முஸ்லிம் அல்லாத 2 உறுப்பினர்கள், 2 முஸ்லிம் பெண்கள், முஸ்லிம் ஒபிசி பிரிவைச் சேர்ந்த ஒரு உறுப்பினரை வக்பு கவுன்சிலில் இடம் பெறச் செய்வது, வக்பு தீர்ப்பாயத்தில் முஸ்லிம் சட்டங்களை நன்கு அறிந்த உறுப்பினரை இடம்பெறச் செய்வது உள்ளிட்ட 14 வக்பு மசோதா திருத்தங்களுக்கு மத்திய அமைச்சரவை ஒப்புதல் அளித்துள்ளதாக இந்து தமிழ் திசை செய்தி வெளியிட்டுள்ளது.

நாடாளுமன்றக் கூட்டுகுழு பரிந்துரைத்த 23 மாற்றங்களில் 14 மாற்றங்களை மத்திய அமைச்சரவை ஏற்றுக் கொண்டு ஒப்புதல் அளித்துள்ளதாக அந்தச் செய்தி கூறுகிறது.

நாட்டில் உள்ள முஸ்லிம் அறக்கட்டளை சொத்துகளை நிர்வகிப்பது தொடர்பாக மத்திய, மாநில வக்பு வாரியங்கள் முடிவெடுக்கின்றன. இதில் வெளிப்படைத் தன்மையைக் கொண்டு வரவும் வக்பு வாரிய சொத்துகள் பதிவு செய்யப்படுவதை ஒழுங்குபடுத்தவும், துஷ்பிரயோகத்தை தவிர்க்கவும், வக்பு சட்டத்தில் (1995) திருத்தங்களைக் கொண்டு வந்து அதற்கான மசோதா கடந்த ஆண்டு தாக்கல் செய்யப்பட்டது.

இதற்கு எதிர்க்கட்சியினர் கடுமையான எதிர்ப்பைப் பதிவு செய்த நிலையில், சட்டத் திருத்த மசோதா, நாடாளுமன்ற கூட்டுக்குழு ஆய்வுக்காக கடந்த ஆகஸ்ட் 8ஆம் தேதி அனுப்பப்பட்டது. இந்தக் கூட்டுக் குழுவில் பாஜக மற்றும் அதன் கூட்டணிக் கட்சிகளைச் சேர்ந்த 16 எம்.பிக்களும், எதிர்க்கட்சிகளைச் சேர்ந்த 10 எம்.பிக்களும் இடம் பெற்றிருந்தனர்.

கடந்த ஆறு மாதங்களில் 30க்கும் மேற்பட்ட ஆலோசனைக் கூட்டங்கள் நடத்தப்பட்டன. இதில் 66 மாற்றங்கள் முன்மொழியப்பட்டன. எதிர்க்கட்சியினர் கூறிய 66 மாற்றங்கள் நிராகரிக்கப்பட்டு, வாக்கெடுப்புக்குப் பிறகு, 15-11 என்ற பெரும்பான்மை அடிப்படையில் உறுப்பினர்கள் பரிந்துரைத்த மாற்றங்கள் ஏற்றுக்கொள்ளப்பட்டன.

கூட்டுக்குழு பரிந்துரை செய்த 23 மாற்றங்களில் 14 மாற்றங்களுக்கு மத்திய அமைச்சரவை கடந்த 19ஆம் தேதியன்று ஒப்புதல் அளித்துள்ளது.