அடல் பிஹாரி வாஜ்பாய் மற்றும் லால் கிருஷ்ண அத்வானி ஆகியோர் இந்தப் பட்டியலில் இடம்பெறும் அளவுக்கு அனுபவம் பெற்றவர்களாக அப்போது இருக்கவில்லை.

சில மாதங்களுக்குப் பிறகு அதாவது 1951 அக்டோபர் 21 ஆம் தேதி இந்த ஐந்து பேரின் தலைமையில் பாரதிய ஜன சங்கம் நிறுவப்பட்டது. அதன் தேர்தல் சின்னம் விளக்கு.

மாதவ் சதாசிவ் கோல்வால்கர் 1906 ஆம் ஆண்டு நாக்பூருக்கு அருகிலுள்ள ராம்டெக்கில் ஒரு பிராமண குடும்பத்தில் பிறந்தார். அவர் மிகவும் மெலிந்த தேகம் கொண்டவர். வாரணாசி இந்து பல்கலைக்கழகத்தில் அவர் உயிரியல் பட்டப்படிப்பு படித்தார்.

கடந்த ஆண்டு அக்டோபரில் வெளியான ‘கோல்வால்கர் தி மித் பிஹைண்ட் தி மேன், தி மேன் பிஹைண்ட் தி மெஷின்’ என்ற புத்தகத்தின் ஆசிரியர் திரேந்திர கே.ஜா, “கோல்வால்கர் எப்போதும் கஞ்சி போட்ட வெள்ளை வேட்டி மற்றும் குர்தாவை அணிவார். அவருக்கு பெரிய, ஆழமான, பிரகாசமான கண்கள் இருந்தன. ஆனால் அவர் ஒரு கூச்ச சுபாவமுள்ள நபராக இருந்தார்” என்று எழுதுகிறார்.

“அவர் குறைந்தது ஐந்து மொழிகளில் அதாவது ஆங்கிலம், ஹிந்தி, மராத்தி, பெங்காலி மற்றும் சமஸ்கிருதத்தில் புலமை பெற்றிருந்தார்.”

அவரது மற்றொரு வாழ்க்கை வரலாற்றாசிரியர் கங்காதர் இந்தூர்கர், தனது ‘குருஜி மாதவ் சதாசிவ் கோல்வால்கர்’ என்ற புத்தகத்தில், “கோல்வால்கர் படிப்பில் மிகவும் ஆர்வம் கொண்டவர். அவர் அப்பல்கலைக்கழக நூலகத்தில் இருந்த இந்து மதம் மற்றும் ஆன்மீகம் தொடர்பான ஒவ்வொரு முக்கியமான புத்தகத்தையும் படித்திருந்தார்,” என்று குறிப்பிட்டுள்ளார்.

பனாரஸில் படிக்கும் போது தான் அவர் ஆர்.எஸ்.எஸ் நிறுவனர் கேசவ் பலிராம் ஹெட்கேவாரை முதன்முதலில் சந்தித்தார். ஆனால் அவரை ஆர்.எஸ்.எஸ்-க்குள் கொண்டு வந்த பெருமை, அப்போது வாரணாசி இந்து பல்கலைக்கழகத்தில் படித்துக்கொண்டிருந்த பையாஜி தானியைச் சேரும்.

1939 ஆம் ஆண்டு அவர் ஆர்.எஸ்.எஸ்ஸின் சக பொறுப்பாளராக நியமிக்கப்பட்டார்.

அந்த நேரத்தில் பாபாராவ் சாவர்க்கரின் மராத்தி புத்தகமான ‘ராஷ்ட்ர மீமான்சா’வால் ஈர்க்கப்பட்ட கோல்வால்கர், ‘we or our nationhood defined’ என்ற புத்தகத்தை எழுதினார். இது மார்ச் 1939 இல் வெளியிடப்பட்டது.

ஆர்.எஸ்.எஸ் நிறுவனர் ஹெட்கேவார் தான் இறப்பதற்கு ஒரு நாள் முன்பு கோல்வல்கரிடம் ஒரு காகிதத்தை அளித்தார். அதில் “இனிமேல் நீங்கள் அமைப்பின் அனைத்துப் பொறுப்பையும் ஏற்க உள்ளீர்கள் என்று நான் உங்களுக்குச் சொல்ல விரும்புகிறேன்,” என்று எழுதப்பட்டிருந்தது. (‘கோல்வால்கர் தி மித் பிஹைண்ட் தி மேன், தி மேன் பிஹைண்ட் தி மெஷின்’)

கோல்வால்கரின் பெயர் அறிவிக்கப்பட்டபோது பல ஆர்.எஸ்.எஸ் தலைவர்கள் அதிர்ச்சியடைந்தனர். அந்தப் பதவிக்கு ஹெட்கேவார் வயதில் மூத்த, அனுபவசாலியான ஒருவரைத் தேர்ந்தெடுப்பார் என்று அவர்கள் நினைத்திருந்தனர்.

“ஆரம்பத்தில் ஹெட்கேவார், பாலாஜி ஹுதாரை தனது வாரிசாகக் கருதினார். அவரை ஆர்.எஸ்.எஸ்ஸின் சக பொறுப்பாளராக நியமித்திருந்தார். பாலாஜி ஹுதார் சங் அமைப்பின் நிறுவனர்களில் ஒருவர். 1936-இல் அவர் மேல் படிப்புக்காக லண்டனுக்குச் சென்றார். அங்கு அவர் கம்யூனிஸ்டுகளுடன் தொடர்பு கொண்டார். லண்டனில் இருந்து அவர் ஸ்பெயினுக்குச் சென்றார். அங்கு அவர் ஸ்பானிஷ் உள்நாட்டுப் போரில் பங்கேற்றார்,” என்று மூத்த பத்திரிகையாளரும் எழுத்தாளருமான திரேந்திர ஜா குறிப்பிடுகிறார்.

“1938 ஆம் ஆண்டு ஸ்பெயினிலிருந்து இந்தியா திரும்பியபோது அவரது சித்தாந்தம் முற்றிலும் மாறியிருந்தது. ஹெட்கேவார் பிரிட்டனின் ஆதரவாளராக இருந்தார். அதே நேரம் ஹுதார் பிரிட்டிஷ் ஏகாதிபத்தியத்தை முற்றிலுமாக எதிர்த்தார். அதுமுதல் ஹெட்கேவாருக்கும் ஹுதாருக்கும் இடையிலான தூரம் வளரத் தொடங்கியது. மேலும் அவர் கோல்வால்கரை ஆர்எஸ்எஸ்ஸின் சக பொறுப்பாளராக ஆக்கியது மட்டுமல்லாமல் அவரை தனது வாரிசாக காணத் தொடங்கினார்” என்று ஜா விளக்குகிறார்.