கூடுதல் வரி விதிப்பில் இருந்து தற்போது இந்தியாவின் எலெக்ட்ரானிக்ஸ் மற்றும் மருந்துப் பொருட்களுக்கு விலக்கு அளிக்கப்பட்டுள்ளது.

ஆனால் “அதிக-உழைப்பைக் கொண்டு உற்பத்தி செய்து ஏற்றுமதி செய்யப்படும் ஆயத்த ஆடைகள், ரத்தினங்கள், மற்றும் நகைகள் ஆகியவற்றின் ஏற்றுமதிகளில் சரிவு ஏற்பட்டு இந்த வரிவிதிப்பின் தாக்கம் உணரப்படும்,” என்று சிங்கப்பூரை அடிப்படையாகக் கொண்ட ஆலோசனை நிறுவனமான ஆசியா டிகோடடில் பணியாற்றும் பிரியங்கா கிஷோர் கூறுகிறார்.

இந்திய ஜவுளித் தொழில் கூட்டமைப்பின் ராகேஷ் மெஹ்ரா, இந்த வரி விதிப்பு இந்திய ஆடை ஏற்றுமதியாளர்களுக்கு “மிகப்பெரிய பின்னடைவு,” என்று கூறுகிறார்.

மேலும் அமெரிக்க சந்தையில் போட்டியை பலவீனப்படுத்தும் என்றும் அவர் தெரிவிக்கிறார்.

தற்போது பதற்றம் அதிகரித்து வருகின்ற சூழலில், டிரம்பின் முடிவு அதிக பின்விளைவுகளைக் கொண்ட சூதாட்டம் என்று கூறுகின்றனர் நிபுணர்கள்.

ரஷ்யாவில் இருந்து கச்சா எண்ணெயை இந்தியா மட்டும் வாங்கவில்லை. சீனாவும், துருக்கியும் கூட அங்கிருந்து கச்சா எண்ணெய்யை இறக்குமதி செய்கின்றன. இருப்பினும், முக்கியமான கூட்டாளியாக அறியப்பட்ட இந்தியாவையே அமெரிக்கா இலக்காக மாற்றியுள்ளது.

ஆனால் மாறியது என்ன? விளைவு என்னவாக இருக்கும்?

இந்திய ரிசர்வ் வங்கியின் முன்னாள் ஆளுநர் உர்ஜித் படேல், இந்த அறிவிப்பின் மூலம் இந்தியாவின் “மோசமான அச்சம்,” உண்மையாகியுள்ளது என்று கூறுகிறார்.

“இந்த வரி விதிப்பானது குறுகிய காலத்திற்கானது. இந்த மாதம் வர்த்தக ஒப்பந்தம் தொடர்பான பேச்சுவார்த்தைகள் மேம்படும் என்று நம்பலாம். இல்லையெனில், ஒரு தேவையற்ற வர்த்தகப் போர் ஏற்படலாம். தற்போதைய ஆரம்ப கட்டத்தில் அதை அளவிடுவது கடினம்,” என்று உர்ஜித் படேல் லிங்கடின் பக்கத்தில் எழுதியுள்ளார்.

இந்த அறிவிப்பால் ஏற்படும் மோசமான தாக்கத்தின் காரணமாகவே சிலர் இந்த வரி விதிப்பானது நீடிக்கும் என்று எதிர்பார்க்கின்றனர். 27-ஆம் தேதி அன்று புதிய வரி அமலுக்கு வருகின்ற சூழலில், அடுத்த சுமார் 20 நாட்கள் இந்தியாவுக்கு மிகவும் முக்கியமானது. பதற்றத்தில் இருக்கும் சந்தைகள், இந்தியா இக்காலகட்டத்தில் எடுக்கும் நகர்வுகளை உன்னிப்பாக கவனிக்கும்.

முக்கியமான கேள்வி என்னவென்றால், இந்த அறிவிப்பைத் தொடர்ந்து, “ரஷ்யாவுடனான வர்த்தக உறவுக்கான அபராதத்தை,” தவிர்க்க நரேந்திர மோதி தலைமையிலான அரசு ரஷ்யாவுடனான வர்த்த உறவை கைவிடுமா அல்லது அமெரிக்காவுக்கு எதிராக நிற்குமா என்பது தான்.

“ராணுவ உபரணங்களுக்காக ரஷ்யாவை சார்ந்திருப்பதை குறைப்பதற்கும், எண்ணெய் இறக்குமதியை பன்முகப்படுத்துவதற்கும் தேவையான நடவடிக்கைகளை இந்தியா மேற்கொண்டு வருகிறது. இது டிரம்ப் நிர்வாகம் தரும் அழுத்தங்களுக்கு முன்னதாகவே ஆரம்பிக்கப்பட்டுவிட்டது. எனவே இந்தியா, தற்போது செயல்பாட்டில் இருக்கும் வெளியுறவுக் கொள்கை விவகாரங்களில் சில சமரசங்களை ஏற்படுத்த இயலும்,” என்று சத்தம் ஹவுஸின் முனைவர் செய்டிஜ் பாஜ்பாய் தெரிவிக்கிறார்.

மேற்கொண்டு பேசிய அவர், இந்த உறவு “கட்டுப்படுத்தப்பட்ட சரிவில்” இருப்பதாகவும், ஆனால் ரஷ்யா வருங்காலத்திலும் இந்தியாவிற்கு ஒரு முக்கிய கூட்டாளியாக தொடரும் என்றார்.

இருப்பினும், டிரம்பின் இந்த சமீபத்திய நடவடிக்கைகள், இந்தியா தன்னுடைய உத்தி ரீதியிலான உறவுகள் குறித்து மறுபரிசீலனை செய்ய வாய்ப்புகளை வழங்கியுள்ளதாக சில நிபுணர்கள் நம்புகின்றனர்.