இந்த சம்பவத்தில் என்ன நடந்தது? இம்மாதிரியான பாலியல் துன்புறுத்தல்களை பெண் குழந்தைகள் தாமாக முன்வந்து கூறுவதில் உள்ள சிக்கல்கள் என்ன, அவற்றை எப்படி களைவது என அலசுகிறது இந்த கட்டுரை.

சிவகங்கை அருகே உள்ள ஒரு கிராமத்தில் செயல்பட்டு வரும் அரசு நடுநிலைப் பள்ளியில் கடந்த வாரம் குழந்தைகளுக்கான விழிப்புணர்வு நிகழ்ச்சியை குழந்தைகள் நல பாதுகாப்புக் குழுவினர் நடத்தினர்.

இப்பள்ளியில் பயிலும் பெண் குழந்தைகளுக்கு பாலியல் அத்துமீறல்கள் குறித்தும், ‘குட் டச், பேட் டச்’ குறித்தும் விழிப்புணர்வு வகுப்பு எடுக்கப்பட்டது. அப்போது, இதுபோன்ற அத்துமீறல்களை சந்தித்திருக்கிறீர்களா என அக்குழந்தைகளிடம் கேள்வி எழுப்பப்பட்டது. அப்போது, அதில் ஏழு பெண் குழந்தைகள், ஏழு நபர்கள் மீது பாலியல் அத்துமீறல் உள்ளிட்ட புகார்களை தெரிவித்துள்ளனர்.

இதையடுத்து, குழந்தைகள் பாதுகாப்பு நல குழுவினர் மானாமதுரை உட்கோட்ட துணை காவல் கண்காணிப்பாளரிடம் தகவல் கொடுத்ததன் அடிப்படையில், சிவகங்கை சிப்காட் அனைத்து மகளிர் காவல் நிலையத்தில் பாதிக்கப்பட்ட மாணவிகளின் பெற்றோர்கள் புகார் அளித்தனர்.

அதன்பேரில், ராமு (46), பழனி (42), மணி (50), சசிவர்ணம் (38), லெட்சுமணன் (46), முனியன் (66), மூக்கன் (72) ஆகிய ஏழு பேரிடம் அனைத்து மகளிர் காவல் நிலைய போலீசார் விசாரணை மேற்கொண்டனர். பிறகு அவர்கள் மீது போக்சோ சட்டத்தின் கீழ் வழக்குப் பதிவு செய்யப்பட்டது.

அவர்கள் கைது செய்யப்படும் சமயத்தில், பாதிக்கப்பட்ட குழந்தைகளின் பெற்றோர்கள் அவர்களை தாக்கியதில், காயமடைந்த அவர்கள் சிவகங்கை அரசு மருத்துவக் கல்லூரி மருத்துவமனையில் சிகிச்சை பெற்றனர். தற்போது குற்றஞ்சாட்டப்பட்ட 7 நபர்களும் சிறையில் அடைக்கப்பட்டுள்ளனர்.

பாதிக்கப்பட்ட சிறுமியின் தந்தை ஒருவர் பிபிசி தமிழிடம் பேசுகையில், “எங்கள் ஊரில் இருந்து பள்ளிக்குப் படிக்கச் செல்லும் பெண் குழந்தைளை சிலர் பாலியல் ரீதியாக துன்புறுத்துவதாக ஆறு மாதத்திற்கு முன்பு எங்களிடம் வந்து கூறினார்கள். அதன் அடிப்படையில் சம்பந்தப்பட்ட நபர்களை பிடித்து விசாரித்து கண்டித்தோம்.

ஆனால் தொடர்ச்சியாக அவர்களுக்கு பாலியல் துன்புறுத்தல் அளித்து வந்தது எங்களுக்குத் தெரியாது. விழிப்புணர்வு நிகழ்ச்சியின் மூலம் குழந்தைகள் சொல்லித்தான் எங்களுக்குத் தெரிய வந்தது,” என கூறினார்.

இந்த பாலியல் துன்புறுத்தல் குறித்து கடந்த முறை பெற்றோரிடம் கூறியபோது, தங்களுக்குப் படிப்பறிவு இல்லாததால் காவல் நிலையத்தில் புகார் அளிக்காமல் விட்டுவிட்டதாகவும் தொடர்ந்து கிராமத்தில் கூட்டம் கூடி சம்பந்தப்பட்டவர்களை கண்டித்து மட்டும் விட்டுவிட்டதாகவும் அவர் கூறினார்.

இனியும் இத்தகைய சம்பவங்கள் நடக்காமல் இருக்க கிராமத்தில் சிசிடிவி கேமராக்கள் பொருத்துவது சம்பந்தமாக பேசி வருவதாகவும் இனி விழிப்புடன் இருப்போம் என்றும் அவர் தெரிவித்தார்.