ஒப்பந்தம் கையெழுத்தான நிகழ்வில் பேசிய பெட்ரோலியம் மற்றும் இயற்கை எரிவாயு துறை அமைச்சர் ஹர்தீப் சிங் பூரி, உலகில் அதிகரித்து வரும் எரிசக்தி தேவைக்கான வளர்ச்சியில் 25 சதவீதத்தை இந்தியா வழங்க உள்ளதாக தெரிவித்தார்.

தற்போது கச்சா எண்ணெய் தேவையில் 88 சதவீதமும் இயற்கை எரிவாயு தேவையில் 50 சதவீதத்தையும் இறக்குமதி சார்ந்தே நம்பியிருப்பதால், உள்நாட்டு ஆய்வு மற்றும் உற்பத்திக்கான தேவை இதுவரை இல்லாத அளவு அதிகரித்துள்ளதாக இந்திய தகவல் பணியகத்தின் செய்திக் குறிப்பு கூறுகிறது.

இந்தியாவின் இறக்குமதி சார்பு நிலையைக் குறைக்கவும் எரிசக்தியின் எதிர்காலத்தைப் பாதுகாப்பதற்கு இந்த ஒப்பந்தங்கள் சான்றாக உள்ளதாகவும் அமைச்சர் ஹர்தீப் சிங் பூரி குறிப்பிட்டார்.

அதேநேரம், இந்திய எரிசக்தி துறையின் ஏல அறிவிப்புக்கு தமிழ்நாட்டில் பல்வேறு தரப்பினரிடம் இருந்து எதிர்ப்பு கிளம்பியுள்ளது.

“தமிழ்நாட்டில் 32,485 ச.கி.மீ பரப்பளவில் எண்ணெய் மற்றும் எரிவாயு எடுப்பதன் மூலம் சுற்றுச்சூழலுக்கு சரிசெய்ய முடியாத அளவுக்கு பாதிப்பை ஏற்படுத்தும்” எனக் கூறியுள்ளார் பாட்டாளி மக்கள் கட்சியின் நிறுவனர் ராமதாஸ்.

ஆழ்கடலில் ஹைட்ரோ கார்பன் திட்டத்தைச் செயல்படுத்தினால் மீன்வளம் பாதிக்கப்படும் என மீனவர் அமைப்புகள் தொடர்ந்து வலியுறுத்தி வரும் நிலையில், எரிவாயு திட்டங்களுக்கு அனுமதி வழங்குவது நியாயமல்ல என்றும் அறிக்கையின் மூலம் அவர் தெரிவித்துள்ளார்.

இது தொடர்பாக, கடந்த மார்ச் 3-ஆம் தேதியன்று பிரதமர் நரேந்திர மோதிக்கு முதலமைச்சர் ஸ்டாலின் கடிதம் ஒன்றை எழுதியிருந்தார்.

மன்னார் வளைகுடா கடல் பகுதியில் மத்திய அரசு மேற்கொண்டுள்ள கடல்சார் ஆழ்துளை எரிவாயு கிணறுகள் அமைக்கும் நடவடிக்கை குறித்து தனது கவலையை தெரிவித்துக் கொள்வதாக அந்தக் கடிதத்தில் கூறியுள்ளார்.

தொடர்ந்து அந்தக் கடிதத்தில், மன்னார் வளைகுடா பகுதியை கடந்த 1989 ஆம் ஆண்டு உயிர்க்கோள காப்பகமாக மத்திய அரசு அறிவித்துள்ளது. பவளப் பாறைகள், கடல் புல் படுகைகள், சதுப்பு நிலங்கள், கழிமுகங்கள், சேற்றுப் படுகைகள், தீவுகள், காடுகள் என பல்வேறு சுற்றுச்சூழல் அமைப்புகளை உள்ளடக்கிய வளமான பல்லுயிர்ப் பெருக்கத்தைக் கொண்டுள்ளதாக முதலமைச்சர் ஸ்டாலின் தெரிவித்துள்ளார்.

மன்னார் வளைகுடா உயிர்க்கோள காப்பகம், ராமநாதபுரம் மற்றும் தூத்துக்குடி மாவட்ட கடற்கரைகளில் இருந்து 560 சதுர கி.மீ பரப்பளவில் 21 தீவுகள் மற்றும் பவளப் பாறைகளின் சங்கிலியைக் கொண்டுள்ளதாகவும் கடிதத்தில் ஸ்டாலின் கூறியுள்ளார்.