிடிப்புக்கு பாடலின் கேஸட் வந்தது. அதுதான் ஆட்டமா தேரோட்டமா பாடல். இதன் பிறகு அவர் பாடல்களுக்காகவே அமைந்த படம் செம்பருத்தி. 9 பாடல்களையும் வெறும் 45 நிமிடங்களில் இளையராஜா மெட்டமைத்தார்”, என்றார் ஆர்கே செல்வமணி.

சின்ன கவுண்டர், கிழக்கு வாசல், பொன்னுமணி, எஜமான் உள்ளிட்ட படங்களில் இளையராஜாவுடன் பணியாற்றிய இயக்குநர் ஆர்.வி.உதயகுமார் ஒரு இசை வெளியீட்டு விழாவில் பகிர்ந்த செய்தி.

“எனது மூன்றாவது படத்தில் தான் என்னால் அவரை அணுக முடிந்தது. கிழக்கு வாசல் படத்தில் நான் எழுதிய பச்ச மல பூவு பாடலை முதலில் அவர் படிக்கவில்லை. பாலசுப்பிரமணியனை வைத்து என்னையே பதிவு செய்யச் சொன்னார். சில நாட்கள் கழித்து என்னை அழைத்து என் வரிகளை அவர் பாராட்டியதை மறக்க முடியாது.

எஜமான் படத்தின் போது நடந்த நிகழ்வை நான் சொல்ல விரும்புகிறேன். அப்போது அந்தப் படத்தின் பாடல்களுக்கு மெட்டமைக்க நான் காத்துக் கொண்டிருந்தேன். அவரை விட்டுப் பிரிந்து சென்ற மூத்த இயக்குநர்கள் சிலர் நீண்ட நாட்களுக்குப் பிறகு அவருடன் மீண்டும் இணைந்து பணியாற்ற வந்திருந்தனர். அவர்களின் படங்களுக்கான பாடல்களுக்கு மெட்டமைத்துக் கொண்டிருந்தார். அப்போது இளையராஜா அமைத்த மெட்டுகளை அவர்கள் நிராகரித்து விட்டார்கள். அதனால் அந்த சமயத்தில் நான் போய் அவரிடம் கேட்க முடியாது. அவர் கோபத்தில் இருப்பார். நாளைக்கு மெட்டமைக்கலாம் என்று சொல்லி விடுவார் என்று நினைத்தேன்.

எனக்கு மனசு கேட்கவில்லை. இளையராஜாவின் அன்றைய உதவியாளர் சுந்தர்ராஜன் என்பவரை அழைத்தேன். அந்த இயக்குநர்கள் நிராகரித்த மெட்டுகளை போட்டுக் காட்டுங்கள் என்றேன். அவர்கள் வேண்டாம் என்று நிராகரித்த மெட்டுகளிலிருந்து நான் தேர்ந்தெடுத்த பாடல்கள் தான் மிகப்பெரிய வெற்றிப் பாடல்களாக அமைந்தன. அப்படியான பாடல் தான் எஜமான் படத்தில் வந்த நிலவே முகம் காட்டு என்ற பாடலும், ஒரு நாளும் உனை மறவாத என்ற பாடலும்”.

சத்யா படத்தில் வரும் வளையோசை கலகலவென பாடல் குறித்து இசையமைப்பாளர் இளையராஜா, அவரது இசை நிகழ்ச்சி ஒன்றில் பேசியது:

“நான் நத்திங் பட் விண்ட் என்கிற தனியிசை ஆல்பத்துக்காக வைத்திருந்த மெட்டுதான் இந்தப் பாடல். புகழ் பெற்ற புல்லாங்குழல் இசைக் கலைஞர் ஹரிபிரசாத் சவுராஸியாவை இசைக்க வைக்க திட்டமிட்டிருந்தேன். ஒரு நாள் கமல்ஹாசனுடன் எதேச்சையாக பேசிக் கொண்டிருந்த போது இந்த மெட்டை இசைத்துக் காட்டினேன். மிக நன்றாக இருக்கிறதே. இதை என் படத்தில் பயன்படுத்தவா என்று கேட்டார். சரி என்றேன்.

பின் அதில் லதா மங்கேஷ்கரைப் பாட வைக்க முடிவு செய்தோம். அவருக்கு தமிழ் தெரியாது என்பதால் அவர் பாட ஏதுவாக வரிகளை அமைக்கலாம் என்று கவிஞர் வாலியிடம் சொன்னேன். கலகலகலவென, குளுகுளு தென்றல் போன்ற வார்த்தைகளை அவர் அதனால் தான் எழுதினார். குளுகுளு தென்றல் என்ற வார்த்தைகளைக் கேட்டவுடன், அதை என் இசையில் எப்படிச் சொல்லலாம் என்று யோசித்தேன். அந்த வார்த்தைகளை வைத்துதான் அந்தப் பாடலுடன் ஆரம்ப இசையை உருவாக்கினேன்”

“அந்த சூழலுக்கான மெட்டை அமைக்க நான், இயக்குநர் சிங்கீதம் ஸ்ரீனிவாச ராவ் மற்றும் கமல்ஹாசன் மூன்று பேரும் ராஜ்கமல் அலுவலகத்தில் உட்கார்ந்தோம். முதலில் நான் ஒரு மெட்டு போட்டேன், சிங்கீதம் இன்னொரு மெட்டு முயற்சி செய்யலாமா என்று கேட்டார். நான் அடுத்த 3 நாட்கள் மெட்டமைப்பதற்கு குற்றாலம் செல்லவிருந்தேன். முந்தைய நாள் இவர் வேறொரு மெட்டு முயற்சி பண்ணலாமா என்று கேட்டதால் குற்றாலம் சென்ற பிறகும் இவர்களுக்காக யோசித்தேன்.

திரும்பி வரும்போது 63 மெட்டுகளோடு வந்தேன். ராஜ்கமல் அலுவலகத்தில் அவர் கேட்கக் கேட்க அடுத்தடுத்த மெட்டுகளை வாசித்துக் கொண்டே இருந்தேன். எல்லாம் கேட்டு விட்டு, ராஜா, முதல் முதலில் ஒரு மெட்டு தந்தீர்களே, அதை கேட்கலாமா என்றார். சரி என்று அதை மீண்டும் இசைத்தேன். இது மிக நன்றாக இருக்கிறதே என்றார். அதுதான் இப்போது ஒலிக்கும் அந்தி மழை பொழிகிறது பாடல்.”, என்று இளையராஜாவே பகிர்ந்து கொண்டார்.

இயக்குநர் பாரதிராஜா, தனது நிழல்கள் படத்திற்கான பாடல்களை மெட்டமைக்கும் போது முதல் முதலாக வைரமுத்துவும் இளையராஜாவும் சந்தித்துக் கொண்ட தருணம் குறித்துப் பகிர்ந்துள்ளதாவது:

“உபால்ட் என்கிற ஓவியர் வைரமுத்துவை என்னிடம் அறிமுகம் செய்து வைத்தார். அப்போது திருத்தி எழுதிய தீர்ப்புகள் என்கிற புத்தகத்தை வைரமுத்து எழுதியிருந்தார். இன்று இருக்கும் அதே கம்பீரம் அன்றும் வைரமுத்துவிடம் இருந்தது. என்னிடம் அவரது புத்தகத்தைக் கொடுத்துவிட்டு, என்னைப் பயன்படுத்த முடிந்தால் பயன்படுத்திக் கொள்ளுங்கள் என்று சொன்னார். வாய்ப்பு கேட்க வந்த ஒருவனுக்கு என்ன இவ்வளவு திமிரா என்று நினைத்தேன். அவர் பெரிதாகப் பொருட்படுத்தாமல் சென்றுவிட்டார்.

இலங்கைக்கு படப்பிடிப்புக்கான இடங்களைப் பார்க்கச் செல்லும் போது விமானத்தில் அந்தப் புத்தகத்தைப் படித்தேன். எனது மண் சார்ந்த அத்தனை விஷயங்களும் அதில் இருந்தன. யார் இது என்று ஆச்சரியமாக யோசித்துக் கொண்டே சென்றேன். அப்போது எனக்கு வைரமுத்து மதுரையைச் சேர்ந்தவர், ஒரு வகையில் எனக்குச் சொந்தம் என்பதெல்லாம் எனக்குத் தெரியாது. சென்னை திரும்பி நிழல்கள் படத்திற்கான மெட்டமைக்கும் பணிகளை ஆரம்பித்தோம். பாடல்கள் எழுத புதிதாக யாரையாவது பயன்படுத்துவோம் என்று இளையராஜா சொல்லியிருந்தார்.

அப்போது நான் அந்தப் புத்தகத்தைக் காட்டி, இந்தப் புத்தகம் எழுதியிருக்கும் ஒருவன் இருக்கிறான். ஆனால் மிகவும் திமிர் பிடித்தவன் என்றே சொன்னேன். அப்போது வைரமுத்து அரசுப் பணி ஒன்றில் இருந்தார். அவரை பாட்டெழுத வரவழைத்தோம். அதே கம்பீரத்தோடு வந்தார். நான் என் மனதுக்குள், இவன் கர்வத்தை அடக்க மாட்டான் போலத் தெரிகிறதே என்று எண்ணிக் கொண்டேன். ஏனென்றால் இதைப் பார்த்தால் இளையராஜா அதற்கும் ஒரு படி மேல் நிற்பார்.

ராஜா மெட்டினை இசைத்தார். இந்த மெட்டுக்கு பாட்டெழுத வேண்டும் என்றோம். வைரமுத்து சரி என்று தலையசைத்து விட்டு கையில் பேப்பர் பேனாவுடன் வெளியே சென்றுவிட்டார். என்ன நடக்கிறது என்று புரியவில்லை. யார் யாரையோ அழைத்து வந்து வெறுப்பேற்றுகிறாயே என்று இளையராஜா என்னை திட்டினார். காத்திரு என்றேன். சில நிமிடங்கள் கழித்து உள்ளே வந்தார் வைரமுத்து. காகிகதத்தை இளையராஜாவின் முன்னால் வைத்தார். அவர் அதை எடுத்துப் பார்த்தார். தனது மெட்டுக்கு அந்த வார்த்தைகளை பொருத்தி, பொன் – மாலைப் – பொழுது என்று பாட, அது அப்படியே சரியாக இருந்தது. ஆச்சரியமடைந்தார். அன்று ஆரம்பித்தது தான் இவர்கள் கூட்டணி”

– இது, பிபிசிக்காக கலெக்டிவ் நியூஸ்ரூம் வெளியீடு.