இந்நிலையில், ஜகபர் அலியின் உடல், முறையாக பிரேத பரிசோதனை செய்யப்படவில்லை என்றும், விபத்துk காயம் ஏற்பட்டதை உறுதி செய்யும் வகையில் எக்ஸ்ரே எடுக்கப்படவில்லை என்பதால் மீண்டும் உடலைt தோண்டியெடுத்து பிரேத பரிசோதனை செய்ய வேண்டும் என்றும் ஜகபர் அலியின் மனைவி மரியம், உயர்நீதிமன்ற மதுரைக் கிளையில் மனு தாக்கல் செய்ததாக இந்து தமிழ் செய்தி கூறுகிறது.

“இந்த வழக்கில் நீதிமன்றத்தின் உத்தரவைத் தொடர்ந்து, வெங்களூரில் அடக்கம் செய்யப்பட்ட ஜகபர் அலியின் உடல் திருமயம் வட்டாட்சியர் ராமசாமி முன்னிலையில் நேற்று பிற்பகல் தோண்டி எடுக்கப்பட்டது.

புதுக்கோட்டை அரசு மருத்துவக் கல்லூரி மருத்துவர்கள் மதன்ராஜ், நெடுங்கிள்ளி ஆகியோர் தலைமையான மருத்துவக் குழுவினர் ஜகபர் அலியின் உடலின் பல்வேறு இடங்களில் எக்ஸ்ரே எடுத்தனர். அப்போது, சிபிசிஐடி டிஎஸ்பி இளங்கோவன் ஜென்னிங்ஸ், ஆய்வாளர் புவனேஸ்வரி உள்ளிட்டோர் உடனிருந்தனர்.

நீதிமன்ற உத்தரவின் அடிப்படையில், சம்பவ இடத்தை யாரும் பார்க்க முடியாத வகையில் அடைக்கப்பட்டு இருந்தது. காவல்துறை சார்பில் மட்டுமே வீடியோ, புகைப்படம் எடுக்கப்பட்டது. வேறு யாரும் எடுக்கத் தடை விதிக்கப்பட்டது,” என்று அந்தச் செய்தியில் கூறப்பட்டுள்ளது.

இந்தப் புதிய ஆண்டில் அனுஷ்டானங்கள் மேற்கொள்ளப்பட இருப்பதால் அரிசித் தட்டுப்பாட்டை நீக்க நடவடிக்கை எடுக்க வேண்டும், நுகர்வோருக்கு மலிவு விலையில் அரிசி வழங்கும் வேலைத் திட்டத்தை வகுக்க வேண்டும் என்று எதிர்க்கட்சி தலைவர் சஜித் பிரேமதாச தெரிவித்துள்ளதாக, வீரகேசரி இணையதளம் செய்தி வெளியிட்டுள்ளது.

காலியில் நடைபெற்ற நிகழ்வொன்றில் கலந்துகொண்டு உரையாற்றிய போது இதைத் தெரிவித்த அவர், “தற்போது ஏற்பட்டுள்ள அரிசித் தட்டுப்பாட்டால் மக்கள் அசௌகரியமடைந்துள்ளனர். புதிய ஆண்டின் காலப்பகுதியில் அனுஷ்டானங்கள் மேற்கொள்ளப்படவுள்ளதால் அரிசித் தட்டுப்பாட்டை நீக்க நடவடிக்கை எடுக்க வேண்டும். நுகர்வோருக்கு மலிவு விலையில் அரிசி வழங்கும் வேலைத் திட்டத்தை வகுக்க வேண்டும்” என்று கூறியுள்ளதாக அந்தச் செய்தி கூறுகிறது.