கேரளாவில் ஒரு சரக்கு கப்பலில் தீ விபத்து ஏற்பட்டதால் அதில் இருந்த சில கண்டெய்னர்கள் வெடித்து சிதறின என்றும் அப்போது உயிர் தப்பிக்க கப்பலில் இருந்து கடலில் குதித்த 4 பேரை காணவில்லை என்றும் தினத்தந்தி நாளிதழின் செய்தி கூறுகிறது.

அந்தச் செய்தியின்படி, இலங்கை தலைநகர் கொழும்புவில் இருந்து மும்பை நோக்கி சரக்கு கப்பல் கடலில் நேற்று சென்று கொண்டிருந்தது. அந்த கப்பலில் சிங்கப்பூர் கொடி கட்டப்பட்டு இருந்தது.

கேரள மாநிலம் கண்ணூர் மாவட்டம் அழிக்கல் கடற்கரை அருகே நடுக்கடலில் கப்பல் சென்று கொண்டிருந்தது. அப்போது, திடீரென கப்பலின் ஒரு பகுதியில் தீப்பிடித்து எரிந்தது. இந்த தீ மளமளவென பரவியது.

இதனால் கப்பலில் இருந்து அதிக அளவில் கரும்புகை கிளம்பியது. தொடர்ந்து கண்டெய்னர்களுக்கும் இந்த தீ பரவியதால் அவற்றில் சில பயங்கர சத்தத்துடன் வெடித்து சிதறின. இதன்காரணமாக கப்பலில் இருந்த கேப்டன் உள்பட 22 பேர் செய்வது அறியாமல் திகைத்தனர். தீ பரவி கொண்டே இருந்ததால், உயிர் தப்பினால் போதும் என கருதி, 20 பேர் கப்பலில் இருந்து கடலில் குதித்தனர்.

கப்பல் தீ விபத்து குறித்து தகவல் அறிந்ததும் கண்ணூர் அழிக்கல் துறைமுகத்தில் இருந்து கடல் எல்லை பாதுகாப்பு படையினர் சம்பவ பகுதிக்கு விரைந்து சென்றனர். அவர்கள் அங்கு விமானங்கள் மூலம் உடனடியாக மீட்பு பணியில் ஈடுபட்டனர்.

தீ விபத்தில் 5 பேர் படுகாயம் அடைந்ததாக தெரிகிறது. கடலில் குதித்த 20 பேரில் 4 பேரை காணவில்லை. மற்றவர்களை மீட்கும் பணி தொடர்ந்து நடந்து வருகிறது.

கப்பலில் கேப்டன், தலைமை பொறியாளர் மட்டும் உள்ளனர். கப்பலில் இருந்து கடலில் குதித்தவர்களை படகுகள் மூலம் மீட்கும் பணி தொடர்ந்து நடைபெற்று வருகிறது. கப்பலில் மொத்தம் 650 கன்டெய்னர்கள் இருந்தன. அதில் 20 கன்டெய்னர்கள் கடலுக்குள் விழுந்தது.

அதில் என்ன உள்ளது? என்பது தெரியவில்லை. தீ விபத்துக்கான காரணம் தெரியவில்லை. கடலோர காவல்படையினர் விசாரித்து வருகின்றனர். மேலும் கப்பலில் எரியும் தீயை அணைக்கும் பணியில் கடல் எல்லை பாதுகாப்பு படையை சேர்ந்த 4 கப்பல்கள், டிரோன்கள் ஈடுபடுத்தப்பட்டு உள்ளது என்று அந்தச் செய்தி குறிப்பிடுகிறது.

– இது, பிபிசிக்காக கலெக்டிவ் நியூஸ்ரூம் வெளியீடு