சென்னையில் உள்ள நடிகர் சிவாஜி கணேசனின் ‘அன்னை இல்லம்’ என்ற வீட்டின் ஒரு பகுதியை ஜப்தி செய்ய சென்னை உயர்நீதிமன்றம் உத்தரவிட்டுள்ளது என தி டைம்ஸ் ஆப் இந்தியா ஆங்கில நாளிதழ் செய்தி வெளியிட்டுள்ளது.

அந்த செய்தியில், ” ‘ஜெகஜால கில்லாடி’ என்ற திரைப்படத்தின் தயாரிப்புக்காக சிவாஜி கணேசனின் பேரனான நடிகர் துஷ்யந்த் ராம்குமாரின் ஈசன் தயாரிப்புகள் என்ற நிறுவனம் வாங்கிய 3.74 கோடி ரூபாய் கடனுக்காக வீட்டை ஜப்தி செய்யும் உத்தரவை நீதிமன்றம் பிறப்பித்துள்ளது.

தனபாக்கியம் எண்டர்பிரைசஸ் என்ற நிறுவனத்திடமிருந்து இந்த கடனை வாங்கும் போது, ஆண்டுக்கு 30% வட்டியுடன் திருப்பி தருவதாக உறுதியளிக்கப்பட்டது. கடன் தொகையை திருப்பித் தராததால் ஓய்வுபெற்ற நீதிபதி ரவீந்திரன் மத்தியஸ்தராக நியமிக்கப்பட்டிருந்தார். கடன் தொகை வட்டியுடன் 9.39 கோடி ரூபாய் வசூலிக்க ஏதுவாக ‘ஜெகஜால கில்லாடி’ படத்தின் அனைத்து உரிமைகளையும் தனபாக்கியம் எண்டர்பிரைசஸ் நிறுவனத்திற்கு ஒப்படைக்கும்படி 2024 ஆம் ஆண்டு மே மாதம் உத்தரவு பிறப்பித்திருந்தார்.

இந்த உரிமைகளை பெற்றுக் கொண்டு கடன் தொகையை ஈடு செய்ய வேண்டும் மீதி தொகையை ஈசன் ப்ரொடக்சன் நிறுவனத்திடமே வழங்க வேண்டும் எனவும் மத்தியஸ்தர் தெரிவித்திருந்தார். இந்த உத்தரவின் படி இந்த படத்தின் அனைத்து உரிமைகளையும் கேட்ட பொழுது படம் இன்னும் முடிவடையவில்லை என ஈசன் ப்ரொடக்சன் நிறுவனம் எதிர்ப்பு தெரிவித்தது.

திரைப்படத் தயாரிப்புக்காக வாங்கிய கடனை துஷ்யந்த திருப்பி செலுத்தவில்லை. எனவே ஆண்டுக்கு வட்டியுடன் சேர்த்து ரூ.9.39 கோடி செலுத்த வேண்டும் என்று கடன் கொடுத்த தனபாக்கியம் நிறுவனம் சென்னை உயர்நீதிமன்றத்தில் வழக்கு தொடர்ந்தது.

இந்நிலையில் மத்தியஸ்தர் பிறப்பித்த உத்தரவை அமல்படுத்தும் வகையில் சிவாஜி கணேசன் வீட்டை ஜப்தி செய்ய வேண்டும் என தனபாக்கியம் எண்டர்பிரைசஸ் நிறுவனம் சார்பில் உயர்நீதிமன்றத்தில் வழக்கு தாக்கல் செய்யப்பட்டது.

அந்த மனுவை விசாரித்த நீதிபதி, இந்த வழக்கை பொறுத்தவரை பதில் மனு தாக்கல் செய்வதற்கு ஈசன் ப்ரொடக்சன் நிறுவனத்திற்கு அவகாசம் கேட்ட பொழுதும் கூட இதுவரை பதில் மனு தாக்கல் செய்யப்படவில்லை. எனவே நடிகர் சிவாஜி கணேசன் வீட்டை ஜப்தி செய்ய வேண்டும் என்று உத்தரவிட்டுள்ளார்” என்று குறிப்பிடப்பட்டுள்ளது.