விண்வெளி நிலையம் பூமியின் தாழ் வட்டப்பாதையில் (Low earth orbit – பூமியிலிருந்து 160-2000 கிமீ வரையிலான உயரம்), அதுவும் பூமியின் மேற்பரப்பிலிருந்து வெறும் 415 கி.மீ உயரத்தில் சுற்றி வருகிறது. அப்படி இருக்கும்போது, அதன் பாகங்கள் பூமியில் எங்கு விழும்?

சர்வதேச விண்வெளி நிலையம், மணிக்கு 17,500 மைல் வேகத்தில் பயணிக்கிறது. அதாவது 90 நிமிடங்களுக்கு ஒருமுறை என்ற கணக்கில் ஒரு நாளைக்கு சராசரியாக 16 முறை பூமியைச் சுற்றி வருகிறது.

இத்தகைய வேகத்தில் சுற்றும் ஒரு பிரமாண்ட கட்டமைப்பு திடீரென கட்டுப்பாடின்றி, பூமியின் வளிமண்டலத்திற்குள் நுழைந்தால் அதன் தாக்கம் என்னவாக இருக்கும் என்று கற்பனை செய்வதே அச்சமூட்டுவதாக இருக்கும்.

ஆனால், அப்படி ஒரு ஆபத்தான சூழல் ஏற்பட்டுவிடக் கூடாது என்பதற்காகவே 2031இல், சர்வதேச விண்வெளி நிலையத்தின் செயல்பாடுகளை நிறுத்த நாசா முடிவு செய்துள்ளது.

அதற்குக் காரணம் மிகவும் எளிமையானது. சர்வதேச விண்வெளி நிலையத்திற்கு வயதாகிவிட்டது.

ரஷ்யா, அமெரிக்கா, கனடா, ஜப்பான் மற்றும் பல ஐரோப்பிய நாடுகள் இணைந்து கூட்டாக இந்த விண்வெளி நிலையத்தை 1998இல் கட்டமைத்தன. பிறகு பல்வேறு கட்டங்களாக அது மேம்படுத்தப்பட்டது. தொடக்கத்தில் 15 ஆண்டுகள் செயல்படுவதற்காகவே இது வடிவமைக்கப்பட்டது.

இருப்பினும், அறிவியல் ஆராய்ச்சி மற்றும் விண்வெளித் துறையின் சர்வதேச கூட்டு முயற்சியில் அதன் தொடர்ச்சியான வெற்றி காரணமாக, விண்வெளி நிலையத்தின் ஆயுட்காலம் பலமுறை நீட்டிக்கப்பட்டது.

இறுதியாக, முன்னாள் அமெரிக்க அதிபர் பைடனின் நிர்வாகத்தில் (2021ஆம் ஆண்டு) இந்த விண்வெளி நிலையத்தின் ஆயுளை 2030 வரை நீட்டிப்பதாக முடிவு செய்யப்பட்டது.

ஆனால், அதே ஆண்டில்(2021) இந்த விண்வெளி நிலையம் தொடர்பாக ரஷ்யாவில் இருந்து ஓர் எச்சரிக்கை வெளியானது. காலாவதியான கருவிகள், வன்பொருள்கள் காரணமாக சர்வதேச விண்வெளி நிலையத்தில் சரிசெய்ய முடியாத கோளாறுகள் ஏற்படலாம் என்பதே அந்த எச்சரிக்கை.

சர்வதேச விண்வெளி நிலையத்தின் ரஷ்ய பகுதியில் உள்ள கருவி அமைப்புகளில் 80 சதவீதம் காலாவதியானவை என்றும், இது தவிர, சிறிய விரிசல்கள் தென்படுவதாகவும் அது காலப்போக்கில் பெரிதாகலாம் என்றும் ரஷ்யாவை சேர்ந்த முன்னாள் விண்வெளி வீரர் விளாதிமிர் சோலோவ்யோவ் தெரிவித்தார்.

இதற்கிடையே சமீபத்தில், ஈலோன் மஸ்க் தனது எக்ஸ் பக்கத்தில், 2030 வரைகூட அவகாசம் அளிக்கக்கூடாது, இன்னும் இரண்டு ஆண்டுகளுக்குள் சர்வதேச விண்வெளி நிலையத்தை செயலிழக்கச் செய்ய வேண்டும் என்று பிப்ரவரி மாதம் தெரிவித்திருந்தார். அதேநேரம், இது தொடர்பான முடிவை அதிபர் டிரம்ப்தான் எடுக்க வேண்டும் என்று குறிப்பிட்டிருந்தார்.

“சர்வதேச விண்வெளி நிலையத்தை சுற்றுப்பாதையில் இருந்து அகற்றுவதற்கான பணிகளைத் தொடங்க வேண்டிய நேரம் இது. எந்தக் காரணத்திற்காக அது நிறுவப்பட்டதோ, அது பூர்த்தியாகிவிட்டது. இனி நாம் செவ்வாய்க் கோளில் கவனம் செலுத்துவோம்” என்று அந்தப் பதிவில் கூறியிருந்தார் ஈலோன் மஸ்க்.