வாஷிங்டனில், மகிழ்ச்சியாகத் தோன்றிய பெஞ்சமின் நெதன்யாகு முன்னிலையில், டிரம்ப் இதைச் சொன்ன விதத்தில் இருந்து, இது நடக்க வாய்ப்பில்லை என்பது புரிகிறது. அப்படியிருக்க இதைப் பற்றி ஏன் கவலைப்பட வேண்டும்?

டிரம்பின் கருத்துகள் எவ்வளவு விசித்திரமாக இருந்தாலும், அவை விளைவுகளை ஏற்படுத்தும் என்பதுதான் இந்தக் கேள்விக்கான பதில்.

ஏனென்றால் டிரம்ப் இப்போது உலகின் மிக சக்திவாய்ந்த நபரான, அமெரிக்காவின் அதிபராக உள்ளார். அவர் இனி ஒரு ரியாலிட்டி நிகழ்ச்சித் தொகுப்பாளரோ அல்லது தலைப்புச் செய்திகளில் இடம் பிடிக்க முயலும் அரசியல்வாதியோ அல்ல.

டிரம்பின் அதிர்ச்சியூட்டும் அறிவிப்புக்குப் பிறகு விரைவாக ஏற்படக் கூடிய விளைவுகளால், ஏற்கெனவே காஸாவில் ஏற்படுத்தப்பட்டுள்ள பலவீனமான போர்நிறுத்தம் சீர்குலைந்து பலவீனமடையக்கூடும்.

இது “போர் நிறுத்தத்தின் முடிவாக இருக்கலாம்” என்று அரபு வட்டாரத்தைச் சேர்ந்த ஒரு மூத்த நபர் என்னிடம் தெரிவித்தார்.

அது மட்டுமின்றி, எதிர்காலத்தில் காஸா எவ்வாறு ஆளப்படும் என்பதற்கான தெளிவான திட்டம் இல்லாததும், போர் நிறுத்த ஒப்பந்தத்தின் பலவீனமான புள்ளியாக உள்ளது.

இதனிடையில், தற்போது டிரம்ப் ஒரு திட்டத்தை வழங்கியுள்ளார். அது நிறைவேறாவிட்டாலும்கூட, பாலத்தீனர்கள் மற்றும் இஸ்ரேலியர்களின் மனதில் மிகப்பெரிய தாக்கத்தை ஏற்படுத்துகிறது.

மத்திய தரைக் கடலுக்கும் ஜோர்டான் நதிக்கும் இடையிலான அனைத்து நிலங்களும், ஒருவேளை அதற்கு அப்பால் உள்ள பகுதிகளும், கடவுள் கொடுத்த யூத உடைமை என்று நம்பும் தீவிர தேசியவாத யூத கடும்போக்குவாதிகளின் திட்டங்களையும் கனவுகளையும் இத்திட்டம் வளர்க்கும்.

மறுபுறம், இந்தத் தீவிர தேசியவாத யூத கடும்போக்குவாதிகளின் தலைவர்கள், நெதன்யாகு அரசின் ஒரு பகுதியாக உள்ளனர். அவரை அதிகாரத்தில் வைத்திருக்க அவர்கள் உதவுகிறார்கள். தற்போதைய சூழ்நிலையில் அவர்கள் மகிழ்ச்சி அடைந்துள்ளனர்.

இறுதியில் பாலத்தீன மக்களை அகற்றிவிட்டு அவர்களுக்கு பதிலாக யூத மக்களைக் கொண்டு வர முடியும் என்ற நோக்கத்தோடு, காஸா யுத்தம் தொடர வேண்டும் என்றும் அவர்கள் விரும்புகிறார்கள்.

மேலும், அக்டோபர் 7ஆம் தேதி நடந்த தாக்குதலுக்குப் பிறகு, காஸாவின் எதிர்காலத்திற்கான தீர்வை டிரம்பின் திட்டம் வழங்கியதாக நிதி அமைச்சர் பெசலெல் ஸ்மோட்ரிச் தெரிவித்துள்ளார்.

“எங்கள் நிலத்தில் மிகக் கொடூரமான படுகொலைகளை யார் செய்தாலும் அவர்கள் தங்கள் நிலத்தை நிரந்தரமாக இழக்க நேரிடும். இப்போது கடவுளின் உதவியுடன் பாலத்தீன நாடு என்ற ஆபத்தான யோசனையை முற்றிலுமாக அகற்ற நாங்கள் நடவடிக்கை எடுப்போம்” என்று அவரது அறிக்கை கூறுகிறது.

இஸ்ரேலில் உள்ள மையவாத எதிர்க்கட்சித் தலைவர்கள் இந்தத் திட்டம் குறித்துப் பெரிதாக ஆர்வமின்றிக் காணப்படுகின்றனர். ஒருவேளை எதிர்காலத்தில் பிரச்னை ஏற்படலாம் என அவர்கள் அஞ்சுகிறார்கள். ஆனாலும், இந்தத் திட்டத்திற்கு ஒரு கண்ணியமான வரவேற்பை அளித்துள்ளனர் என்பதும் குறிப்பிடத்தக்கது.

மறுபுறம், ஹமாஸ் மற்றும் பிற பாலத்தீன ஆயுதக் குழுக்கள் இஸ்ரேலுக்கு எதிராக ஒருவித பலத்தை வெளிப்படுத்தி, டிரம்புக்கு பதிலளிக்க வேண்டிய அவசியத்தை உணரலாம்.

பாலத்தீனர்களைப் பொறுத்தவரை, இஸ்ரேலுடனான மோதல் என்பது, சொத்துகளை அப்புறப்படுத்துதல் மற்றும் அவர்கள் அல்-நக்பா என்று அழைப்பதன் நினைவால், அதாவது “பேரழிவு” என்று அழைப்பதன் காரணமாக ஏற்படுகிறது.

கடந்த 1948இல் இஸ்ரேல் தனது சுதந்திரப் போரில் வெற்றி பெற்றபோது பாலத்தீனர்கள் பெருமளவில் வெளியேறியதை இது குறிக்கிறது. 1948ஆம் ஆண்டு நடந்த போரின்போது, 700,000க்கும் மேற்பட்ட பாலத்தீனர்கள் வெளியேறினர் அல்லது தங்கள் வீடுகளை விட்டு வெளியேற இஸ்ரேலிய படைகளால் கட்டாயப்படுத்தப்பட்டனர்.

ஒரு சிலரைத் தவிர மற்ற அனைவரும் ஒருபோதும் திரும்பிச் செல்ல அனுமதிக்கப்படவில்லை. மேலும் இஸ்ரேல் அவர்களின் சொத்துகளைக் கைப்பற்ற சட்டங்களை இயற்றியது. எனவே, அதேபோன்று இப்போதும் நடக்கலாம் என்ற பயம் ஏற்படும்.

காஸாவை அழித்து மக்களை வெளியேற்ற, இஸ்ரேல் ஹமாஸுக்கு எதிரான போரைப் பயன்படுத்துகிறது என்று பல பாலத்தீனர்கள் ஏற்கெனவே நம்பினர் என்பதும் குறிப்பிடத்தக்கது.

ஏனென்றால், இஸ்ரேல் இனப்படுகொலை செய்ததாக பாலத்தீனர்கள் குற்றம் சாட்டுகிறார்கள். அவர்கள் இப்போது டொனால்ட் டிரம்ப் இஸ்ரேலின் நடவடிக்கைகளை ஆதரிக்கிறார் என்று அவர்கள் நம்பலாம்.