சீனிவாசபுரம் பகுதியில் உள்ள வீடுகளை இடித்துவிட்டு புதிய குடியிருப்புகளைக் கட்ட வேண்டும என்று தமிழ்நாடு அரசுக்கு நிபுணர் குழு முன்பே பரிந்துரை செய்துள்ளது. இதன் பொருட்டு கடந்த 2022 ஆம் ஆண்டின் தொடக்கத்தில் வீடுகளைக் காலி செய்யுமாறு வாரியத்தின் மூலம் அறிவிப்பு வெளியிடப்பட்டது.

ஆனால், மீன்பிடி தொழிலுக்கு உகந்ததாக கடல் அருகே உள்ள குடியிருப்பை விட்டு வெளியேறினால் அரசு வேறிடத்தில் நிரந்தரமாக குடியமர்த்திவிடுமோ என்ற அச்சத்தில் மக்கள் அதனை ஏற்க மறுத்துவிட்டனர். இதைத் தொடர்ந்து செப்டம்பர் மற்றும் நவம்பர் மாதங்களில் மீனவ மக்களுடன் வாரியத்தின் அதிகாரிகள் பேச்சுவார்த்தை நடத்தியுள்ளனர். அதில் உடன்பாடு எட்டப்படவில்லை.

“எல்லா வீடுகளையும் இடித்துவிட்டு புதிய வீடுகளைக் கட்டித் தரப் போவதாக சொல்கிறார்கள். எங்களுக்குக் கடல்தான் தொழில். வேறு எங்கேயும் போய் பிழைக்க முடியாது. இந்த இடத்திலேயே அரசாங்கம் வீடு கட்டித் தர வேண்டும் என்று கோரிக்கை விடுத்திருக்கிறோம்” என்கிறார் கோவிந்தம்மாள்.

தலையில் சன் ஷேடு விழுந்ததால் சையது குலாப் உயிரிழந்ததைத் தொடர்ந்து, அவரது குடும்பத்துக்கு 5 லட்ச ரூபாய் நிவாரணம் வழங்கப்படும் என்று தமிழ்நாடு அரசின் தொழில்துறை மற்றும் நகர்ப்புற வாழ்விட மேம்பாட்டுத் துறை அமைச்சர் தா.மோ.அன்பரசன் அறிக்கை வாயிலாக தெரிவித்திருந்தார்.

அந்த குடியிருப்புகளின் மோசமான நிலை, பழைய கட்டடத்தை இடித்துவிட்டு புதிய கட்டடத்தை கட்டுவதற்கான நடவடிக்கைகள் குறித்து அவரிடம் விளக்கம் கேட்க முயன்றோம். “கலெக்டர் அலுவலக கூட்டத்தில் இருக்கிறார். பிறகு பேசுவார்” என்று மட்டும் அவரது உதவியாளர் பதில் அளித்தார். ஆனால் அதன் பிறகு பலமுறை முயன்றும் அவரை தொடர்பு கொள்ள முடியவில்லை. அவர் தரப்பில் விளக்கம் தரப்படும் பட்சத்தில் இந்த கட்டுரையில் பின்னர் சேர்க்கப்படும்.