முகமது முதஸ்ஸிர் காமர் கூறுகையில், “இரான் எப்போதும் சதாம் ஹுசைனை ஒரு அச்சுறுத்தலாகவே பார்த்தது. ஆனால், அமெரிக்கா சதாம் ஹுசைனுக்கு தூக்குத் தண்டனை வழங்கியது, அவர் இரானுக்கு அச்சுறுத்தலாக இருந்தார் என்பதால் அல்ல. அமெரிக்காவுக்கு அதன் சொந்த காரணங்கள் இருந்தன. இராக்கில் உள்ள ஷியா மக்களுக்கு ஆதரவாக இரான் எப்போதும் இருந்து வந்துள்ளது. தற்போது இரான் முற்றிலும் தனிமைப்படுத்தப்பட்டுள்ளது. இப்போது இரான் அமெரிக்காவுடன் நேரடியாக மோத வேண்டிய சூழல் ஏற்படலாம். அப்படி நடந்தால், இந்த மோதல் ஒரு தீர்வை தருவதாக இருக்கக்கூடும்.”

முகமது முதஸ்ஸிர் காமர் கூறுகையில், “இஸ்லாமிய நாடுகளுக்கிடையேயான முரண்பாடுகள் மிகவும் ஆழமானவை, அவற்றிலிருந்து அவை இதுவரை விடுபட முடியவில்லை. இஸ்லாமிய ஒத்துழைப்பு அமைப்பு (OIC) மற்றும் அரபு லீக் போன்ற அமைப்புகள் உள்ளன, ஆனால் அவை பெயரளவில் மட்டுமே உள்ளன,” என கூறுகிறார்.

2003-ல் எர்துவான் துருக்கியின் பிரதமரானபோது, அமெரிக்கா இராக்கின் மீது தாக்குதல் நடத்தத் தயாராகிக் கொண்டிருந்தது. எர்துவான் சதாம் ஹுசைனுடன் நெருக்கமாக இல்லை. இராக்குக்கு எதிரான போரில் துருக்கியின் நிலப்பகுதியைப் பயன்படுத்த அமெரிக்காவை அனுமதிக்கவும் அவர் முடிவு செய்திருந்தார்.

ஆனால், அவரது இந்த முன்னெடுப்பு துருக்கி நாடாளுமன்றத்தில் வெறும் மூன்று வாக்குகள் வித்தியாசத்தில் தோல்வியடைந்ததால் எர்துவானின் எண்ணம் நிறைவேறவில்லை, அவரது கட்சிக்கு நாடாளுமன்றத்தில் மூன்றில் இரண்டு பங்கு பெரும்பான்மை இருந்தும் இது நடந்தது. இந்த முடிவால் அப்போதைய புஷ் நிர்வாகம் மிகவும் கோபமடைந்தது. இருப்பினும், துருக்கியின் வான்வெளியைப் பயன்படுத்த அமெரிக்காவுக்கு எர்துவான் அனுமதி வழங்கியிருந்தார்.

ஒருபுறம், எர்துவான் முஸ்லிம் சுயமரியாதை மற்றும் அதன் நலன்களைப் பற்றி பேசுவது, மறுபுறம் இராக்கின் மீதான அமெரிக்கத் தாக்குதலை ஆதரித்தார். இவை இரண்டுமே ஒன்றுக்கொன்று முற்றிலும் முரண்பட்டவையாக இருந்தன.

இப்போது இஸ்ரேல் இரான் மீது தாக்குதல் நடத்தியிருக்கும் நிலையில், எர்துவான் மீண்டும் தீவிரமாக கருத்து தெரிவிக்கத் தொடங்கியுள்ளார்.

ஆனால், சில மாதங்களுக்கு முன்புதான் சிரியாவில் இருந்த இரான் ஆதரவு அரசு துருக்கியின் உதவியுடன் தூக்கி எறியப்பட்டது.

ஒரு வகையில், சிரியாவில் துருக்கியின் கைகளால் இரான் தோல்வியை சந்தித்தது.

எர்துவான் எக்ஸ் (முன்னாள் ட்விட்டர்) தளத்தில் ஒரு நீண்ட பதிவில் இஸ்ரேல் குறித்து இவ்வாறு எழுதியுள்ளார்:

“இஸ்ரேல், மேற்கத்திய நாடுகளின் பரந்த ஆதரவுடன் இரான் மீது தாக்குதல் நடத்தியுள்ளது. இஸ்ரேல் காஸாவை அழித்து இந்தப் பிராந்தியத்தின் ஒவ்வொரு நாட்டையும் அச்சுறுத்தியிருக்கிறது. தாம் என்ன செய்கிறோம் என்பதையே உண்மையில் இஸ்ரேல் உணரவில்லை.”

“எதிர்காலத்தில் இஸ்ரேல் தனது தவறை உணரலாம், ஆனால் அதற்குள் காலம் கடந்துவிடுமோ என அஞ்சுகிறோம். பண்டைய காலத்தில் எந்த நாட்டுக்கும் தனித்த எல்லைகளோ, நிர்வாகமோ இல்லை என்பதை இஸ்ரேல் மறந்துவிடக் கூடாது. பாலத்தீன மக்கள் மற்றும் அவர்களின் நிலங்கள் மீதான இஸ்ரேலின் தாக்குதல் சில லட்சம் பேர் மீதானது மட்டுமல்ல. இப்போது இஸ்ரேல் இரானையும் அங்குள்ள மக்களையும் தாக்கியுள்ளது, இந்தத் தாக்குதல் இரானுக்கு மட்டும் கவலையளிக்கும் விஷயமல்ல. இந்த விவகாரம் துருக்கியை எட்டும்போது, அதன் வீச்சு மேலும் விரிவடையும்.” என தெரிவித்துள்ளார்.

மேலும் அவர், “உண்மைகளைப் புரிந்துகொள்ளாமல் இந்தப் பிராந்தியத்தில் எடுக்கப்படும் ஒவ்வொரு முடிவும் எதிர்காலத்துக்கு அழிவை விளைவிக்கக் கூடியதாக இருக்கக் கூடும். இஸ்ரேல் எவ்வளவு கொடூரமாக நடந்து கொள்கிறதோ, எவ்வளவு ரத்தம் சிந்துகிறதோ, மனிதத்துக்கு எதிராக எவ்வளவு குற்றங்களைச் செய்கிறதோ, அவ்வளவு தூரம் அது தன் இருப்பை அபாயத்துக்குட்படுத்துகிறது. முடிவில் இந்த அநீதிகளுக்காக அது வருந்தும் நிலை ஏற்படும்.” என குறிப்பிட்டுள்ளார்.

மேற்காசியாவில் துருக்கியின் நலன்களும் இரானின் நலன்களும் நீண்ட காலமாக முரண்படுகின்றன. அதேபோல், வளைகுடாவின் மற்ற இஸ்லாமிய நாடுகளுக்கிடையேயான முரண்பாடுகளும் ஆழமானவை. இந்நிலையில், இஸ்ரேலுக்கு எதிராக மதத்தின் அடிப்படையில் மட்டும் ஒன்றிணைவது, அதிலும் குறிப்பாக அமெரிக்கா இஸ்ரேலுடன் நிற்கும் போது, சாத்தியமற்றதாகவே தோன்றுகிறது.

ஆங்கில நாளிதழான ‘தி இந்து’வின் சர்வதேச விவகாரங்கள் பிரிவு ஆசிரியர் ஸ்டான்லி ஜானி, “இரான் இந்தப் போரில் தோல்வியடைந்தால், மேற்காசியாவில் இஸ்ரேலின் செல்வாக்கு மேலும் அதிகரிக்கும். சிரியாவில் பஷார் அல் அசாத் ஏற்கெனவே பதவியில் இருந்து அகற்றப்பட்டுவிட்டார். இரான் ஆதரவு பெற்ற ஆயுதக் குழுக்கள் ஏற்கெனவே பலவீனமடைந்துவிட்டன.

காஸாவை இஸ்ரேல் ஏற்கெனவே அழித்துவிட்டது. மேற்குக் கரையில் இஸ்ரேல் தனது விருப்பப்படி என்ன வேண்டுமானாலும் செய்யும். இரான் பலவீனமடைந்தால், மேற்காசியாவில் ரஷ்யாவின் எஞ்சிய செல்வாக்கும் சுருங்கிவிடும். வளைகுடாவில் உள்ள அமெரிக்கக் கூட்டாளிகளின் எண்ணெயை நம்ப வேண்டிய நிலைக்கு சீனா செல்லும்.” என எழுதியுள்ளார்.

– இது, பிபிசிக்காக கலெக்டிவ் நியூஸ்ரூம் வெளியீடு