கடந்த சில ஆண்டுகளாக தலைமை நீதிபதி அலுவலகம் பொதுமக்களால் அதிகம் கவனிக்கப்படுகிறது. ஒரு நீதிபதியின் பணி மூப்பு, குறிப்பிட்ட தேதியில் அவரால் விசாரணையை மேற்கொள்ள முடியுமா என்பதை பொருத்து உச்ச நீதிமன்ற நீதிபதிகளுக்கு வழக்குகள் ஒதுக்கப்படுவதை தீர்மானிப்பவராக தலைமை நீதிபதியே இருக்கிறார். இதனால், உச்ச நீதிமன்ற தலைமை நீதிபதி ‘மாஸ்டர் ஆஃப் தி ரோஸ்டர்’ என அழைக்கப்படுகிறார்.

வழக்குகள் பட்டியலிடப்படுவது அவ்வப்போது தலைமை நீதிபதியால் மாற்றியமைக்கப்படுகிறது.

இதனால், தலைமை நீதிபதியின் அதிகாரங்கள் தன்னிச்சையானதாக இருப்பதாகவும் அவருக்கு சாதகமான விசாரணை முடிவுகளை பெறும் வண்ணம் அதை தவறாக பயன்படுத்துவதற்கான வாய்ப்பு இருப்பதாகவும் அவ்வப்போது விமர்சனங்கள் எழுந்துள்ளன.

அரசியல் கைதியின் ஜாமீன் விசாரணை அல்லது சட்டமன்றம் அல்லது (அரசு) நிர்வாகத்திற்கு எதிரான வழக்குகளை, குறிப்பிட்ட நீதிபதிகளுக்கு முன்பு பட்டியலிடும் போது, அதனால் நியாயமற்ற தீர்ப்புகள் வருவதற்கான சாத்தியம் இருப்பதாக விமர்சனம் எழுந்தது.

நீதித்துறை சுதந்திரமும் வெளிப்படைத்தன்மைக்கான தேவையும் ஒன்றுக்கொன்று முரணானது இல்லை எனும் தீர்ப்பை வழங்கியவர் நீதிபதி கன்னா. எனவே, தன் அதிகாரங்களை செயல்படுத்துவதிலும் கொலீஜியத்தின் செயல்பாட்டிலும் கன்னா வெளிப்படைத்தன்மையை பின்பற்றுவாரா என கேள்வி எழுப்பப்படுகின்றது.

தலைமை நீதிபதியின் கீழ் உள்ள உச்ச நீதிமன்ற கொலீஜியத்தின் செயல்பாடுகளில் வெளிப்படைத்தன்மையை ஏற்படுத்த அடுத்தடுத்து வந்த தலைமை நீதிபதிகள் முயற்சிகள் மேற்கொண்டாலும் அதன் செயல்பாடுகள் இன்னும் ரகசியமானதாகவே உள்ளது

பல்வேறு உயர் நீதிமன்றங்களுக்கு புதிய நீதிபதிகளைத் தேர்ந்தெடுப்பது தொடர்பாக அரசாங்கத்துடன் முடிவடையாத போரில் கொலீஜியம் (அரசு) நிர்வாகத்திற்கு முன்னுரிமை அளித்து வருவது அடிக்கடி கவனிக்கப்படுகிறது. கொலீஜியம் தனது பரிந்துரையை மீண்டும் வலியுறுத்தினால், அதனை அரசு கடைபிடிக்க வேண்டும் என்பது சட்டமாக இருந்தாலும் இவ்வாறு செய்யப்படுகிறது.

நீதிபதி சஞ்சீவ் கன்னா இந்த போக்கில் ஏதேனும் மாற்றத்தைக் கொண்டு வருவாரா? அடுத்தடுத்து வந்த தலைமை நீதிபதிகள் இதனை ஒரு நிர்வாக பிரச்னையாக கருதினர். கொலீஜியத்தால் பரிந்துரைக்கப்பட்ட நீதிபதிகளின் நியமனம் அல்லது பணியிட மாற்றத்தை தாமதப்படுத்தும் அரசை நீதித்துறை ரீதியாக ஒழுங்குபடுத்த செய்யப்படும் முயற்சிகள் வெற்றிபெற வாய்ப்பில்லை.

நீதிபதி கன்னா சில முக்கியமான உத்தரவுகளை பிறப்பித்துள்ளார். அதிலிருந்து அவர் (அரசு) நிறுவனத்திற்கு ஆதரவானவராக பலராலும் பார்க்கப்படுகிறார்.

மின்னணு வாக்குப்பதிவு இயந்திரங்களில் செலுத்தப்படும் 100 சதவிகித வாக்குகளையும் அதன் விவிபாட் எனும் ஒப்புகை சீட்டுகளுடன் சோதித்துப் பார்க்க வேண்டும் என கோரிய மனுவை அவர் நிராகரித்தார். தற்போது, ஒரு தொகுதியில் தேர்ந்தெடுக்கப்பட்ட ஐந்து வாக்குப்பதிவு மையங்களில் மட்டுமே ஒப்புகை சீட்டுகள் சோதிக்கப்படுகின்றன.

கன்னா தலைமையில் அமைக்கப்பட்ட உச்ச நீதிமன்ற அமர்வு, டெல்லி முன்னாள் முதலமைச்சர் அரவிந்த் கேஜ்ரிவாலுக்கு மக்களவை தேர்தலில் பிரசாரத்தில் ஈடுபட முதலில் இடைக்கால ஜாமீன் வழங்கியது. அதன்பின் ஜூலை மாதம், 90 நாட்கள் நீண்ட சிறைவாசத்தை கருத்தில் கொண்டு வழக்கமான ஜாமீன் வழங்கியது. நீதிமன்றத்தால் விதிக்கப்பட்ட நிபந்தனைகளால், முதலமைச்சராக தொடர்வதில் கட்டுப்பாடுகள் ஏற்பட்டதால் அவர் தன் பதவியை ராஜினாமா செய்தார்.

ஜம்மு மற்றும் காஷ்மீருக்கு சிறப்பு அந்தஸ்து வழங்கிய அரசியலமைப்பின் 370வது பிரிவை ரத்து செய்வதை உறுதிப்படுத்தும் கருத்தை அவர் தெரிவித்தார். நாட்டின் மற்ற பகுதிகளில் உள்ள குடிமக்கள் அனுபவிக்கும் அந்தஸ்து மற்றும் உரிமைகளை ஜம்மு மற்றும் காஷ்மீர் மக்கள் இப்போது அனுபவிப்பது தொடரும் என்றும், பிரிவு 370 ரத்து செய்யப்பட்டது கூட்டாட்சி அமைப்பை மறுப்பதாகாது என்றும் அவர் கருத்து தெரிவித்தார்.

லடாக் யூனியன் பிரதேசத்தை உருவாக்குவதை உறுதிப்படுத்தும் அதே வேளையில், ஜம்மு காஷ்மீர் யூனியன் பிரதேசத்தின் மாநில அந்தஸ்தை மீட்டெடுப்போம் என்ற அரசாங்கத்தின் பதிலை தலைமை நீதிபதி டி.ஒய். சந்திரசூட் மற்றும் சஞ்சய் கிஷனுடன் ஏற்றுக்கொண்டார் சஞ்சீவ் கன்னா. ஆனால், தன் தனிப்பட்ட தீர்ப்பில், ஒரு மாநிலத்தை யூனியன் பிரதேசமாக மாற்றுவது, கவலைக்குரிய விளைவுகளை ஏற்படுத்தும் என்றும், கூட்டாட்சியின் மீது பாதிப்பை ஏற்படுத்தும் என்றும் அவர் உறுதிப்படுத்தினார்.

யூனியன் பிரதேசத்தை உருவாக்க அரசியலமைப்பு சட்டத்தின் பிரிவு 3-ஐ நிச்சயம் பின்பற்ற வேண்டும் என்றும் அவர் கூறினார். ஆனால், இந்த நிபந்தனைகளை அரசு பின்பற்றியதா என அவர் கூறவில்லை.