1

தமிழ், தெலுங்கு, மலையாளம், கன்னடம், உள்ளிட்ட தென்னிந்திய மொழிகளில் சிறந்த குணசித்திர நடிகராகவும், கதையின் நாயகனாகவும் வலம் வரும் சமுத்திரக்கனி முதன்மையான கதாபாத்திரத்தில் நடித்திருக்கும் ‘ ராமம் ராகவம் ‘ எனும் திரைப்படத்தின் வெளியீட்டு திகதி அதிகாரப்பூர்வமாக அறிவிக்கப்பட்டிருக்கிறது.

இயக்குநர் தன்ராஜ் கொரனானி இயக்கத்தில் உருவாகி இருக்கும் ‘ ராமம் ராகவம் ‘ எனும் திரைப்படத்தில் சமுத்திரக்கனி , தன்ராஜ் கொரனானி, ஹரிஷ் உத்தமன் , சத்யா,  மோக்ஷா சென் குப்தா , பிரமோதினி , சீனிவாஸ் ரெட்டி , பிரித்விராஜ் உள்ளிட்ட பலர் நடித்திருக்கிறார்கள். துர்கா பிரசாத் ஒளிப்பதிவு செய்திருக்கும் இந்த திரைப்படத்திற்கு அருள் சில்லுவேரு இசையமைத்திருக்கிறார். தந்தைக்கும் மகனுக்கும் இடையேயான உறவை மையப்படுத்திய இந்த திரைப்படத்தை சிலேட் பென்சில் ஸ்டோரீஸ் நிறுவனம் சார்பில் தயாரிப்பாளர் பிருத்வி பொலவரபு தயாரித்திருக்கிறார். இந்த திரைப்படத்தை பிரபாகர் ஆரிபாகா வழங்குகிறார்.

அனைத்து பணிகளும் நிறைவடைந்து வெளியீட்டிற்காக காத்திருக்கும் இப்படத்தின் டீசர் வெளியாகி ஒரு மில்லியனுக்கும் மேற்பட்ட பார்வையாளர்களால் பார்வையிடப்பட்டு படத்தை முதல் நாள் முதல் காட்சியில் பார்க்க வேண்டும் என்ற ஆர்வத்தை உண்டாக்கி இருக்கிறது. இந்நிலையில் இந்த திரைப்படம் எதிர்வரும் பெப்ரவரி மாதம் 28 ஆம் திகதியன்று உலகம் முழுவதும் பட மாளிகையில் தமிழ் மற்றும் தெலுங்கு மொழியில் வெளியாகும் என படக் குழுவினர் உற்சாகத்துடன் அறிவித்துள்ளனர்.

இதனிடையே சமுத்திரக்கனி கதையின் நாயகனாக நடித்து வெளியான ‘திரு. மாணிக்கம் ‘ எனும் திரைப்படம் வணிக ரீதியாகவும், விமர்சன ரீதியாகவும் பாரிய வெற்றியைப் பெற்றதால், அவருடைய நடிப்பில் வெளியாகும் ‘ராமம் ராகவம் ‘ படத்திற்கும் ரசிகர்களிடத்திலும் , திரையுலக வணிகர்களிடத்திலும் பெரும் எதிர்பார்ப்பு ஏற்பட்டிருக்கிறது என்பது குறிப்பிடத்தக்கது.