சௌதி அரேபியாவின் குழு இரானுக்குச் சென்றிருந்தபோது, ​​இரான் அதிபர் மசூத் பெசெஷ்கியன் சௌதி அரேபியாவின் பட்டத்து இளவரசர் முகமது பின் சல்மானை தொலைபேசியில் அழைத்துப் பேசியுள்ளார்.

இந்த அழைப்பில் ஐக்கிய இஸ்லாமிய ஒத்துழைப்பு மாநாட்டை பற்றி முகமது பின்னிடம், பெசெஷ்கியன் பேசியதாக சௌதி செய்தி முகமை தெரிவித்துள்ளது.

சொல்லப்போனால், இந்த மாநாட்டில் பங்கேற்கவே அரபு மற்றும் இஸ்லாமிய நாடுகளின் தலைவர்கள் திங்கட்கிழமை அன்று சௌதி அரேபியாவின் தலைநகர் ரியாத்திற்கு வந்தடைந்தனர்.

இந்த மாநாட்டில் தற்போது காஸா மற்றும் லெபனானில் இஸ்ரேல் நடத்தி வரும் போர் குறித்து பேசப்படுகிறது.

இரானின் சார்பாக, துணை அதிபர் முகமது ரெசா ஆரிஃப் இந்த மாநாட்டில் பங்கேற்றுள்ளார். இந்த மாநாடு வெற்றிகரமாக அமையும் என அதிபர் மசூத் பெசெஷ்கியான் நம்பிக்கை தெரிவித்தார்.

சௌதி அரேபியாவின் அரசு ஊடக முகமையான வஃபா, ” பாலத்தீனம் மற்றும் லெபனான் பகுதிகளில் தற்போது இஸ்ரேல் நடத்தி வரும் மோசமான தாக்குதல் அரபு மற்றும் இஸ்லாமிய நாட்டின் தலைவர்களை உடனடியாக இந்த சந்திப்பு நடத்த கட்டாயப்படுத்தியது” என்று குறிப்பிட்டுள்ளது.

பாலத்தீனம் மற்றும் லெபனான் பகுதிகளில் இஸ்ரேல் படைகளின் தாக்குதலை நிறுத்துவது, அங்குள்ள பொதுமக்களை பாதுகாப்பது மற்றும் அந்த பிராந்தியத்தில் அமைதி மற்றும் ஸ்திரத்தன்மையை நிலைநாட்ட உலக நாடுகளுக்கு அழுத்தம் கொடுப்பது என்பதே இந்த மாநாட்டின் முக்கிய நோக்கமாகும்.