”இப்போதுள்ள மத்திய அரசிடம் ஜவுளித்துறை தொடர்பான உறுதியான கொள்கை இல்லாததுதான், தேசிய பஞ்சாலைக் கழக ஆலைகளின் இன்றைய நிலைக்குக் காரணம்” என்கிறார், சிஐடியூ தொழிற்சங்க நிர்வாகியும், மார்க்சிஸ்ட் கம்யூனிஸ்ட் கட்சி கோவை மாவட்டச் செயலாளருமான பத்மநாபன்.

தற்போது மூடிக்கிடக்கும் ஆலைகளை திரும்பவும் இயக்க முடியாத அளவுக்கு, அவை மோசமான நிலையை அடைந்துள்ளதாகக் கூறும் அவர், அத்தனைக்கும் காரணம் நிர்வாகச் சீர்கேடுதான் என்கிறார்.

”தமிழகத்திலுள்ள தனியார் ஆலைகளில் உற்பத்திச் செலவு 4 சதவிகிதமாக இருக்கும் நிலையில், இந்த என்டிசி ஆலைகளில் அதே செலவு 16.5 சதவிகிதமாக உள்ளது. நவீனமயம், இயந்திரங்களால் ஆட்குறைப்பு என்று தனியார் ஆலைகளுக்கு இணையாக இந்த ஆலைகளை இனி இயக்குவதற்கான சாத்தியம் குறைவு. அதனால் அந்தத் தொழிலாளர்களுக்கு உரிய இழப்பீட்டைத் தர வேண்டியது ஜவுளித்துறையின் பொறுப்பு.” என்றார் பத்மநாபன்.

தேசிய பஞ்சாலைக்கழகத்தின் இணையதளத்தில் வெளியிட்டுள்ள தகவலின்படி, தேசியமயமாக்கப்பட்ட 124 ஆலைகளில் 23 ஆலைகள் மட்டுமே தற்போது நுால் மற்றும் துணி உற்பத்தியை மேற்கொள்ளும் பணியை மேற்கொள்கின்றன.

தேசிய பஞ்சாலைக்கழகத்துக்குச் சொந்தமாக கோவையிலுள்ள 8 ஆலைகளின் இடங்கள் குறித்த விபரங்கள், கோவை மாவட்ட நிர்வாகத்திடம் சமர்ப்பிக்கப்பட்டுள்ளன.

மாவட்ட நிர்வாகம் பகிர்ந்த தகவலின்படி, அந்த 8 ஆலைகளின் இடங்களின் மொத்த பரப்பு 140.88 ஏக்கர் ஆகும். இந்த ஆலைகள் அனைத்தும் இப்போது இயங்காத நிலையில், அந்த கட்டடங்களும், அதைச் சுற்றிலும் உள்ள பல ஏக்கர் பரப்புள்ள நிலங்களும் வீணாகி வருகின்றன என தொழில் அமைப்பினர் கருதுகின்றனர்.

இதுகுறித்து, பிபிசி தமிழிடம் பேசிய இந்திய தொழில் மற்றும் வர்த்தக சபையின் கோவை கிளை முன்னாள் தலைவர் நந்தகுமார், ”கோவை நகருக்குள் என்டிசி மில்களின் நிலமே பல ஏக்கர் இருக்கிறது. அந்த இடங்கள் பெரும்பாலும் புதர் மண்டி காடு போலாகி வீணாகவுள்ளன.

அந்த இடங்களை கோவை சந்திப்பு விரிவாக்கம் உள்ளிட்ட பல்வேறு திட்டங்களுக்குப் பயன்படுத்த வேண்டுமென்று பல ஆண்டுகளாக வலியுறுத்தி வருகிறோம். காங்கிரஸ் காலத்திலிருந்து இப்போது வரை இந்த கோரிக்கை கிடப்பில் உள்ளது.” என்றார்.

”கோவையிலுள்ள என்டிசி மில் தொழிலாளர்களுக்கான சம்பள பாக்கி மற்றும் அவர்களின் எதிர்காலம் குறித்தும், அந்த மில்களின் நிலங்களை ரயில் சந்திப்பு விரிவாக்கம் உள்ளிட்ட பல்வேறு மேம்பாட்டுத் திட்டங்களுக்குப் பயன்படுத்த வேண்டும் என்பது குறித்தும், இந்த நாடாளுமன்ற கூட்டத் தொடரில் ‘ஜீரோ ஹவர்’ நேரத்தில் பேசவுள்ளோம்.” என்று பிபிசி தமிழிடம் தெரிவித்தார் கோவை நாடாளுமன்ற உறுப்பினர் ராஜ்குமார்.

ஊதிய நிலுவை போராட்டங்கள், ஆலைகளை இயக்குவது தொடர்பான நீதிமன்ற உத்தரவுகள் ஆகியவை குறித்து கருத்துக் கேட்பதற்காக, கோவை காட்டூரில் உள்ள தேசிய பஞ்சாலைக்கழகத்தின் தென் மண்டல அலுவலகத்தின் அலுவலகப் பொறுப்பாளரும், பொது மேலாளருமான வெங்கடேஷை தொடர்பு கொண்டபோது, நேரில் வருமாறு அவரது அலுவலகத்தில் பதில் தரப்பட்டது. நேரில் சென்றபோது அவர் சந்திக்க மறுத்துவிட்டார். மீண்டும் தொலைபேசியில் தொடர்புகொண்டபோதும், அவரிடம் பதில் பெற முடியவில்லை.