கோவை நகரின் மையப்பகுதியான பெரியகடை வீதி–வைசியாள் வீதி சந்திப்புப் பகுதியில், கோவை மாநகர காவல்துறைக்குட்பட்ட பெரியகடை வீதி (பி 1) காவல் நிலையம் உள்ளது. சாலையோரத்தில் அமைந்துள்ள இந்த காவல் நிலையத்தில் தரை தளம் மற்றும் இரு தளங்கள் உள்ளன. முதல் தளத்தில் உதவி ஆய்வாளர் அறை ஒன்று உள்ளது.

இன்று (ஆகஸ்ட் 6) காலை 8 மணியளவில் அந்த அறைக்கு காவலர் செந்தில்குமார் சென்று பார்த்தபோது, அறை உள்ளே பூட்டப்பட்டிருந்துள்ளது. தட்டிப்பார்த்தும் திறக்காத நிலையில், கதவை உடைத்துப் பார்த்தபோது, ஒருவர் தற்கொலை செய்து கொண்டிருப்பது தெரியவந்துள்ளது என காவல்துறை கூறுகிறது.

நகரின் முக்கியப் பகுதியில் உள்ள காவல் நிலையத்தில் ஒருவர் இறந்து கிடந்த தகவல், உடனடியாக காட்சி ஊடகங்கள் மற்றும் சமூக ஊடகங்களில் வேகமாகப் பரவியது.

மீண்டும் ஒரு ‘லாக்கப் மரணம்’ என்று பலரும் சந்தேகம் எழுப்பிய நிலையில், கோவை மாநகர காவல் ஆணையர் சரவணசுந்தர், செய்தியாளர்களைச் சந்தித்து விளக்கமளித்தார்.

”நேற்று (ஆகஸ்ட் 5) இரவு, பி 1 காவல் நிலையத்தில், காவலர் செந்தில்குமார் பணியில் இருந்த போது, 11.15 மணிக்கு ஒருவர் பதற்றமாக ஓடிவந்துள்ளார். தன்னை 25 பேர் துரத்தி வருவதாகக் கூறியுள்ளார். காவலர் செந்தில்குமார் வெளியே சென்று பார்த்துள்ளார். அங்கே யாருமில்லை என்பதால், மறுநாள் காலையில் வருமாறு அனுப்பியுள்ளார்.

அதன்பின் தொலைபேசி அழைப்பை எடுப்பதற்காக உள்ளே சென்றுள்ளார். அந்த நேரத்தில் அந்த நபர், அவருக்கு தெரியாமல் மாடிப்படியேறி மேலே சென்றுள்ளார். அங்கே உதவி ஆய்வாளர் அறைக்கு சென்று தற்கொலை செய்து கொண்டுள்ளார்.” என்று தெரிவித்தார் சரவணசுந்தர்.

மேலும், ”இது லாக்கப் டெத் இல்லை. காவல் நிலையத்தில் யாருக்கும் தெரியாமல் ஒருவர் தற்கொலை செய்து கொண்டுள்ளார். இறந்து போன நபரின் பாக்கெட்டில் இருந்த சிறு டைரியை வைத்து அவருடைய பெயர் ராஜன் என்ற அறிவொளி ராஜன் (வயது 60) என்பதும், பேரூர் அருகேயுள்ள ராமசெட்டிபாளையத்தைச் சேர்ந்தவர் என்பதும் தெரிய வந்திருக்கிறது.” என்றும் காவல் ஆணையர் சரவணசுந்தர் தெரிவித்தார்.