ஆனால், கொலாஜென் இன்னும் நன்கு புரிந்துகொள்ளப்படவில்லை. இந்த இணை மருந்துகளை உட்கொண்டால் பலன் இருப்பதாக சில ஆதாரங்கள் இருந்தாலும், ஆய்வுகள் குறைவாகவே உள்ளன. இதை தினமும் உட்கொள்வதில் முக்கிய அபாயமே பணம் வீணடிக்கப்படுகிறது என்பதாகத்தான் இருக்கும். ஏனென்றால், வேறு பக்கவிளைவுகளும் அதிகம் இருப்பதாக தெரியவில்லை. ஆனால், விளம்பரங்களில் சொல்லப்படும் வாக்குறுதிகளுக்கு இணையாக அறிவியல் ஆய்வுகள் இருக்கின்றனவா?

இனிப்புகள், ஜெல்லிகள் மற்றும் மருந்துகளுக்கான காப்ஸ்யூல்கள் தயாரிக்கப் பயன்படும் ஜெலட்டின், கொலாஜெனின் ஒரு வடிவமாகும்.

அடிப்படையிலிருந்து தொடங்குவதென்றால், “கொலாஜென் விலங்குகளின் இணைப்புத் திசுகளில் மட்டும் காணப்படுகிறது”, என்கிறார் அமெரிக்காவின் ஜார்ஜியாவில் பதிவுபெற்ற ஊட்டச்சத்து நிபுணர் ஆன்ட்ரியா சோரெஸ். இவர் மக்கள் தங்கள் பகுதியில் உள்ள ஊட்டச்சத்து நிபுணர்களுடன் தொடர்புகொள்வதற்கு உதவும் உட்டச்சத்து அமைப்பு ஒன்றின் அங்கமாக உள்ளார்.

மாடுகள், கோழிகள் மற்றும் மீன்கள் என பலவகையான விலங்குகளிடம் இருந்து கொலாஜென் பொருட்கள் தயாரிக்கப்படுகின்றன. இனிப்புகள், ஜெல்லி, மருந்துகளில் பயன்படுத்தப்படும் காப்சூல்கள் தயாரிப்பதிலும் பயன்படும் ஜெலட்டின், கொலாஜெனின் ஒரு வகையாகும்.

“சில தாவரம் சார்ந்த மாத்திரைகள், ‘வீகன் கொலாஜென்’ என்ற பெயரில் அறியப்பட்டாலும் அவை நமது உடலில் கொலாஜென் உற்பத்தியாவதில் உதவியாக இருக்கும் விட்டமின் சி, அமினோ அமிலங்கள் மற்றும் தாதுக்களை மேம்படுத்துகிறது,” என்கிறார் சோரெஸ். “நீங்கள் சைவமாக இருந்தால் நல்ல உணவை சாப்பிட பணத்தை செலவழியுங்கள், அதை விட்டுவிட்டு கொலாஜென் இல்லாத மாத்திரைகளை கொலாஜென் என்று நினைத்து சாப்பிடாதீர்கள்.”

வெவ்வேறு விதமான கொலாஜென்கள் வெவ்வேறு விதமாக செயல்படுவதாக தோன்றுகிறது. ஹைட்ரோலைஸ்ட் கொலாஜென் என்பவை சிறு அமினோ அமில சங்கிலிகளாக உடைக்கப்பட்ட பெப்டைட்ஸ் என்ற கொலாஜென் ஆகும், உடலின் செரிமான மண்டலத்தில் இவை பயணிக்கும்போது இன்னும் சிறியதாக இது உடைபடுகின்றன. இயல்பு மாற்றம் செய்யப்படாத (undenatured – raw) type II கொலாஜென் என்பது மூட்டுகளை சுற்றியுள்ள செறிவான இணைப்புத்திசுவில் இருக்கக்கூடிய ஒரு மூலப் பொருளாகும்.

கோட்பாடு அடிப்படையில் இவை மூட்டுகளை சுற்றியுள்ள கொலாஜெனை மீண்டும் உருவாக்குவதில் உதவலாம் என்று கூறுகிறார், சிட்னி பல்கலைக்கழகத்தில் வாதம் தொடர்பான மருத்துவ ஆராய்ச்சியாளராக உள்ள டேவிட் ஹண்டர். வகை II கொலாஜென்னும் வயிற்றில் அமினோ அமிலங்களாக உடைபடும். ஆனால், ஹைட்ரோலைஸ்ட் கொலாஜென், உடலால் மேலும் எளிதாக உறிஞ்சக்கூடியதாக உள்ளது.

பல்வேறு மூலங்களிலிருந்து கிடைக்கும் பல விதமான கொலாஜென்கள், (இனிப்பு) பார் வடிவம் முதல் பானம் வரை பல வகைகளில் பேக் செய்யப்படுகிறது. “பொடி மற்றும்,திரவ வடிவில் கிடைக்கும் கொலாஜெனை விட மாத்திரை மற்றும் கம்மீஸ்களில் கொலாஜென் குறைந்த அளவே காணப்படுகிறது. அதில் அதிகமான சர்க்கரையும் சேர்க்கப்படலாம்,” என்கிறார் சோரெஸ்.

புரதச்சத்து மற்றும் விட்டமின் சி இருக்கும் உணவுகளை உட்கொண்டால் நமது உடலில் கொலாஜென் உருவாக உதவியாக இருக்கும். கொலாஜெனை உட்கொள்பவர்கள் பொடி அல்லது திரவ வடிவில் ஒருவேளைக்கான மருந்தாக 5 முதல் 10 கிராம் அளவுக்கு எடுத்துக்கொள்ளலாம் என்று அறிவுறுத்துகிறார் அவர்.

விற்பனைக்காக கொலாஜெனைப் பற்றி விளம்பரங்களில் அளிக்கப்படும் வாக்குறுதிகள் ஆய்வுக்கு உட்படுத்தப்பட்டால் அவை உண்மையல்ல என்றே தெரிகிறது. ஐரோப்பாவின் உணவு பாதுக்காப்பு ஆணையத்தின் மனித ஊட்டச்சத்துக்கான மூத்த அறிவியல் அதிகாரியாக இருக்கும் லெங் ஹெங் கூறுகையில், “கொலாஜெனை உட்கொள்வதால் ஆரோக்கியம் மேம்படும் என்ற எந்தவொரு கூற்றுக்கும் ஒப்புதல் வழங்கப்படவில்லை,” என்றார்.

புதிதாக அறிமுகப்படுத்தப்படும் உணவுகளில் உள்ள அபாயங்களை ஆய்வு செய்வதற்கான ஐரோப்பிய ஒன்றியத்தின் முகமைதான் ஐரோப்பாவின் உணவு பாதுக்காப்பு ஆணையம். இந்த ஆணையம் கொலாஜெனைப் பற்றி ஆய்வு செய்தபோது அதன் பயன்களாக கூறப்படுபவற்றை நிரூபிக்க வலுவான ஆதாரங்கள் இல்லை என்று தெரிவித்துள்ளது.

“அவை சரியாக வரையறுக்கப்படவில்லை, மனிதர்களிடம் ஆராய்ச்சிகள் நடத்தப்படவில்லை அல்லது விலங்குகள் மற்றும் ஆராய்ச்சிக்கூடங்களில் நடத்தப்பட்ட ஆய்வுகளை ஆதாரமாக கொண்டிருந்தன. இந்த ஆய்வுகள் மனிதர்களிடம் ஏற்படும் விளைவுகளை கணிக்க முடியாது,” என்கிறார் ஹெங்.

அதாவது, கொலாஜெனை உட்கொண்டால் சருமத்தின் நெகிழ்வுத்தன்மையை பராமரிக்க முடியும், மூட்டுகளின் செயல்பாடுகள் மேம்படும் போன்ற கூற்றுகள் அறிவியல் ஆய்வுகள் மூலம் நிரூபிக்கப்படவில்லை.

ஆய்வுகளின் நம்பகத்தன்மையை முடிவு செய்வதில் தொடர்புடைய தொழில்துறையின் தலையீடு கவனத்தில் கொள்ளவேண்டிய விஷயம் என்கிறார் ஹண்டர். கொலாஜென் குறித்த ஆய்வுகளுள் ஒன்று, கொலாஜெனை உற்பத்தி செய்யும் நிறுவனத்தின் நிதி மூலம் மேற்கொள்ளப்படுகிறது அல்லது அந்த நிறுவனங்களில் பணியாற்றுபவர்கள் மூலமாக எழுதப்படுகின்றன.

பொதுவாக ஆராய்ச்சிக் கட்டுரைகளில் ‘கான்ஃபிளிக்ட் ஆஃப் இண்ட்ரெஸ்ட்’ எனப்படும் ஆதாய முரண்கள் குறிப்பிடப்படவேண்டும். ஆனால், எல்லா இடத்திலும் இது நடப்பதில்லை. உதாரணமாக ஒரு ஆய்வறிக்கையை தயாரித்த ஐந்து முதல் ஏழு பேர், கொலாஜெனை உற்பத்தி செய்யும் நிறுவனங்களுடன் தொடர்பு இருப்பதாக தெரிவித்திருந்தனர். ஆனால் இதைப்பற்றிய கூடுதல் தகவல்கள் ஏதும் ஆதாய முரண் பகுதியில் குறிப்பிடப்படவில்லை. (இது தொடர்பாக இந்த ஆராய்ச்சி கட்டுரையை வெளியிட்ட elsevier நிறுவனத்திடம் பிபிசி கேட்ட கேள்விக்கு, இந்த ஆய்வு தற்போது விசாரணைக்கு உட்படுத்தப்பட்டுள்ளது என்று பதிலளித்துள்ளது.)

“கொலாஜென் தொடர்பான ஆய்வுகளில், முழுமையாக தொழில்துறையை சாராமல் நடத்தப்பட்ட ஆய்வுகளை காண்பது அரிது.” என்கிறார் ஹண்டர்.

சில சமயங்களில் தரமற்ற ஆய்வுகளை மேற்கோள் காட்டி இன்ஃபுளூயென்சர்கள் சில நேரங்களில் சுகாதார அதிகாரிகளால் பரிந்துரைக்கப்பட்ட அளவை விட அதிக அளவிலான கொலாஜெனை உட்கொள்ள அறிவுறுத்தக்கூடும்.

தவறான முடிவுகளை அளித்த பல்வேறு ஆய்வுககளை ஒருங்கிணைத்து நடத்தப்படும் மெட்டா அனலைசஸ் எனப்படும் முறையான மறு ஆய்வுகள் கூட தவறான முடிவை எட்டும் அபாயம் உள்ளது. ஹண்டரும் அவரது இணை ஆசிரியர்களும் இதுபோன்ற ஆய்வுகளில் தொழில்துறையின் தலையீடு உள்ளிட்ட பாரபட்சங்களை கண்டறிகின்றனர்.

ஆனால், கொலாஜென் போன்றவற்றில் போதிய சார்பற்ற பரிசோதனைகள் இல்லாத நிலையில், சார்பு நிலையை முடிவு செய்வது கடினமானது என்கிறார் அவர்.

இதை உட்கொள்வதல் மனித உடலில் ஏற்படும் பின்விளைவுகள் குறைவாக இருந்தாலும், கொலாஜென் தயாரிப்பால் வேறு மாதிரியான விளைவுகள் ஏற்படலாம். உதாரணமாக, பிரேசில் நாட்டில் மாடுகளில் இருந்து எடுக்கக்கூடிய கொலாஜென் காடுகள் அழிப்புடன் தொடர்புப்படுத்தப்பட்டுள்ளது.

இதற்கிடையில், கொலாஜென் அல்லது ஜெலட்டின் மூலம் தொற்றக்கூடிய ஸ்பஞ்சிஃபார்ம் என்சிபேலோபதி என்ற புதிய நோய் பரவும் சாத்தியக்கூறு குறித்து ஐரோப்பிய ஆணையம் ஆய்வு ஒன்றை தொடங்கியது. மிக மோசமான சூழ்நிலையில் தொற்று உள்ள ஜெலட்டினை வாய்வழியாக உட்கொள்வதால் மனிதர்களுக்கு ஏற்படும் பாதிப்பை கணக்கிட்ட ஐரோப்பிய உணவு பாதுகாப்பு ஆணையம், மிகக்குறைவான அபாயம் இருப்பதாக கண்டறிந்தது.