இந்திய வெளியுறவுச் செயலாளர் விக்ரம் மிஸ்ரி “இது இன்று முன்னதாக எட்டப்பட்ட உடன்பாட்டை மீறுவதாகும். இதற்கு இந்திய ஆயுதப்படைகள் தகுந்த பதிலடி கொடுத்து வருகின்றன” என்று கூறினார், மேலும் “இந்த மீறல்களை உடனடியாக நிறுத்திக் கொள்ளுமாறு பாகிஸ்தானை அவர் கேட்டுக் கொண்டார்.

இதற்கு பதிலளிக்கும் விதமாக செய்தியாளர்களிடம் பேசிய பாகிஸ்தான் வெளியுறவு அமைச்சகத்தின் செய்தித் தொடர்பாளர் “இன்று அறிவிக்கப்பட்ட பாகிஸ்தானுக்கும் இந்தியாவிற்கும் இடையிலான சண்டை நிறுத்தத்தை உண்மையாக செயல்படுத்துவதற்கு பாகிஸ்தான் உறுதிபூண்டுள்ளது. சில பகுதிகளில் இந்தியா அத்துமீறல்களைச் செய்தாலும், நமது படைகள் நிலைமையை பொறுப்புடனும் நிதானத்துடனும் கையாளுகின்றன. சண்டை நிறுத்தத்தை சுமூகமாக செயல்படுத்துவதில் ஏதேனும் சிக்கல்கள் இருந்தால், பொருத்தமான மட்டங்களில் தொடர்பு கொண்டு தீர்க்கப்பட வேண்டும் என்று நாங்கள் நம்புகிறோம். தரையில் உள்ள துருப்புகளும் நிதானத்தைக் கடைப்பிடிக்க வேண்டும்.” என்றார்.

முன்னதாக, சண்டை நிறுத்தத்தை உறுதிப்படுத்திப் பேசிய போது இந்தியாவின் வெளியுறவு அமைச்சர் எஸ். ஜெய்சங்கர், “பயங்கரவாதத்திற்கு எதிராக, அதன் அனைத்து வடிவங்களிலும் வெளிப்பாடுகளிலும் இந்தியா தொடர்ந்து உறுதியான மற்றும் சமரசமற்ற நிலைப்பாட்டைக் கடைப்பிடித்து வருகிறது. அது தொடரும்” என்றார்.

பாகிஸ்தான் பிரதமர் ஷெபாஸ் ஷெரீப் தனது நாட்டு மக்களுக்கு ஆற்றிய உரையில், “அனைவரின் நலனுக்காக” சண்டை நிறுத்தம் எட்டப்பட்டதாகக் கூறினார்.

இந்தியா – பாகிஸ்தான் சண்டை நிறுத்த அறிவிப்புக்குப் பிறகு பேசிய அமெரிக்க வெளியுறவுச் செயலாளர் மார்கோ ரூபியோ, இந்தியாவும் பாகிஸ்தானும் நடுநிலையான இடத்தில் பரந்த அளவிலான பிரச்னைகள் குறித்து பேச்சுவார்த்தைகளைத் தொடங்க ஒப்புக்கொண்டதாகக் கூறினார்.

தானும் அமெரிக்க துணை அதிபர் ஜே.டி. வான்ஸும் இந்திய மற்றும் பாகிஸ்தான் மூத்த அதிகாரிகளுடன் 48 மணிநேரம் செலவிட்டதாக அவர் கூறினார், அதில் அந்தந்த நாடுகளின் பிரதமர்கள் நரேந்திர மோடி மற்றும் ஷெபாஸ் ஷெரீப் ஆகியோர் அடங்குவர்.