இதுபற்றி விளக்கமளித்த கேரள உள்ளாட்சி மற்றும் கலால் துறை அமைச்சர் ராஜேஷ், வேளாண் சார்ந்த பொருட்களை மூலப்பொருட்களாகப் பயன்படுத்தும் வகை-1 தொழிற்சாலையைத் தொடங்குவதற்கான விண்ணப்பத்தை உள்ளாட்சி அமைப்புகள் முற்றிலுமாக நிராகரிக்க முடியாது என்பதன் அடிப்படையில் அனுமதி வழங்கப்பட்டதாகத் தெரிவித்திருந்தார்.

மழைநீர் சேகரிப்பு மூலம் தொழில்துறை நோக்கங்களுக்காக கேரள தொழில்துறை உள்கட்டமைப்பு மேம்பாட்டுக் கழகத்திற்கு (கின்ஃப்ரா) ஏற்கெனவே 10 மில்லியன் லிட்டர் தண்ணீர், அணையிலிருந்து விநியோகிக்கப்பட்டு வருவதாகக் கூறிய அவர், இந்த ஒப்பந்தம் 2015 ஆம் ஆண்டு முன்னாள் முதலமைச்சர் உம்மன் சாண்டியின் காங்கிரஸ் ஆட்சிக் காலத்தில் செய்யப்பட்டதாக தெரிவித்தார். மற்ற தொழில்களைப் போலவே ஓயாசிஸ் நிறுவனமும் அதன் பங்கைப் பெறும் என்று அவர் விளக்கம் அளித்திருந்தார்.

மழைநீர் சேகரிப்பு கட்டமைப்பை உருவாக்கி, அதிலிருந்து தினமும் 5 லட்சம் லிட்டர் தண்ணீரை எடுக்கவே அனுமதியளிக்கப்பட்டுள்ளதாக அமைச்சர் கூறியுள்ளார். ஆனால், கொகோ கோலா ஆலைக்கு எதிராக நீர் சுரண்டல் என்று போராடியவர்கள், இப்போது மதுபான உற்பத்தி நிறுவனத்தை ஆதரிப்பதாக காங்கிரஸின் ரமேஷ் சென்னிதாலா குற்றம்சாட்டியிருந்தார். இதே குற்றச்சாட்டை முன்வைத்து பாஜகவும் பரப்புரை மேற்கொண்டு வருகிறது.

”இதே பாலக்காடு மாவட்டத்தில் முன்பு பெப்சி நிறுவனம் இருந்தபோது, நிலத்தடி நீரை அதிகமாக உறிஞ்சியதால் நிலத்தடி நீர் மட்டம் அதல பாதாளத்துக்குப் போனது. அப்போது வறட்சி மிகுந்த பகுதியில் இந்த தொழிற்சாலை வேண்டாமென்று போராடிய ராஜேஷ், இப்போது அதே பாலக்காட்டில் மது தொழிற்சாலைக்குத் தண்ணீர் எடுக்க அனுமதிப்பதிலிருந்தே இதில் ஊழல் நடந்திருப்பது புரிகிறது.” என்று பிபிசி தமிழிடம் பாரதிய ஜனதா கட்சியின் பாலக்காடு மாவட்டத் தலைவர் பிரசாந்த் சிவன் குற்றம்சாட்டினார்.

இதுபற்றி செய்தியாளர்களிடம் பேசிய கேரள எதிர்க்கட்சித் தலைவர் சதீசன், ”ஓயாசிஸ் நிறுவனத்துக்கு ஒப்புதல் வழங்கும் முன், நிதி, நீர்வளம், தொழில் மற்றும் உள்ளாட்சி போன்ற துறைகளிடமிருந்து எந்த ஆலோசனையும், அனுமதியும் பெறப்படவில்லை. எதுவுமே பெறாமல் அமைச்சரவையால் முன் அனுமதி வழங்கப்பட்டுள்ளது.” என்று குறை கூறியதுடன், அதற்கான ஆதாரமாக அமைச்சரவை குறிப்பையும் காண்பித்தார்.

கூட்டணிக் கட்சியான இந்திய கம்யூனிஸ்ட் கட்சி எதிர்த்தும், அமைச்சரவை இதற்கு அனுமதி வழங்கியதில் இருந்தே ஊழல் நடந்திருப்பது உறுதியாகியுள்ளதாக சதீசன் கூறியுள்ளார்.

இதை மறுத்துள்ள அமைச்சர் ராஜேஷ், ”கேரளாவுக்கு ஆண்டுதோறும் 9.21 கோடி லிட்டர் கூடுதல் நியூட்ரல் ஆல்கஹாலும், 30.26 கோடி லிட்டர் எத்தனாலும் பல மாநிலங்களிலிருந்து வாங்கப்படுகிறது. 2030-ஆம் ஆண்டுக்குள் இந்த எத்தனால் அளவு 75 கோடி லிட்டரை எட்டும். அதன் மதிப்பு ரூ.600–ரூ.1,000 கோடி வரை உயரும். அதனை கொண்டு வருவதற்கான போக்குவரத்து செலவு இதில் சேர்க்கப்படவில்லை.” என்று தெரிவித்துள்ளார்.

கேரளாவில் ஸ்பிரிட் உற்பத்தி செய்து மதுபானங்களை ஏற்றுமதி செய்வதும், அதிக வேலைவாய்ப்புகளை உருவாக்குவதுமே அரசின் குறிக்கோள் என்று கூறியுள்ள அமைச்சர் ராஜேஷ், இந்த தொழிற்சாலையால் கேரள அரசுக்கு 100 கோடி ரூபாய் ஜிஎஸ்டி வருவாய் கிடைக்குமென்றும் நம்பிக்கையை வெளிப்படுத்தியுள்ளார்.