0

தமிழ் திரையுலகில் சந்தை மதிப்புள்ள நட்சத்திர நடிகராக அவதாரம் எடுத்திருக்கும் நடிகர் கவின் கதையின் நாயகனாக நடித்து , எதிர்வரும் தீபாவளி திருநாளன்று உலகம் முழுவதும் பட மாளிகையில் வெளியாகும் ‘பிளடி பெக்கர்’ எனும் திரைப்படத்தினை விளம்பரப்படுத்தவும், ரசிகர்களின் கவனத்தை கவரவும் , ‘பெக்கர்வாலா’ எனும் பெயரில் மியூசிக் வீடியோ ஒன்றை படக்குழுவினர் உருவாக்கி வெளியிட்டுள்ளனர்.

அறிமுக இயக்குநர் சிவபாலன் முத்துக்குமார் இயக்கத்தில் உருவாகி இருக்கும் ‘பிளடி பெக்கர் ‘ எனும் திரைப்படத்தில் கவின், ரெடின் கிங்ஸ்லி, மாருதி பிரகாஷ்ராஜ், சுனில் சுஹாதா, டி எம் கார்த்திக் , அக்ஷயா ஹரிஹரன், பிரியதர்ஷினி ராஜ்குமார் உள்ளிட்ட பலர் நடித்திருக்கிறார்கள். சுஜித் சாரங் ஒளிப்பதிவு செய்திருக்கும் இந்த திரைப்படத்திற்கு ஜென் மார்ட்டின் இசையமைத்திருக்கிறார் இந்த திரைப்படத்தை பிளமென்ட் பிக்சர்ஸ் நிறுவனம் சார்பில் இயக்குநர் நெல்சன் திலிப் குமார் தயாரித்திருக்கிறார்.

சிவகார்த்திகேயனின் ‘அமரன்’ , ஜெயம் ரவியின் ‘பிரதர்’ என தீபாவளிக்கு வெளியாகும் இரண்டு திரைப்படங்களிலும் நட்சத்திர நடிகர்கள் நடித்திருப்பதாலும், முன்னணி பட தயாரிப்பு நிறுவனங்கள் தயாரித்திருப்பதாலும் , அப்படத்தினை ரசிகர்களுக்கு சென்றடையச் செய்ய தயாரிப்பு நிறுவனம் பல வழிகளில் ஈடுபட்டிருக்கிறது.

இந்நிலையில் புதிய நட்சத்திரமாக உருவெடுத்து வரும் கவின் நடிப்பில் தயாராகி இருக்கும் ‘பிளடி பெக்கர் ‘ எனும் திரைப்படமும் தீபாவளி திருநாளன்று வெளியாகிறது. இந்த படத்தையும் ரசிகர்களை சென்றடைய செய்வதற்காக படக் குழுவினர் பல்வேறு வகையினதான கவன ஈர்ப்பு விளம்பர பணிகளில் ஈடுபட்டு வருகிறார்கள் .

இதனைத் தொடர்ந்து ‘பெக்கர்வாலா ‘ எனும் பெயரில் பாடல் ஒன்றை உருவாக்கி , அதனை நடனத்துடன் படமாக்கி வெளியிட்டுள்ளனர்.  இந்த பாடலை பாடலாசிரியர் விஷ்ணு எடவன் மற்றும் ஏ ஆர் ஆஷிக் ஆகியோர் இணைந்து எழுதி இருக்க , பின்னணி பாடகர்கள் அந்தோணி தாசன்- ஜென் மார்டின் மற்றும் பாடகி முத்துலட்சுமி ஆகியோர் இணைந்து பாடியிருக்கிறார்கள். இந்த பாடலுக்கு கவின் உள்ளிட்ட நட்சத்திரங்கள் நடனமாடி இருக்கிறார்கள். படத்தில் இடம்பெறாத இந்தப் பாடலும் துள்ளலிசை பாணியில் அமைந்திருப்பதால் இசை ரசிகர்களிடம் வரவேற்பை பெற்று வருகிறது .