கிரிக்கெட் உலகில் சமீப ஆண்டுகளில் ஒரு நாள் போட்டிகளை நடத்துவது குறைந்து வருகிறது. டெஸ்ட், டி20 போட்டிகளுக்குத்தான் அதிக முக்கியத்துவம் அளிக்கப்பட்டு வரும் நிலையில், இந்த சாம்பியன்ஸ் டிராபி ஒருநாள் ஒருநாள் போட்டிக்கு புத்துயிர் கொடுக்கும் என்று எதிர்பார்க்கப்படுகின்றது.

டி20 ஃபார்மெட்டுக்கு மாறிவிட்ட பெரும்பாலான கிரிக்கெட் வீரர்கள் ஒருநாள் போட்டிக்கு மாற மிகுந்த சிரமப்பட்டு இளம் வயதிலேயே ஓய்வை அறிவிக்கும் நிலைக்கு வருகிறார்கள். சமீபத்தில் ஆஸ்திரேலிய வீரர் மார்கஸ் ஸ்டாய்னிஸ் சாம்பியன்ஸ் டிராபி நெருங்கி வரும் நிலையில் திடீரென ஒருநாள் போட்டியிலிருந்து ஓய்வு பெறுவதாக அறிவித்தார்.

இருப்பினும் இன்னும் சில அணிகள் ஒருநாள், டெஸ்ட் போட்டிகள் மீதான ரசிகர்களின் ஆர்வத்தை தக்க வைக்க, அவற்றை தொடர்ந்து விளையாடி வருகின்றன. குறிப்பாக ஆஸ்திரேலிய அணி ஒருநாள் உலகக் கோப்பை, டெஸ்ட் சாம்பியன்ஷிப் பட்டங்களை வென்றுள்ளது. அடுத்ததாக டெஸ்ட் சாம்பியன்ஷிப் இறுதிப்போட்டிக்கும் தன்னை தயார் செய்துள்ளது.

இந்திய அணி கடந்த ஆண்டு இலங்கை அணிக்கு எதிராக ஒருநாள் போட்டி விளையாடிய நிலையில் சமீபத்தில்தான் இங்கிலாந்து அணியுடன் ஒருநாள் தொடரில் விளையாடியது. தென் ஆப்பிரிக்கா, இங்கிலாந்து அணிகள் ஒருநாள் போட்டிகளில் விளையாடினாலும் பெரும்பாலான இருநாடுகளுக்கான தொடர்களில் ஒருநாள் போட்டித்தொடர்களைவிட, டி20 தொடர்களுக்கே அதிக முக்கியத்துவம் அளிக்கிறார்கள்.

ஆனால், நியூசிலாந்து, ஆப்கானிஸ்தான், பாகிஸ்தான், வங்கதேசம் அணிகள் தங்களை ஒருநாள் போட்டிகள், டி20 போட்டிகளில் தொடர்ந்து ஈடுபடுத்தி ஃபார்மில் வைத்து வருகிறார்கள். குறிப்பாக பாகிஸ்தான் அணி சாம்பியன்ஸ் டிராபியை மனதில் வைத்து சமீபத்தில் முத்தரப்பு தொடரை நடத்தியது, டெஸ்ட் தொடர்களிலும் விளையாடியது. நியூசிலாந்து அணியும் முத்தரப்பு ஒருநாள் தொடரில் பங்கேற்று தன்னை ஃபார்மில் வைத்துள்ளது.

இந்த சாம்பியன்ஸ் டிராபி தொடர் மறந்துவரும் ஒருநாள் கிரிக்கெட்டை ரசிகர்கள் மனதில் மீண்டும் எழ வைக்கவும், பாகிஸ்தானில் மீண்டும் சர்வதேச கிரிக்கெட்டுக்கான ஏதுவான சூழலை உருவாக்கவும் பயன்படும் என்று ஐசிசி நம்புகிறது.