உயிரிழந்தவர்களில் உடல்களை பிரேத பரிசோதனை செய்ய ஏற்பாடுகள் நடைபெற்று வருவதாகவும், தற்போது நிலைமை கட்டுக்குள் இருப்பதாகவும் அவர் கூறினார்.

ஆஞ்சநேய குமார் கூறுகையில், கலவரத்தின் தீவிரத்தை அதிகரிக்கும் விதமாக கல் வீச்சு சம்பவத்தில் ஈடுபட்ட இரண்டு பெண்கள், சிறுவர்கள் உள்பட 15 பேர் கைது செய்யப்பட்டுள்ளனர். மேலும் நீதிமன்ற உத்தரவுப்படி ஆய்வுப் பணிகள் அமைதியாக நடந்தன என்றார்.

செய்தியாளர்களிடம் பேசிய சம்பல் காவல்துறை கண்காணிப்பாளர் (எஸ்பி) கிருஷ்ண குமார், வன்முறை கும்பல் துப்பாக்கிச் சூடு நடத்தியதாகவும், அதற்குப் பதிலடியாக காவல்துறையும் துப்பாக்கிச் சூடு நடத்தியதாகவும் கூறினார். மேலும் கல் வீச்சில் ஏராளமான காவல்துறையினர் காயமடைந்துள்ளதாகவும் அவர் கூறினார்.

காவல்துறை உயரதிகாரிகள் மற்றும் பிற அதிகாரிகள் சம்பல் பகுதியில் நிலைமையைக் கண்காணித்து வருவதாகவும் அவர் தெரிவித்தார்.

ஞாயிற்றுக்கிழமை நடந்த சம்பவம் குறித்து காவல்துறை கண்காணிப்பாளர் கிருஷ்ண குமார் கூறியதாவது: “நீதிமன்ற உத்தரவின்படி கோட்வாலி சம்பல் பகுதியில் ஆய்வுப் பணிகள் நடைபெற்று வந்தன. ஆய்வுப் பணிகள் அமைதியாக நடந்து கொண்டிருந்தன. அந்த நேரத்தில் பல தெருக்களில் இருந்து மக்கள் வெளியே வந்து திடீரென காவல்துறை மீது கற்களை வீசித் தாக்கினர்.”

“தடியடி நடத்தி கூட்டம் கலைக்கப்பட்டது. கற்களை வீசிய மக்கள் மீது கண்ணீர்ப் புகை குண்டுகளும் வீசப்பட்டன. சம்பல் பகுதியில் 144 தடை உத்தரவு அமலில் உள்ளது” என்றார்.

கிருஷ்ண குமார் மேலும் கூறுகையில், “வன்முறையைத் தூண்டியவர்களை சிசிடிவி கேமராக்கள் மூலம் அடையாளம் காணப்பட்டு அவர்கள் மீது கடுமையான சட்ட நடவடிக்கை எடுக்கப்படும். இனிமேல் வன்முறையில் ஈடுபட நினைக்கும் மக்கள் நினைவில் கொள்ளும் வகையில் கடுமையான நடவடிக்கை எடுக்கப்படும்” என்றார்.

சம்பலில் நடந்த கல் வீச்சுத் தாக்குதல் குறித்து உத்தர பிரதேச டிஜிபி பிரசாந்த் குமார் ஏஎன்ஐ செய்தி முகமையிடம் பேசுகையில், “சில சமூக விரோதிகள் கற்களை வீசித் தாக்குதல் நடத்தினர். தற்போது காவல்துறை மற்றும் உயரதிகாரிகள் சம்பவ இடத்தில் உள்ளனர். நிலைமை கட்டுக்குள் உள்ளது. கல் வீசியவர்களை காவல்துறை கண்டறிந்து அவர்கள் மீது உரிய நடவடிக்கை எடுப்பார்கள்’’ என்றார்.