தடயவியல் துறை மாணவர்கள் தங்களின் 12ம் வகுப்பில் இயற்பியல், வேதியியல், உயிரியல்/கணிதம் ஆகிய பாடங்களை தேர்ந்தெடுத்து படித்திருக்க வேண்டும். பெரும்பாலான கல்லூரிகளில் சேர்க்கைக்கு மாணவர்கள் தங்களின் 12ம் வகுப்பில் குறைந்தபட்சம் 50% மதிப்பெண்கள் பெற்றிருக்க வேண்டும்.

இத்துடன், தடய அறிவியல் ஒரு மாணவருக்கு சிறந்ததா, இல்லையா என்பதையும் பார்க்க வேண்டும்.

ஹிமாச்சல் பிரதேசத்தை சேர்ந்தவர் சிம்ரன் தாகூர். இவர் 2021ம் ஆண்டில் பி.எஸ்சி தடயவியல் துறையில் பட்டம் பெற்றார். தற்போது அதே துறையில் பிஹெச்டி ஆய்வு மேற்கொண்டு வருகிறார்.

12ம் வகுப்பில் உயிரியலை தேர்ந்தெடுத்து படித்தவர் சிம்ரன். அவர் மருத்துவம் பயில வேண்டும் என அவரின் குடும்பம் விரும்பியது. ஆனால், அவர் தடயவியலை தேர்ந்தெடுத்தார்.

தனக்கு இயற்பியல் மற்றும் வேதியியலும் பிடிக்கும் என சிம்ரன் கூறுகிறார். அனைத்துவித அறிவியலையும் படித்து, அதை எப்படி பயன்படுத்துவது என்பதை புரிந்துகொள்ள வேண்டும் என்பதே, தடயவியல் துறையை தேர்ந்தெடுத்ததற்கு முக்கிய காரணம் என்கிறார்.

இந்த துறையை படிக்க விரும்பும் மாணவர்களுக்கு என்ன திறன்கள் இருக்க வேண்டும் என அவரிடம் கேட்டோம்.

அவர் கூறுகையில், “முதலில், ஒன்றை உற்றுநோக்கும் திறனில் கவனம் செலுத்த வேண்டும். எங்காவது நீங்கள் நடந்து சென்று கொண்டிருந்தாலும், உங்கள் கண்கள், காதுகள் திறந்திருக்க வேண்டும். ஒவ்வொரு மூலையிலும் நீங்கள் என்ன பார்க்கிறீர்கள் என்பது தெரிந்திருக்க வேண்டும். ஒரு விஷயத்தை நீங்கள் எவ்வளவு உற்றுநோக்குகிறீர்கள் என்பதுதான் தடயவியலில் முக்கியமானது” என்றார்.

“இரண்டாவதாக, பொறுமையாக இருக்க வேண்டும். சில சமயங்களில் நாம் விரைந்து ஒரு முடிவுக்கு வந்துவிடுவோம், ஆனால் தடயவியலில் அப்படி இருக்காது. நீங்கள் கடுமையாக உழைக்க வேண்டும். ஒவ்வொரு விஷயம் குறித்தும் ஆழமான அறிவை பெற்றிருக்க வேண்டும். இறுதியாக, ஒரு பிரச்னையை தீர்க்கும் திறன்களை பெற்றிருக்க வேண்டும்” என்றார்.

நொய்டாவில் உள்ள அமிட்டி பல்கலைக்கழகத்தின் தடயவியல் துறை தலைவராக உள்ள முனைவர் விஷ்வபிரகாஷ் நாயக் கூறுகையில், தடயவியல் துறையில் பி.எஸ்சி படித்தவர்களுக்கு ஒவ்வொரு ஆண்டும் உளவுத்துறையில் (IB) வெளியிடப்படும் வேலைவாய்ப்புகளுக்கு விண்ணப்பிப்பது, அரசு வேலைகளுக்கான பெரிய வாய்ப்பாக இருக்கும் என்றார்.

அவர் கூறுகையில், “ஒவ்வொரு ஆண்டும், 1200-1300 பேர் உளவுத்துறையில் இணைகின்றனர். 2025ம் ஆண்டு உளவுத்துறையில் 4,000 ACIOக்கள் (உதவி மத்திய உளவுத்துறை அதிகாரி) மற்றும் நிர்வாகப் பணியாளர்களுக்கான ஆட்சேர்ப்பு நடைபெற்றது. ஒன்றை உற்றுநோக்கும் திறன்தான் இங்கு மிக முக்கியமானது” என்றார்.

“தடயவியல் நிபுணர்கள் உணவுத்துறையிலும் வேலை செய்கின்றனர். அவர்கள் உணவில் ஏதேனும் கலப்படம் செய்யப்பட்டுள்ளதா என்பதை கண்டுபிடிக்கின்றனர். பால், இனிப்புகள் அல்லது சீஸ் ஆகியவற்றில் கலப்படம் செய்யப்பட்டுள்ளதா என தடயவியல் நிபுணர்கள் கண்டுபிடிக்கின்றனர்.” என்றார் விஷ்வபிரகாஷ் நாயக்.

தேசிய தடய அறிவியல் பல்கலைக்கழகத்தின் சென்னை வளாக இணை பேராசிரியர் மைக்கேல் எல். வளன் கூறுகையில், “தமிழ்நாட்டில் பிரத்யேகமாக தடயவியலை படிக்க வேண்டும் என விரும்பினால், சென்னையில் தேசிய தடய அறிவியல் பல்கலைக்கழக வளாகம் உள்ளது. பிளஸ் 2 முடித்த பிறகு தேசியளவில் நடைபெறும் நுழைவுத்தேர்வின் மூலம் இங்கு சேரலாம். இது மத்திய உள்துறை அமைச்சகத்தின்கீழ் செயல்படுகிறது. ஐந்தாண்டு ஒருங்கிணைந்த படிப்புகள் இங்கு உள்ளன. இதுதவிர, எம்ஜிஆர் பல்கலைக்கழகத்திலும் தடயவியல் துறை உள்ளது.

சென்னை பல்கலைக்கழகம், ஒருசில தனியார் பல்கலைக்கழகங்கள், கல்லூரிகளில், குற்றவியல் துறை (criminology) உள்ளது. இதில் ஒரு பிரிவாக, தடயவியலை படிக்க முடியும்.” என்றார்.

தடயவியலில் பிஹெச்டி முடித்தவுடன் பல வாய்ப்புகள் இருப்பதாக சிம்ரன் தாகூர் கூறினார்.

அதன்படி, உதாரணமாக, நீங்கள் கல்வித்துறையில் கற்பிப்பதற்கு செல்லலாம்.

அடுத்ததாக, ஆய்வுகளில் ஈடுபடலாம். ஒவ்வொரு நாளும் குற்றங்கள் அதிகரித்து வருகின்றன, எனவே ஒவ்வொரு குற்றங்களும் எப்படி நிகழ்த்தப்படுகின்றன என்பதை புரிந்துகொள்ள நமக்கு புதிய தொழில்நுட்பங்கள் தேவை.

சிம்ரன் கூறுகையில், “துப்பறியும் நிறுவனங்களில் சேரலாம் அல்லது வழக்கறிஞர்களிடமும் பணிக்கு சேரலாம்.” என்றார்.

முனைவர் விஷ்வபிரகாஷ் நாயக்கும் இதையே கூறுகிறார். தடயவியலில் எம்எஸ்சி முடித்திருந்தால் பல வாய்ப்புகள் உள்ளதாக அவர் தெரிவித்தார். விரல்ரேகை ஆய்வு மற்றும் ஆவணங்களை ஆய்வு செய்வதில் சிறந்து விளங்குபவர்கள், வங்கி துறை மற்றும் காப்பீடு நிறுவனங்களிலும் சேரலாம் என்றார் அவர்.

வேதியியலில் ஆர்வம் கொண்டவர்கள் ஆய்வகங்களில் இணையலாம், தற்போது தண்ணீர், காற்று மற்றும் உணவு சம்பந்தப்பட்ட ஆய்வகங்கள் தொடங்கப்படுகின்றன.

தகவல் தொழில்நுட்பத்தில் சிறந்து விளங்குபவர்கள் ஐடி நிறுவனங்களில் இணையலாம்.

இவை தவிர்த்து, தனியார் விசாரணை முகமைகளும் தடயவியல் துறை மாணவர்களுக்கு அதிகளவில் வேலைவாய்ப்புகளை வழங்குகின்றன.

தடயவியல் மாணவர்களுக்கு சட்ட நிறுவனங்களிலும் வாய்ப்புகள் உள்ளன. வழக்கறிஞர்கள் அறிவியல் ஆய்வறிக்கைகளை புரிந்துகொள்வதில் அடிக்கடி சிரமப்படுவர். எனவே, வழக்கறிஞர்கள் நீதிமன்றங்களில் வாதங்களை முன்வைக்க தடயவியல் நிபுணர்கள் உதவ முடியும்.

– இது, பிபிசிக்காக கலெக்டிவ் நியூஸ்ரூம் வெளியீடு