மேலும் அந்தக் கட்டுரையில், “இஸ்ரேல் மீதான தாக்குதலைவிட ஏமன், சிரியா, இராக் மற்றும் இரான் ஆகிய நாடுகளின் ஊழல் ஆட்சிகளுக்கு ஹெஸ்பொலா கொடுத்த ஆதரவு, அரபு மற்றும் இஸ்லாமிய மக்கள் மத்தியில் பெரும் தாக்கத்தை ஏற்படுத்தியுள்ளது. அதனால்தான் ஹசன் நஸ்ரல்லாவின் மரணம் அவர்களுக்கு வருத்தத்தை ஏற்படுத்தவில்லை.” என்று குறிப்பிடப்பட்டுள்ளது.

ஹெஸ்பொலா லெபனானில் மிகவும் சக்திவாய்ந்த அமைப்பு மட்டுமல்ல, தெற்காசியாவில் ஒரு புரட்சிகர பார்வையையும் கொண்டுள்ளது. இந்தக் கண்ணோட்டம் சௌதி அரேபியா மற்றும் பிற வளைகுடா நாடுகளில் இருந்து முரண்பட்டது.

கடந்த 2016ஆம் ஆண்டில், வளைகுடா ஒத்துழைப்பு கவுன்சில் (ஜிசிசி) ஹெஸ்பொலாவை ‘தீவிரவாத அமைப்பாக’ அறிவித்தது.

அதே நேரத்தில், ஹெஸ்பொலாவின் தலைமை, ஐஎஸ்(IS)-இன் எழுச்சிக்கு சௌதி அரேபியாவை குற்றம் சாட்டியது. சௌதி அரேபியா பிராந்தியத்தில் மத மோதல்களை ஊக்குவிப்பதாகவும் அது குற்றம் சாட்டி வருகிறது.

அரபு நாடுகளில் மாறி வரும் சமன்பாடுகளுக்கு மத்தியில், ஹெஸ்பொலா மற்றும் சௌதி அரேபியா உட்பட சன்னி பெரும்பான்மை நாடுகளுக்கு இடையிலான உறவுகள் எவ்வாறு இருக்கும் என்ற கேள்வி எழுந்துள்ளது.

ஐக்கிய அரபு எமிரேட்ஸ் மற்றும் பஹ்ரைன் இஸ்ரேலுடன் ராஜ்ஜீய உறவுகளை ஏற்படுத்தின. அதன் பிறகு, சூடானும் மொராக்கோவும் இஸ்ரேலுடன் ராஜ்ஜிய உறவுகளை ஏற்படுத்த முடிவு செய்தன. சூடானும் மொராக்கோவும் முஸ்லிம் பெரும்பான்மை நாடுகள்.

சௌதி அரேபியா மீதும் இதேபோன்ற அழுத்தம் இருந்தது. ஆனால் சௌதி அரேபியா அவ்வாறு செய்யவில்லை. பாலத்தீனம் 1967இல் இருந்த எல்லையின் கீழ் சுதந்திர நாடாகும் வரை இஸ்ரேலுடன் முறையான உறவை ஏற்படுத்த மாட்டோம் என்று கூறியது. சௌதி அரேபியாவும் கிழக்கு ஜெருசலேமை பாலத்தீனத்தின் தலைநகராகக் கோருகிறது.

ஐக்கிய அரபு எமிரேட்ஸ் மற்றும் பஹ்ரைன் ஏன் இஸ்ரேலுடன் ராஜ்ஜீய உறவுகளை ஏற்படுத்தினார்கள் என்று துருக்கி விமர்சித்தது. ஆனால், துருக்கி இஸ்ரேலுடன் ராஜ்ஜீய உறவுகளை வைத்துள்ளது. துருக்கியும் இஸ்ரேலும் 1949 முதல் ராஜ்ஜீய உறவுகளைக் கொண்டுள்ளன. துருக்கிதான் இஸ்ரேலை அங்கீகரித்த முதல் முஸ்லிம் பெரும்பான்மை நாடு.

கடந்த 2005இல் கூட, துருக்கி அதிபர் எர்துவான் ஒரு பெரிய வணிகக் குழுவுடன் இரண்டு நாள் பயணமாக இஸ்ரேலுக்கு சென்றார். இந்த சுற்றுப் பயணத்தின்போது, ​​அப்போதைய இஸ்ரேல் பிரதமர் ஏரியல் ஷரோனை சந்தித்துப் பேசிய அவர், இரானின் அணுசக்தித் திட்டம் இஸ்ரேலுக்கு மட்டுமின்றி, முழு உலகிற்கும் அச்சுறுத்தலாக உள்ளதாகக் கூறினார்.

சௌதி அரேபியாவுக்கும் ஹமாஸுக்கும் இடையிலான உறவுகளும் ஏற்றத் தாழ்வுகள் நிறைந்தவை. 1980களில் உருவானதில் இருந்து, ஹமாஸ் பல ஆண்டுகளாக சௌதி அரேபியாவுடன் நல்லுறவைக் கொண்டுள்ளது. 2019ஆம் ஆண்டில், பல ஹமாஸ் ஆதரவாளர்கள் சௌதி அரேபியாவில் கைது செய்யப்பட்டனர்.

இது குறித்து ஹமாஸ், சௌதி அரேபியாவுக்கு கண்டனம் தெரிவித்து அறிக்கை வெளியிட்டிருந்தது. சௌதியில் தனது ஆதரவாளர்கள் சித்திரவதை செய்யப்படுவதாக ஹமாஸ் குற்றம் சாட்டியிருந்தது. 2000களில் இரானுடனான ஹமாஸின் நெருக்கம் அதிகரிக்கத் தொடங்கியது.

-இது, பிபிசிக்காக கலெக்டிவ் நியூஸ்ரூம் வெளியீடு