அப்படி ஒருமுறை பயன்படுத்திய அழுக்கு ஆடைகளை மீண்டும் துவைத்துப் பயன்படுத்தும் வசதி அங்கு கிடையாது. ஆகையால், அவை குப்பையாகவே சேர்கின்றன.

அதேபோல, அவர்கள் தண்ணீர், காபி குடிக்கப் பயன்படுத்திய பொருட்கள், உணவருந்தப் பயன்படுத்திய பொருட்கள் அனைத்தும் குப்பையாகவே சேர்கின்றன.

தண்ணீர் பெரும்பாலும் காற்று புகாத, சீல் செய்யப்பட்ட பைகளில் ஒரு ஸ்டிராவுடன் வழங்கப்படுகிறது. விண்வெளி வீரர்கள் அந்த ஸ்டிராவை பயன்படுத்தி தண்ணீரைப் பருக வேண்டும். தண்ணீர், காபி, ஜூஸ் போன்ற திரவங்களைப் பருக இத்தகைய பவுச்களே விண்வெளியில் பயன்படுத்தப்படுகின்றன.

ஆனால், இவையனைத்தும் ஒருமுறை மட்டுமே பயன்படுத்தக்கூடியவை என்பதால் குப்பையாகச் சேர்கின்றன.

அதேபோல, காற்று புகாத கன்டெய்னர்களில், நீண்ட நாட்களுக்கு வைத்துப் பயன்படுத்தும் வகையில்தான் உணவும் அடைத்து வைத்து அனுப்பப்படுகின்றன. ஆகவே அவையும் சாப்பிட்டு முடித்த பிறகு குப்பையாகச் சேரும்.

அதுபோக அவர்கள் உடலில் இருந்து வெளியேற்றப்படும் சிறுநீர் மற்றும் மலமும் கழிவாகச் சேர்கிறது. இதில், சிறுநீர் சுத்திகரிப்பு செய்யப்பட்டு மீண்டும் தண்ணீராகப் பயன்படுத்தப்படுகிறது. ஆனால், மலம் கழிவாகவே சேர்கிறது.

சர்வதேச விண்வெளி நிலையத்தில் இருக்கும் வீரர்கள் உடுத்தும் ஆடைகள், சாப்பிட்ட பிறகு மீதமிருக்கும் குப்பைகள், அவர்களின் மலம், அவர்கள் பயன்படுத்திவிட்டுப் போடும் பழைய பேட்டரிகள் மற்றும் பிற பொருட்கள் எனப் பல குப்பைகள் சேர்கின்றன.

அவற்றை என்ன செய்வார்கள்?

பொதுவாக சர்வதேச விண்வெளி நிலையத்தில் வாழும் விண்வெளி வீரர்களுக்குத் தேவையான உணவு மற்றும் பிற பொருட்களை அவ்வப்போது ஒரு சரக்கு விண்கலம் மூலமாக அனுப்பி வைப்பார்கள்.

அப்படி அனுப்பி வைக்கப்படும் விண்கலத்தில் இருக்கும் சரக்குகள் காலியான பிறகு, அதிலேயே தங்கள் குப்பைகளை அடைத்து வைத்து, விண்வெளி நிலையத்தில் இருந்து அன்-டாக் செய்வார்கள். (undock – சர்வதேச விண்வெளி நிலையத்துடன் இணைந்திருக்கும் விண்கலத்தைத் தனியாகப் பிரித்துவிடும் செயல்முறை).

அப்படி அன்-டாக் செய்யப்பட்ட குப்பைகள் நிரப்பிய விண்கலம், பூமியின் சுற்றுவட்டப் பாதையில் சுற்றிக்கொண்டே இருக்கும். சில நேரங்களில் வளிமண்டலத்திற்குள் நுழைந்து பூமியிலும் விழும். அப்படியொரு சம்பவம் கடந்த ஆண்டிலும் நடந்தது.

கடந்த ஆண்டு மார்ச் 8ஆம் தேதி, இத்தாலியில் வாழும் அலெஜான்ட்ரோ ஒட்டேரா என்பவரின் வீட்டுக் கூரையைப் பிய்த்துக்கொண்டு ஏதோ வானிலிருந்து விழுந்துள்ளது. அதை ஆய்வு செய்தபோது, விண்ணில் 400கி.மீ உயரத்தில் பூமியைச் சுற்றி வரும் சர்வதேச விண்வெளி நிலையத்தில் இருந்து கழிவாக வீசப்பட்ட ஒரு பேட்டரி அவரது கூரையைப் பிய்த்துள்ளது.

இப்படியாக, கோடிக்கணக்கான குப்பைகள் விண்வெளியில் சுற்றிக் கொண்டிருக்கின்றன. இந்த விண்வெளிக் குப்பைகளைக் கையாள்வது ஒரு மிகப்பெரிய சவாலாக உருவெடுத்து வருகிறது.