இவ்வழக்கில் கோவை மாவட்ட நுகர்வோர் குறை தீர் ஆணைய நீதிபதி தட்சிணாமூர்த்தி, ஆணைய உறுப்பினர் சுகுணா ஆகியோர் அளித்த உத்தரவையும் பிபிசியிடம் சுரேஷ்குமார் பகிர்ந்தார். அந்த உத்தரவில் இந்திய ரிசர்வ் வங்கியின் வங்கி ஒழுங்குமுறைச் சட்டம் 1949 ன் படி, மனுதாரருக்கு இழப்பீடாக ரூ.12 லட்சம் வழங்க வேண்டும் என்றும், மனுதாரருக்கு ஏற்பட்ட மனஉளைச்சல், அலைச்சல் மற்றும் சேவை குறைபாடுக்கு ரூ.1 லட்சமும், வழக்கு செலவுத்தொகையாக ரூ.10 ஆயிரமும் வழங்க வேண்டுமென்றும் குறிப்பிடப்பட்டுள்ளது.

சேவை குறைபாடு மற்றும் வழக்கு செலவுத்தொகையை பைசல் செய்யும் நாள் வரை, 12 சதவீத வட்டியும் சேர்த்துத் தர வேண்டுமென்றும் உத்தரவிடப்பட்டுள்ளது. அத்துடன் உத்தரவு கிடைக்கப்பெற்ற நாளிலிருந்து 2 மாதத்திற்குள் விவசாயக் கடன் அடமான பத்திரத்தை ரத்து செய்து கொடுக்க வேண்டுமென்றும், அதற்குப் பின் தாமதமாகும் ஒவ்வொரு நாளுக்கும் ஆயிரம் ரூபாய் வீதமாகச் செலுத்தவும் ஆணையம் உத்தரவிட்டுள்ளது.

பாதிக்கப்பட்ட பெண் விவசாயி பாக்கியலட்சுமியின் மகனான சுரேஷ்குமார்தான், தனது தாயார் பெயரிலான கடன் தொகைக்குரிய தொகையை, தனது வங்கிக் கணக்கிலிருந்து பரிவர்த்தனை செய்திருக்கிறார். வழக்கறிஞரான அவரே, நுகர்வோர் குறைதீர் ஆணையத்தில் தங்கள் தரப்பு வாதத்தை முன் வைத்துள்ளார். அவருடைய சீனியர்கள் தியாகராஜன், சுஜி தியாகராஜன் ஆகியோரும் இணைந்து வாதாடியுள்ளனர்.

”நாங்கள் அசல் உயில் ஆவணத்தை வங்கியில் கொடுத்து கடன் வாங்கியிருந்தோம். ஆனால் அவர்கள் அதைத் தொலைத்து விட்டு, நாளிதழில் விளம்பரம் கொடுத்து, பதிவுத்துறையிடம் நகல் வாங்கிக் கொடுப்பதாகக் கூறினர். அதை நாங்களே வாங்கியிருப்போம். இந்திய ரிசர்வ் வங்கி விதிகளின்படி, கடன் தொகை செலுத்திய 30 நாட்களுக்குள் அடகு ஆவணத்தைத் தரவேண்டும். அதிகபட்சம் 60 நாட்களுக்குள் திருப்பிக்கொடுக்க வேண்டும். ஆனால் 30 நாளுக்குப் பின், ஒவ்வொரு நாளும் ரூ.5 ஆயிரம் வீதம் இழப்பீடு தரவேண்டும்.” என்றார் சுரேஷ்குமார்.

அந்தக் கணக்கின்படியே, கடன் தொகை முழுமையாகச் செலுத்தப்பட்ட நாளிலிருந்து 30 நாட்களுக்குப் பின் துவங்கி, தற்போது வரையிலும் நாளொன்றுக்கு ரூ.5 ஆயிரம் வீதம் கணக்கிட்டு ரூ.12 லட்சம் இழப்பீடு வழங்க நுகர்வோர் குறை தீர் ஆணையம் உத்தரவிட்டிருப்பதாக அவர் விளக்கினார்.

இந்த உத்தரவு பற்றி பிபிசியிடம் விளக்கிய வழக்கறிஞர் சுஜி தியாகராஜன், ”பாதிக்கப்பட்ட குடும்பத்தைச் சேர்ந்தவரே, இதில் வாதாடி இத்தகைய உத்தரவைப் பெற்றிருப்பதை முக்கியமான ஒன்றாகக் கருதுகிறோம். உண்மையிலேயே இதுபோன்று பாதிக்கப்படும் நுகர்வோர் பலருக்கும் இந்த உத்தரவு நம்பிக்கையளிப்பதாக இருக்கும். வங்கிகளில் நுகர்வோரால் வழங்கப்படும் அசல் ஆவணங்களைக் கையாள்வதில் வங்கி நிர்வாகங்கள் கவனமுடன் இருப்பதற்கு இந்த உத்தரவு உதவுமென்று நம்புகிறோம்.” என்றார்.

இந்த வழக்கில் சொத்து ஒரே ஒரு நபருக்கு எழுதித் தரப்பட்டிருப்பதால் அவரிடம் அசல் உயில் ஆவணம் இருந்துள்ளது. ஒரே உயிலில் 2 அல்லது அதற்கும் மேற்பட்டவர்களுக்கு சொத்து பகிரப்பட்டிருந்தால் ஒருவரிடம் மட்டும்தான் அசல் உயில் இருந்திருக்கும். மற்றவர்களிடம் அதன் நகல் மட்டுமே இருக்க வாய்ப்புள்ளது. அதனால் அசல் உயில் ஆவணத்தை விட, அசல் மூலப் பத்திரங்களைத்தான் அதிகமான பாதுகாப்பில் வைத்திருக்க வேண்டுமென்று இல்லாவிடில் அதைத் தவறாகப் பயன்படுத்த அதிக வாய்ப்புள்ளதாக பெயரை வெளியிட விரும்பாத பதிவுத்துறை அதிகாரி ஒருவர் கூறினார்.

பாக்கியலட்சுமியிடம் அடமானம் பெற்ற அசல் மூலப்பத்திரங்கள் மற்றும் கிரயப்பத்திரங்களை வங்கி நிர்வாகம் திருப்பிக் கொடுத்துவிட்டதாக சுரேஷ்குமார் தெரிவித்தார். அசல் உயில் ஆவணம் மட்டுமே வங்கி நிர்வாகத்தால் தொலைக்கப்பட்டுவிட்டதாகவும், அதற்காக மட்டுமே தங்களால் நுகர்வோர் நீதிமன்றத்தில் மனு தாக்கல் செய்யப்பட்ட விவரத்தையும் அவர் கூறினார்.

இதுகுறித்து நரசிபுரம் யூனியன் வங்கிக் கிளை மேலாளர் பிபின் பாஸ்கரிடம் கேட்டபோது, ”கண்டிப்பாக நாங்கள் மேல் முறையீடுக்குச் செல்வோம். ஆவணம் காணாமல் போனதற்கான காரணம் குறித்து வங்கி நிர்வாகம் தரப்பில் வழக்கமான விசாரணை நடத்தி, உரிய நடவடிக்கை எடுக்கப்படும்.” என்றார்.

வங்கி நிர்வாகங்களிடம் இதுபோன்று அடகு ஆவணமாக ஒப்படைக்கப்படும் அசல் ஆவணங்கள் தொலைந்து விடும் பிரச்னை நீண்டகாலமாகவே இருப்பதாக கோயம்புத்துார் கன்ஸ்யூமர் காஸ் செயலாளரும், முன்னாள் வங்கி அதிகாரியுமான கதிர்மதியோன் கூறினார். அந்த அசல் ஆவணம் தொலைந்து விட்டதாகக் கூறி, பதிவுத்துறையிடம் நகல் ஆவணத்தை வாங்கி முறைகேடு செய்வதும் கூட நடந்துள்ளதாக அவர் தெரிவித்தார்.

”பெரும்பாலும் அசல் ஆவணங்கள் அந்தந்த வங்கிக் கட்டடங்களிலேயே பாதுகாக்கப்படுகின்றன. சில பெரிய வங்கிகளில் பொதுவாக ஓரிடங்களில் இவை சேகரித்து பாதுகாக்கப்படுவதுண்டு. முன்பு வங்கிகளில் அசல் ஆவணங்களை அடகு வைத்துவிட்டு, பின்பு தொலைந்துவிட்டதாக பதிவுத்துறை அலுவலகத்தில் நகல் வாங்கி, அந்த சொத்தை விற்கும் முறைகேடு நடந்திருக்கிறது. அதன்பின்பே, அடகு வைத்து கடன் தரும்போது (Equitable Mortgage) ஆவணங்களை பதிவு செய்யும் நடைமுறை (Memorandum of Deposit of Title Deeds) வந்தது.” என்றார் அவர்.

”நுகர்வோருக்கு அசல் ஆவணம் முக்கியம். நகல் அதற்கு ஈடாகாது. அதனால் அசல் ஆவணங்களைப் பாதுகாப்பாக வைப்பது வங்கி நிர்வாகத்தின் பொறுப்பாகும். இதுபோன்று அசல் ஆவணம் தொலைந்துவிட்டால், முறைப்படி போலீசில் புகார் கொடுத்து, அதன் ரசீதை வைத்து நாளிதழில் விளம்பரம் கொடுத்து, அதை வைத்து பதிவுத்துறையில் நகல் வாங்கிக் கொடுக்க வேண்டும். அத்துடன் அசல் ஆவணம் தொலைந்த விவரத்தையும், வங்கி நிர்வாகத்தால் நகல் பெற்ற விபரத்தையும் குறிப்பிட்டு வங்கி நிர்வாகம் சார்பில் ஒரு கடிதம் தரவேண்டும். அதையே அசல் ஆவணமாக நுகர்வோரால் பயன்படுத்த முடியும்.” என்றார்.

– இது, பிபிசிக்காக கலெக்டிவ் நியூஸ்ரூம் வெளியீடு