ஞாயிற்றுக்கிழமை நாடு கடத்தப்பட்ட 54 பேரில், ஹரியாணாவின் கைத்தால் மாவட்டத்தில் உள்ள 15 ஆண்களை பிபிசி பஞ்சாபி சந்தித்தது. அவர்கள் இப்போது தங்கள் எதிர்காலம் நிச்சயமற்ற நிலையில் இருப்பதாகக் கூறுகின்றனர்.

நான்கு ஆண்டுகளுக்கு முன்பு அமெரிக்கா செல்ல 3.5 மில்லியன் ரூபாய் செலவிட்ட விவசாயி ஹர்ஜிந்தர் சிங், அங்கு சமையல்காரராகப் பணிபுரிந்ததாக கூறுகிறார் – வீட்டில் உள்ள தன் குழந்தைகளைக் காப்பாற்ற அவர் அந்த வேலையைச் செய்தார்.

“என் நம்பிக்கைகள் தகர்ந்துவிட்டன, என்னால் எதுவும் செய்ய முடியவில்லை” என்று சிங் கூறினார். மேலும், நாடு கடத்தும் நடைமுறையின்போது தான் அனுபவித்த அவமானத்தை மறக்க முடியாது என்றும் அவர் கூறினார்.

அவரது சேமிப்புகள் அனைத்தும் போய்விட்ட நிலையில், அவர் தனது குழந்தைகளின் எதிர்காலம் குறித்து கவலைப்படுகிறார்.

நாடு கடத்தப்பட்ட மற்றொருவரான நரேஷ் குமார், நிலத்தை விற்று, அமெரிக்காவிற்கு அழைத்துச் செல்வதாக உறுதியளித்த தரகர்களுக்கு 5.7 மில்லியன் ரூபாய் கொடுத்ததாக கூறினார்.

அவர் ஜனவரி 2024 இல் பிரேசிலுக்குப் புறப்பட்டார், அங்கிருந்து அமெரிக்காவிற்குப் பயணம் செய்தார். “நான் வழியில் இருந்தபோது என் உறவினர்கள் எனக்கு அவ்வப்போது பணம் கொடுத்துக் கொண்டிருந்தனர்,” என்று குமார் கூறினார்.

ஆனால் அவர் அங்கு ஒரு புதிய வாழ்க்கையைத் தொடங்குவதற்கு முன்பே, நாட்டிற்குள் சட்டவிரோதமாக நுழைந்ததற்காக கைது செய்யப்பட்டார். “நான் 14 மாதங்கள் சிறையில் இருந்தேன், பின்னர் அவர்கள் என்னை இந்தியாவிற்கு அனுப்பி வைத்தனர்.”

இது குறித்து கருத்து தெரிவிக்குமாறு அமெரிக்கக் குடியேற்றம் மற்றும் சுங்க அமலாக்கத் துறையை(ICE) பிபிசி பஞ்சாபி அணுகியுள்ளது.

இதற்கிடையில், பனமா வழியாக அமெரிக்காவை அடைந்த கர்னால் மாவட்டத்தைச் சேர்ந்த ரஜத் பால், தனது பயணத்தை “மிகவும் ஆபத்தானது” என்று விவரித்தார்.

அவர் மே 2024 இல் தனது வீட்டை விட்டு வெளியேறினார், மேலும் சில மாதங்களுக்குப் பிறகு டிசம்பர் மாதத்தில்தான் தனது இலக்கை அடைய முடிந்தது என்று அவர் கூறினார்.

அவர் எப்படிப் பயணம் செய்தார் என்பது தெளிவாகத் தெரியவில்லை. ஆனால், இத்தகைய வழித்தடங்களைப் பயன்படுத்தும் பலர், பேருந்துகள் முதல் படகுகள் வரை பல போக்குவரத்து முறைகளை மேற்கொள்ள வேண்டியுள்ளது.

நாடு கடத்தப்பட்ட எவரும் இந்த பயணங்களை ஏற்பாடு செய்த தரகர்களுக்கு எதிராக முறைப்படி புகார் அளிக்கவில்லை என்று கைத்தாலில் உள்ள ஒரு மூத்த காவல்துறை அதிகாரி கூறினார். இருப்பினும், “புகார் கிடைத்தவுடன் நடவடிக்கை எடுக்கப்படும்,” என்றும் அவர் தெரிவித்தார்.

பாதுகாப்பான மற்றும் சட்டப்பூர்வமான குடியேற்றம் குறித்து விழிப்புணர்வை ஏற்படுத்தத் தொடர்ச்சியான முயற்சிகள் எடுக்கப்பட்டு வருவதாக இந்திய அரசு முன்னர் கூறியது.

இந்திய வெளியுறவு அமைச்சகத்தின்படி, ஜனவரி மற்றும் செப்டம்பர் 2025-க்கு இடைப்பட்ட காலத்தில் சுமார் 2,417 இந்தியர்கள் அமெரிக்காவிலிருந்து நாடு கடத்தப்பட்டனர்.

இந்த ஆண்டு தொடக்கத்தில், முப்பது ஆண்டுகளாக அமெரிக்காவில் வாழ்ந்த 73 வயதான ஹர்ஜித் கவுர் நாடு கடத்தப்பட்டது, அமெரிக்காவில் உள்ள சீக்கிய சமூகத்தினர் மத்தியில் கோபத்தை ஏற்படுத்தியது.

பிப்ரவரியில், 100-க்கும் மேற்பட்ட இந்தியக் குடிமக்கள் அமெரிக்க ராணுவ விமானத்தில் திருப்பி அனுப்பப்பட்டனர். 40 மணி நேர விமான பயண நேரம் முழுவதும் விலங்கிடப்பட்டிருந்ததாக நாடு கடத்தப்பட்டவர்களில் ஒருவர் பிபிசியிடம் கூறியது விமர்சனத்தைத் தூண்டியது.

ஆனால் இந்த அமளிக்குப் பிறகு, இந்தியாவிற்கு நாடு கடத்தும் விமானங்கள் பல ஆண்டுகளாக வந்துகொண்டிருக்கின்றன என்றும் அமெரிக்க நடைமுறைகள் விலங்குகளைப் பயன்படுத்த அனுமதிக்கின்றன என்று இந்திய வெளியுறவு அமைச்சர் எஸ் ஜெய்சங்கர் தெரிவித்தார்.

2022-ஆம் ஆண்டு நிலவரப்படி, சுமார் 7,25,000 ஆவணமற்ற இந்தியக் குடியேறிகள் அமெரிக்காவில் இருந்ததாகப் பியூ ரிசர்ச் சென்டரின் தரவுகள் தெரிவிக்கின்றன. இது மெக்சிகோ மற்றும் எல் சால்வடாரில் இருந்து வருபவர்களுக்குப் பிறகு மூன்றாவது பெரிய குழுவாக அவர்களை ஆக்குகிறது.

– இது, பிபிசிக்காக கலெக்டிவ் நியூஸ்ரூம் வெளியீடு