2011-ஆம் ஆண்டு தனது புத்தகம் ஒன்றில் கேரளம் என்கிற பெயரை பயன்படுத்தியதற்கு ஆட்சேபனை எழுந்ததாகக் கூறும் எழுத்தாளர் பிரசாந்த் மோரே தற்போது தன்னுடைய முடிவு உறுதியானது என்கிறார்.

கேரள இஸ்லாமியர்கள் பற்றிய இவருடைய புத்தகத்திற்கு ‘கேரளமின் முஸ்லிம்களின் தோற்றம் மற்றும் ஆதிகால வரலாறு (Origin and Early History of Muslims of Keralam’ எனத் தலைப்பிட்டிருந்தார்.

புதுச்சேரியில் பிறந்து வளர்ந்த இவர் தற்போது பிரான்சில் வசித்து வருகிறார். ‘மதராஸின் தோற்றம் மற்றும் அடித்தளம் (Origin and Foundation of Madras)’ என்ற புத்தகத்தையும் எழுதியுள்ளார்.

“கேரளா என்பது ஆங்கிலமயப்பட்ட பெயர், கேரளம் என்பது தான் மலையாள பெயர். நான் எனது புத்தகத்தில் கேரளம் என்பதைப் பயன்படுத்தியபோது ஒரு தரப்பினர் அதற்கு ஆட்சேபனை தெரிவித்தனர். பிரிட்டிஷ் ஆட்சிக் காலத்தில் கேரளா என்பது பொதுவான பெயராக இருந்தது. ஆனால் அப்போதும் கேரளம் என்பது மலையான வழக்கில் பயன்பாட்டில் இருந்துள்ளது.” என்றார்.

ஆனால் கேரளம் என்கிற பெயர் கோரிக்கைக்குப் பின்னால் ஒருங்கிணைந்த இயக்கம் இல்லை என்று குறிப்பிடும் அவர் தனது புத்தகத்திற்கு முதலில் கேரளம் என்பதைப் பயன்படுத்த முடிவு செய்த பின்னணியையும் விவரிக்கிறார்.

புதுச்சேரியில் 18-ஆம் நூற்றாண்டில் வாழ்ந்த இந்தியவியலாளரான மரிதாஸ் பவுல் தன்னுடைய கையெழுத்துப் பிரதிகளில் கேரளம் எனக் குறிப்பிட்டதாகக் கூறுகிறார் பிரசாந்த் மோரே. அவரின் கட்டுரைகளைத் தொகுத்து புத்தகமாக பிரசாந்த் மோரே வெளியிட்டுள்ளார்.

“பாரிஸில் உள்ள தேசிய பிரெஞ்சு நூலகத்தில் நான் அவருடைய கையெழுத்துப் பிரதிகளைக் கண்டெடுத்தேன். பிரெஞ்சு காலனியாக இருந்த புதுச்சேரியில் அவர் மொழிபெயர்ப்பாளராக இருந்துளார். அந்த குறிப்புகளில் கேரளத்தை ஆண்ட மன்னனுக்குப் பல பெயர்கள் கொடுக்கப்பட்டுள்ளது. அதில் கேரளன் என்பதும் ஒன்று, அதன் பொருள் ‘கேரளம்’ நாட்டு மக்களின் தலைவன். அதிலிருந்து தான் நான் கேரளம் என்பதை தேர்வு செய்தேன். பாண்டிச்சேரி-புதுச்சேரி, மதராஸ்-சென்னை, பம்பாய்-மும்பை என மாறியதைப் போலத் தான் இந்தப் பெயர் மாற்றத்தையும் ஒரு அடையாளம் சார்ந்ததாகவே பார்க்க முடிகிறது. இதில் அரசியல் கணக்குகள் இல்லாமல் இருக்காது,” என்றார்.

கேரளாவில் கொச்சி உட்பட பல்வேறு ஊர்களின் பெயர்கள் ஆங்கிலமயப்படுத்தப்பட்டு பின்னர் மலையாள பயன்பாட்டிற்கு மாறியுள்ளன. அந்த வரிசையில் தற்போது மாநிலத்தின் பெயரும் மாற்றப்படுகிறது என்றார் கே.என் கணேஷ்.

அரசு திட்டங்கள் கூட ஆங்கிலத்தில் கேரளா என அழைக்கப்பட்டாலும் மலையாளத்தில் கேரளம் என்றே தொடர்ந்து அழைக்கப்பட்டு வருகிறது என்றும் அவர் தெரிவித்தார்.

“திருவனந்தபுரம், Trivandrum என்றும் கொச்சி, Kochin என்றும் கோழிக்கோடு, Calicut என அழைக்கப்பட்டது. இவை காலப்போக்கில் அதன் உண்மையான மலையாளப் பெயர்களைப் பெற்றன. அந்த வரிசையில் தற்போது கேரளம் என்பதும் வருகிறது.” எனத் தெரிவித்தார்.

” கேரளாவில் ஓர் எழுத்து மட்டுமே சேர்வதாகத் தெரிந்தாலும் கலாசார உணர்வு கொண்டவர்களுக்கு இது முக்கியமானதாக உள்ளது.” என்று தெரிவிக்கிறார் அவர்.

“அசோக மன்னரின் கல்வெட்டில் கேரள புத்திரர் என்கிற குறிப்பு உள்ளது. கேரளம் என்பது சேர மகன், சேர மக்கள் என்கிற பொருள்படும் சமஸ்கிருத அர்த்தம் கொண்ட பெயர். 18-ஆம் நூற்றாண்டு மலையாள புத்தகங்களில் கேரளநாட்டார் என்கிற குறிப்பு உள்ளது. தென்னை என்பதற்கு மலையாளத்தில் கேரம் என்று பொருள், அதனால் தென்னை அதிகம் விளையும் நிலம் என்கிற பொருளும் உள்ளது .சேரல், சேரநாடு என இப்படி பல்வேறு அர்த்தங்களில் பல பெயர்கள் வழங்கப்பட்டாலும் காலப்போக்கில் கேரளம் என்கிற சமஸ்கிருதமயப்பட்ட பெயர் நிலைத்துவிட்டது,” என்றார் கே.என் கணேஷ்.

“திருவிதாங்கூர், கொச்சி மற்றும் மலபார் சமஸ்தானங்களை இணைத்து ஒன்றுபட்ட மலையாள மொழி பேசும் பிரதேசத்துக்கான கோரிக்கை எழுந்தது. கேரளம் என்பது ஒட்டுமொத்த மலையாள மொழி பேசும் பிரதேசத்துக்கான அடையாளமாக மாறிப்போனது.” என்றார் அவர்.

மத்திய அமைச்சரவையின் ஒப்புதலை தொடர்ந்து, நாடாளுமன்றத்தில் மசோதா அறிமுகப்படுத்தப்பட்டு, மசோதா நிறைவேறிய பிறகு குடியரசு தலைவரின் ஒப்புதல் பெறப்படும். பின்னர் கேரளாவின் பெயர் கேரளம் என மாறும்.

– இது, பிபிசிக்காக கலெக்டிவ் நியூஸ்ரூம் வெளியீடு