மருந்துகளுக்கு மட்டும் பரஸ்பர விதிகளில் இருந்து விலக்கு அளிக்கப்பட்டிருப்பது நம்பிக்கைக்குரிய ஒன்றாகப் பார்க்கப்படுகிறது. அமெரிக்காவுக்கு தேவையான ஜெனரிக் மருந்துகளில் (Generic Medicines) பாதியை இந்தியா ஏற்றுமதி செய்கிறது. குறைந்த விலையுள்ள இந்த மருந்துகள் அங்குள்ள 90% மருந்து பரிந்துரைகளை நிவர்த்தி செய்கிறது.

இருப்பினும் மின்னணு சாதனங்கள், பொறியியல் சார்ந்த பொருட்கள், ஆட்டோமொபைல் உதிரிபாகங்கள், தொழிற்சாலை இயந்திரங்கள் மற்றும் கடல்சார் பொருட்கள் ஏற்றுமதியில் கடுமையான பாதிப்பு ஏற்படலாம் என்று நிபுணர்கள் கருதுகின்றனர்.

உள்ளூர் உற்பத்தியை ஊக்குவிக்க இந்தியாவில் உற்பத்தி சார்ந்த ஊக்கத்தொகை (production-linked incentives), போன்ற திட்டங்கள் கொண்டு வரப்பட்டன. அவற்றில் அதிக அளவில் முதலீடு செய்யப்பட்டிருப்பதால் மின்னணு சாதனங்கள் துறையில் கடுமையான இடையூறுகள் ஏற்படக் கூடும்.

“நம்முடைய ஏற்றுமதி திறன் குறித்து எனக்கு அச்சம் இருக்கிறது. ஏனெனில் உற்பத்தியாளர்களில் பெரும்பாலானோர் 27% இறக்குமதி வரி உயர்வைத் தாங்கிக்கொள்ள சிரமப்படும் சிறு குறு உற்பத்தியாளர்கள். இந்த வரி உயர்வு சந்தையில் அவர்கள் போட்டியிடுவதற்கான வாய்ப்பைக் குறைக்கும். அதிகப்படியான தளவாட விலை, அதிகரிக்கும் வர்த்தக செலவீனங்கள், மோசமடையும் வர்த்தக உள்கட்டுமானம் போன்றவை இந்த சவாலை அதிகரிக்கும். பெரிய பின்னடைவில் இருந்து நாம் தொடங்குகிறோம்,” என்கிறார் தார்.

டிரம்ப் இறக்குமதி வரியை வர்த்தகப் பேச்சுவார்த்தைகளில் இந்தியாவுக்கு எதிராகப் பயன்படுத்துவார் என்று பலரும் கருதுகின்றனர். அமெரிக்க வர்த்தகப் பிரதிநிதியின் சமீபத்திய அறிக்கை, இந்தியாவின் வர்த்தகக் கொள்கையால் அமெரிக்கா அதிருப்தி அடைந்திருப்பதைச் சுட்டிக்காட்டுகிறது.

திங்கள் கிழமையன்று வெளியிடப்பட்ட இந்த அறிக்கையில், பால், பன்றி இறைச்சி மற்றும் மீன் மீது இந்தியா விதித்துள்ள கடுமையான இறக்குமதி விதிகள் குறித்துக் குற்றம் சாட்டுகிறது. மரபணு மாற்றப்பட்ட பொருட்களுக்கு ஒப்புதல் வழங்க ஆகும் கால தாமதம், ஸ்டென்ட்கள் மற்றும் இம்ப்ளான்ட்களுக்கான உச்சவரம்புகளையும் விமர்சித்துள்ளது இந்த அறிக்கை.

காப்புரிமைகளுக்கு இருக்கும் குறைவான பாதுகாப்பு, போதுமான வர்த்தக ரகசிய சட்டங்கள் இல்லாமை போன்ற காரணங்களால் எழுந்துள்ள அறிவுசார் சொத்துரிமை தொடர்பான கவலைகள் இந்தியாவை ‘முதன்மையாகக் கண்காணிக்கப்பட வேண்டியவர்கள் பட்டியலில்’ சேர்த்துள்ளது என்பதையும் இந்த அறிக்கை சுட்டிக்காட்டுகிறது.

தரவுகளை உள்ளூர்மயமாக்குவதற்கான உத்தரவு, கட்டுப்படுத்தப்பட்ட செயற்கைக்கோள் கொள்கைகள் போன்ற அம்சங்கள் வர்த்தகத்தை மேலும் பாதிப்பதாகவும் அறிக்கையில் குறிப்பிடப்பட்டுள்ளது. நாளுக்கு நாள் இந்தியாவின் வர்த்தகத்திற்கான ஒழுங்குமுறை அணுகுமுறை சீனாவில் நடைமுறையில் இருக்கும் அணுகுமுறையைப் பிரதிபலிப்பதாகவும் அமெரிக்கா அச்சம் தெரிவித்துள்ளது.

இந்தத் தடைகள் நீக்கப்பட்டால், ஆண்டுதோறும் குறைந்தது 5.3 பில்லியன் டாலர் மதிப்பிலான ஏற்றுமதி அதிகரிக்கும் என்று வெள்ளை மாளிகை தெரிவித்துள்ளது.

“இந்த அறிவிப்பு இதைவிட மோசமான நேரத்தில் வந்திருக்க முடியாது. வர்த்தகப் பேச்சுவார்த்தைகளின் நடுவே நாம் இருக்கும்போது வந்துள்ள இந்த அறிவிப்பானது நமக்கு அதிகமாக பாதகத்தையே ஏற்படுத்துகிறது. இது வெறும் சந்தையைக் கைப்பற்றுவது தொடர்பானது மட்டுமல்ல. வியட்நாம் அல்லது சீனாவை பின்னுக்குத் தள்ளி ஒரு நல்ல இடத்தில் இந்தியாவை நிலை நிறுத்திக் கொள்வது ஒரே இரவில் நடந்துவிடாது. அதற்கான வாய்ப்புகள், அவர்களுடன் போட்டியிடுவதற்கான வலிமை இரண்டையும் உருவாக்க காலம் எடுக்கும்,” என்றும் தார் கூறினார்.

– இது, பிபிசிக்காக கலெக்டிவ் நியூஸ்ரூம் வெளியீடு.