அடுத்த நாள் காலை இதனை கண்டித்துள்ளார் சாய். இருவருக்கும் இடையே வாக்குவாதம் நீடிக்க சாய், பாலாஜியை பணி நீக்கம் செய்துள்ளார். இதனால் ஆத்திரம் அடைந்த பாலாஜி, அடுத்த நாள் நள்ளிரவு தன்னுடைய நண்பர்களுடன் சேர்ந்து சாய் பிரசாந்தை ஆயுதங்களால் தாக்கியுள்ளார். பலத்த காயம் அடைந்த சாய் மருத்துவமனைக்கு அழைத்துச் செல்லும் வழியிலேயே உயிரிழந்தார்.

இதனைத் தொடர்ந்து மணலிபுதுநகர் காவல்துறையினர் வழக்குப் பதிவு செய்து, சம்பவத்தில் ஈடுபட்ட நபர்களை தீவிரமாக தேடி வருகின்றனர் என்று அந்த செய்தி தெரிவிக்கிறது.

உச்ச நீதிமன்ற, உயர் நீதிமன்ற நீதிபதிகள் நியமனத்தில் நாட்டின் மக்கள் தொகை விகிதத்திற்கு ஏற்பட இட ஒதுக்கீட்டை பின்பற்ற வேண்டும் என்று திமுக எம்.பி. வில்சன் நாடாளுமன்றத்தில் தனிநபர் மசோதா ஒன்றை தாக்கல் செய்துள்ளதாக இந்து தமிழ் திசை செய்தி வெளியிட்டுள்ளது.

சமூக பன்முகத்தன்மை மற்றும் பட்டியலின, பழங்குடியினர், இதர பிற்படுத்தப்பட்ட வகுப்பினர், பெண்கள், மத சிறுபான்மையினருக்கு உரிய இட ஒதுக்கீட்டை பிரதிபலிக்க சட்ட திருத்தம் மேற்கொள்வது அவசியம் என கூறி தனிநபர் மசோதாவை கொண்டு வந்துள்ளார்.

அந்த மசோதாவில், உயர் நீதிமன்றங்களில் நீதிபதிகளை நியமிக்கும் போதும், உச்ச நீதிமன்ற நீதிபதிகளாக பதவி உயர்வு வழங்கும் போதும் மாநில அரசுகளின் கருத்துகளையும் கணக்கில் எடுத்துக் கொள்ள வேண்டும். மேலும் உச்ச நீதிமன்ற கொலீஜியத்துக்கு அரசியலமைப்பின் பண்புகளை வழங்க வேண்டும், கொலீஜியத்தின் பரிந்துரைகளை ஏற்று உரிய உத்தரவுகளைப் பிறப்பிக்க மத்திய அரசுக்கு குறிப்பிட்ட காலக்கெடுவையும் நியமிக்க வேண்டும் என குறிப்பிடப்பட்டுள்ளது

”அரசியலமைப்புச் சட்டம் அமலுக்கு வந்த கடந்த 75 ஆண்டுகளில் உச்ச நீதிமன்றம் மற்றும் உயர் நீதிமன்றங்களில் மக்கள் தொகை விகிதத்துக்கு ஏற்ப இட ஒதுக்கீடு மறுக்கப்படுவது வேதனைக்குரியது” என்று மசோதாவில் குறிப்பிடப்பட்டுள்ளது என்று அந்த செய்தி தெரிவிக்கிறது.