கடந்த மே மாதம் அறிவிக்கப்பட்ட இந்த ஒப்பந்தத்தின்படி, பிரிட்டன் டியாகோ கார்சியாவை 99 ஆண்டுகளுக்கு குத்தகைக்கு எடுக்கும்.

அடுத்த வாரம் அமெரிக்காவிற்கும் மொரீஷியஸுக்கும் இடையே பேச்சுவார்த்தை நடத்த திட்டமிடப்பட்டுள்ள நிலையில், டிரம்பின் சமீபத்திய கருத்துக்கள் வெளியாகியுள்ளன.

புதன்கிழமை ட்ரூத் சோஷியல் தளத்தில் பதிவிட்ட டிரம்ப், “நாடுகளுக்கு இடையேயான விஷயங்களில் குத்தகை ஒப்பந்தங்கள் பலனளிக்காது என்றும், 100 ஆண்டு கால குத்தகை ஒப்பந்தத்தில் ஈடுபடுவதன் மூலம் அவர் ஒரு பெரிய தவறைச் செய்கிறார் என்றும் நான் பிரிட்டன் பிரதமர் கியர் ஸ்டாமரிடம் கூறி வருகிறேன்” என்று பதிவிட்டார்.

மேலும், டியாகோ கார்சியா “இந்தியப் பெருங்கடலில் மூலோபாய ரீதியாக அமைந்துள்ளது” என்றும் அதிபர் டிரம்ப் வலியுறுத்தினார்.

“இதற்கு முன்பு அறியப்படாத அமைப்புகளின் கோரிக்கைகளால், பிரதமர் ஸ்டாமர் இந்த முக்கியமான தீவின் மீதான கட்டுப்பாட்டை இழந்து வருகிறார்” என்று அவர் கூறினார்.

“பிரிட்டனுக்காகப் போராட நாங்கள் எப்போதும் தயாராகவும், விருப்பத்துடனும், தகுதியுடனும் இருப்போம், ஆனால் அவர்கள் ‘எழுச்சி’ (Wokeism) சிந்தனை மற்றும் அவர்களுக்கு முன்னால் உள்ள பிற பிரச்னைகளை எதிர்கொள்வதில் வலுவாக இருக்க வேண்டும்” என்றும் அவர் குறிப்பிட்டார்.

மேலும், இரானின் சர்ச்சைக்குரிய அணுசக்தித் திட்டம் குறித்து நடந்து வரும் அமெரிக்க-இரான் பேச்சுவார்த்தைகளையும் டிரம்ப் குறிப்பிட்டிருந்தார்.

அதில்,”இரான் ஒரு ஒப்பந்தத்தைச் செய்ய வேண்டாம் என்று முடிவு செய்தால், மிகவும் நிலையற்ற மற்றும் ஆபத்தான ஆட்சியின் தாக்குதலை முறியடிக்க அமெரிக்கா டியாகோ கார்சியாவைப் பயன்படுத்துவது அவசியமாக இருக்கலாம்” எனக் கூறப்பட்டிருந்தது.

அரசுக்கு எதிரான போராட்டங்கள் மீதான ஒடுக்குமுறை மற்றும் அணுசக்தி நடவடிக்கைகள் தொடர்பாக இரானுக்கு எதிராக ராணுவ நடவடிக்கையை எடுப்போம் என்று அதிபர் டிரம்ப் பலமுறை அச்சுறுத்தியுள்ளார்.

இரான் அணு ஆயுதத்தை உருவாக்கும் திசையில் நகர்வதாக அமெரிக்காவும் அதன் ஐரோப்பிய கூட்டாளிகளும் தங்களது சந்தேகத்தை வெளிப்படுத்துகின்றன. ஆனால் இக்கருத்தை இரான் தொடர்ச்சியாக மறுத்து வருகிறது.

டிரம்பின் சமீபத்திய கருத்துக்கள் குறித்து பிபிசி எழுப்பிய கேள்விக்கு , வெள்ளை மாளிகை ஊடகச் செயலாளர் கரோலின் லீவிட் கூறுகையில், “இந்தப் பதிவை டிரம்ப் நிர்வாகத்தின் கொள்கையாக எடுத்துக்கொள்ள வேண்டும், இது நேரடியாக அவரிடமிருந்தே வந்துள்ளது. ட்ரூத் சோஷியலில் நீங்கள் இதைப் பார்க்கும்போது அது நேரடியாக அதிபர் டிரம்பிடமிருந்து வந்தது என்பதை நீங்கள் அறிவீர்கள், இந்த அதிபரின் வெளிப்படைத்தன்மை மற்றும் நிர்வாகத்தின் கொள்கைகளைத் தெரிவிப்பதில் உள்ள சிறப்பு இதுதான்” என்றார்.

ஆனால் செவ்வாயன்று, அமெரிக்க வெளியுறவுத்துறை சாகோஸ் தீவுகளை ஒப்படைக்கும் திட்டத்திற்கு தனது அதிகாரப்பூர்வ ஆதரவை வழங்கியது.

ஒரு அறிக்கையில், “சாகோஸ் தீவுக்கூட்டம் தொடர்பாக மொரிஷியஸுடனான தனது ஒப்பந்தத்தை தொடர பிரிட்டன் எடுத்துள்ள முடிவை அது ஆதரிக்கிறது” என்று கூறியுள்ளது.

டிரம்பின் சமீபத்திய கருத்துகள் பற்றி பிரிட்டனின் எதிர்க்கட்சியைச் சேர்ந்த நிழல் வெளியுறவு செயலாளர் டேம் பிரிதி படேல் அரசை விமர்சித்தார்.

“இறுதியாக ஸ்டாமர் விவேகத்துடன் செயல்பட்டு, தனது முடிவை மாற்றி, இந்த மோசமான ஒப்பந்தத்தை முற்றிலுமாக கைவிட வேண்டிய நேரம் இது” என்று அவர் கூறினார்.

லிபரல் டெமாக்ரட் தலைவர் சர் எட் டேவி , “சாகோஸ் தீவுகள் குறித்து மாறிக்கொண்டே இருக்கும் டிரம்பின் நிலைப்பாடு , ஸ்டாமரின் அணுகுமுறை ஏன் தோல்வியடையும் என்பதைக் காட்டுகிறது” என்று எக்ஸ் தளத்தில் பதிவிட்டுள்ளார்.

ரீஃபார்ம் யுகே தலைவர் நைஜல் ஃபரேஜ், “சாகோஸ் தீவுகளை விட்டுக்கொடுப்பதன் மூலம் கியர் ஸ்டாமர் நமது மிக முக்கியமான கூட்டாளியை அந்நியப்படுத்தும் அபாயத்தை ஏற்படுத்துகிறார், இது பிரிட்டிஷ் வரலாற்றிலேயே மிக மோசமான ஒப்பந்தம்” என்று எக்ஸ் தளத்தில் பதிவிட்டார்.

இந்த வார தொடக்கத்தில், ஒப்படைப்பு ஒப்பந்தத்தை எதிர்த்து வரும் நான்கு சாகோஸ் தீவுவாசிகள், அந்த ஒப்பந்தத்திற்கு எதிரான போராட்டத்தின் ஒரு பகுதியாக சாகோஸ் தீவுகளின் தொலைதூர பவளத்தீவில் இறங்கினர்.

பிரிட்டிஷ் கடல்சார் ரோந்துப் படையினரின் வெளியேற்ற எச்சரிக்கையின் பின்னரும், அவர்கள் அங்கிருந்து வெளியேற மறுத்துவிட்டனர்.

இந்தியப் பெருங்கடலில் அமைந்துள்ள சாகோஸ் தீவுகள், அதிகாரப்பூர்வமாக பிரிட்டிஷ் இந்தியப் பெருங்கடல் பகுதி என்று அழைக்கப்படுகின்றது.

பிரிட்டனுக்கு தென்கிழக்கே சுமார் 5,799 மைல் (9,332 கி.மீ) தொலைவிலும், மொரிஷியஸிற்கு வடகிழக்கே சுமார் 1,250 மைல் தொலைவிலும் அத்தீவுகள் அமைந்துள்ளன.

இந்தத் தீவுகள் 1814 முதல் பிரிட்டிஷ் கட்டுப்பாட்டில் உள்ளன.

1965 ஆம் ஆண்டில் 3 மில்லியன் பவுண்டுகளுக்கு பிரிட்டன் அரசாங்கத்தால் இவை வாங்கப்பட்டன, இது இந்தத் தீவுகளை ஒரு வெளிநாட்டுப் பிரதேசமாக நிறுவுவதற்கு வழிவகுத்தது.

ஆனால், சுதந்திரம் பெறுவதற்கான ஒப்பந்தத்தின் ஒரு பகுதியாக இந்தத் தீவுகளை விட்டுக்கொடுக்கும்படி தாங்கள் சட்டவிரோதமாக கட்டாயப்படுத்தப்பட்டதாக மொரிஷியஸ் நீண்டகாலமாக வாதிட்டு வருகிறது.

1960களின் பிற்பகுதியில், டியாகோ கார்சியாவில் ஒரு ராணுவ தளத்தை அமைக்க அமெரிக்காவிற்கு பிரிட்டன் அழைப்பு விடுத்தது,

இந்தச் செயல்பாட்டின் போது ஆயிரக்கணக்கான மக்கள் தங்கள் வீடுகளிலிருந்து வலுக்கட்டாயமாக வெளியேற்றப்பட்டனர். அந்த சாகோஸ் மக்களில் சிலர் மொரிஷியஸ் மற்றும் செஷெல்ஸில் குடியேறினர், மற்றவர்கள் பிரிட்டனில், குறிப்பாக மேற்கு சசெக்ஸில் உள்ள கிராலியில் குடியேறினர்.

– இது, பிபிசிக்காக கலெக்டிவ் நியூஸ்ரூம் வெளியீடு