கோலிஃபார்ம் பாக்டீரியா என்பது பல பாக்டீரியாக்களின் குழுவாகும். அது பொதுவாக மனிதர்கள் மற்றும் விலங்குகளின் குடல் பகுதிகள் மற்றும் கழிவுகளில் காணப்படும் என்று குறிப்பிடுகிறது அமெரிக்காவின் வாஷிங்டன் மாகாண சுகாதாரத்துறை.

அது உடலில் இருக்கும் வரை எந்த பிரச்னையும் இல்லை. ஆனால் நீரில் கலக்கும் போது அச்சுறுத்தலாக மாறிவிடும். இந்த கோலிஃபார்ம் பாக்டீரியாக்களில் இ.கோலி, டோட்டல் பாக்டீரியாக்களும் அடங்கும்.

இதில் டோட்டல் பாக்டீரியாக்கள் மண்ணில் கூட காணப்படும். ஆனால் கழிவு கோலிஃபார்ம் (fecal coliform) மற்றும் இ.கோலி போன்றவை கழிவுகளில் காணப்படும். இ.கோலியின் அனைத்து திரிபுகளும் ஆபத்தானவை இல்லை. ஆனால், 0157:H7 என்ற திரிபு மிகவும் ஆபத்தானதாக அறியப்படுகிறது.

மத்திய மாசு கட்டுப்பாட்டு வாரியத்தின் அறிக்கை வெளியான பிறகு இது அரசியல் தளத்தில் இது பேசுபொருளானது. உத்தரபிரதேச அரசு மத்திய மாசு கட்டுப்பாட்டு வாரியத்தின் அறிக்கையை முழுமையாக நிராகரித்தது.

உத்தரபிரதேச மாநில முதல்வர் யோகி, அந்த மாநில சட்டமன்றத்தில் பிப்ரவரி 19-ஆம் தேதி அன்று அறிக்கையை முழுமையாக நிராகரித்தது மட்டுமின்றி, திரிவேணி சங்கமத்தில் உள்ள நீர் குளிப்பதற்கு மட்டுமின்றி குடிப்பதற்கும் உகந்தது என்று கூறினார்.

“நீரின் தரம் குறித்து கேள்வி எழுப்பப்பட்டு வருகிறது. ஆனால் சங்கமத்தைச் சுற்றியுள்ள அனைத்து கால்வாய்களும் கண்காணிக்கப்படுகின்றன. நீர் முழுமையாக சுத்தகரிக்கப்படுகிறது. மாநிலத்தின் மாசு கட்டுப்பாட்டு வாரியம் தொடர்ச்சியாக நீரின் தரத்தை மதிப்பீடு செய்து வருகிறது,” என்று அவர் தெரிவித்தார்.

பிரயாக்ராஜில் 100 மி.லி நீரில் 2500க்கும் குறைவான அளவிலேயே கோலிஃபார்கள் இருப்பதாக தெரிவித்தார். மகா கும்பமேளாவின் நன்மதிப்பை சிதைக்கும் முயற்சிகள் மேற்கொள்ளப்பட்டு வருகிறது என்று அவர் குற்றம்சாட்டினார்.

நீரில் கரைந்திருக்கும் ஆக்ஸிஜனின் அளவு 3-க்கும் குறைவான அளவே இருந்தால் போதும். ஆனால் சங்கமம் பகுதியில் அதன் அளவு 8-9 ஆக இருக்கிறது. எனவே சங்கமத்தில் உள்ள நீர் குளிப்பதற்கு மட்டுமின்றி குடிப்பதற்கும் உகந்தது என்று தெரிவித்தார் யோகி.

சமாஜ்வாதி கட்சியின் தலைவர் அகிலேஷ் யாதவ்,”பாஜகவை சேர்ந்த தலைவர்கள் அந்த நீரை குடித்து, அதில் குளித்தால் மட்டுமே கங்கை சுத்தமாக உள்ளது என்று நாங்கள் நம்புவோம்,” என்று தெரிவித்தார்.

உத்தரபிரதேச சட்டமன்றத்தில் ஆளுநர் உரையின் மீது நடத்தப்பட்ட விவாதத்தில் பேசிய சமாஜ்வாதி கட்சியைச் சேர்ந்த சிவ்பால் சிங் யாதவ், “இந்த நிகழ்வின் மையமாக கங்கை நதி வைக்கப்பட்டிருந்தது. ஆனால் அந்த நதியின் நீர் குடிக்க உகந்ததாக இல்லை. அரசு அந்த கங்கை நதி நீரை கையில் எடுத்து உண்மையை பேச வேண்டும்,” என்று கூறினார்.