கடந்த செவ்வாய்கிழமையன்று அமெரிக்க அதிகாரிகள் குழு யுக்ரேனிய பிரதிநிதிகளைச் சந்தித்தபோது, நிலம், கடல், வான் எல்லைகளில் “உடனடி” 30 நாள் போர் நிறுத்தத்திற்கான தங்களது முன்மொழிவை ஏற்றுக் கொள்ளுமாறு யுக்ரேனிய அரசைச் சம்மதிக்க வைத்தது.

அமெரிக்க அதிபர் டிரம்ப், ரஷ்ய அதிபர் புதினின் தொலைபேசி உரையாடல் முடிவடைந்த சிறிது நேரத்திலேயே, செவ்வாய்க் கிழமையன்று அதிகாரப்பூர்வ பயணமாக ஃபின்லாந்தின் ஹெல்சின்கிக்கு வந்த யுக்ரேன் அதிபர் வொலோதிமிர் ஸெலென்ஸ்கி, எரிசக்தி உள்கட்டமைப்பை உள்ளடக்கிய ஒரு போர்நிறுத்த யோசனையை யுக்ரேன் வரவேற்பதாகத் தெரிவித்தார். ஆனால், அதற்கான கூடுதல் விவரங்களை முதலில் அறிய விரும்புவதாகவும் கூறினார்.

ரஷ்யாவின் டிரோன் தாக்குதல்களைத் தொடர்ந்து புதின் போர் நிறுத்தத்தை நிராகரித்ததை யுக்ரேன் அதிபர் ஸெலென்ஸ்கி குற்றம் சாட்டினார். அவர்கள் தாக்குதல் நடத்திய இடங்களில் சுமியில் உள்ள ஒரு மருத்துவமனையும், ஸ்லோவியன்ஸ்கில் உள்ள மின் விநியோக நிலையங்களும் அடங்கும் என்று ஸெலென்ஸ்கி கூறினார்.

“துரதிர்ஷ்டவசமாக, இந்தத் தாக்குதல்களில் சில பொது உட்கட்டமைப்புகள் மீது நடந்துள்ளன,” என்றும், “இன்று, புதின் முழுமையான போர்நிறுத்தத்திற்கான திட்டத்தை நிராகரித்துள்ளார்” என்றும் ஸெலென்ஸ்கி தனது எக்ஸ் பக்கத்தில் பதிவிட்டார்.

மறுபுறம், ரஷ்ய தலைவருடனான தனது உரையாடல் “மிகவும் சிறப்பாக, பயனுள்ளதாக இருந்ததாக” அதிபர் டிரம்ப் சமூக ஊடகங்களில் முன்பு பதிவிட்டிருந்தார். இந்த உரையாடலில் அமைதிக்கான ஒப்பந்தத்தின் பல கூறுகள் விவாதிக்கப்பட்டதாகவும் அவர் குறிப்பிட்டிருந்தார்.

“முழுமையான போர் நிறுத்தத்தைக் கொண்டு வரவும், இறுதியில் ரஷ்யாவுக்கும் யுக்ரேனுக்கும் இடையிலான இந்தக் கடுமையான போரை முடிவுக்குக் கொண்டு வருவதில் விரைவாகச் செயல்பட வேண்டும் என்ற நிபந்தனையின் அடிப்படையில், தற்போது அனைத்து எரிசக்தி நிலையங்கள் மற்றும் உட்கட்டமைப்புகள் மீதான உடனடி போர் நிறுத்தத்திற்கு நாங்கள் ஒப்புக்கொண்டோம்” என்று அமெரிக்க அதிபர் டிரம்ப் ட்ரூத் சோசியல் தளத்தில் பதிவிட்டுள்ளார்.

யுக்ரேனின் எரிசக்தி உட்கட்டமைப்பில் சுமார் 80 சதவீதம் ரஷ்ய குண்டுகளால் அழிக்கப்பட்டுவிட்டதாக கடந்த செப்டம்பர் மாதம் ஸெலென்ஸ்கி கூறியிருந்தார். அதற்குப் பதிலடியாக, ரஷ்ய எல்லைக்குள் உள்ள எண்ணெய் மற்றும் எரிவாயு தளங்கள் மீது டிரோன் மற்றும் ஏவுகணைத் தாக்குதல்களை யுக்ரேன் நடத்தியது.

எரிசக்தி உள்கட்டமைப்பு மீதான தாக்குதலை நிறுத்த புதின் ஒப்புக்கொண்ட சில மணிநேரங்களுக்குப் பிறகு, ரஷ்யாவும் யுக்ரேனும் வான்வழித் தாக்குதல்களை நடத்தியதாக இரு நாடுகளும் மாறி மாறி குற்றம் சாட்டிக்கொண்டன.

டிரம்ப், புதின் இடையிலான தொலைபேசி அழைப்புக்குப் பிறகு சில மணிநேரங்களில் ரஷ்யா யுக்ரேனுக்கு எதிராக 40க்கும் மேற்பட்ட டிரோன்களை ஏவியதாக ஸெலென்ஸ்கி கூறினார்.

இதற்கிடையில், தெற்கு ரஷ்ய பிராந்தியமான கிராஸ்னோடரில் உள்ள அதிகாரிகள், யுக்ரேனிய டிரோன் தாக்குதல் எண்ணெய்க் கிடங்கில் ஒரு சிறிய தீயை ஏற்படுத்தியதாகத் தெரிவித்தனர்.

கடந்த வாரம் ஜெட்டாவில் நடந்த பேச்சுவார்தையைத் தொடர்ந்து, யுக்ரேனியர்கள் அமெரிக்காவின் முழுமையான போர்நிறுத்த முன்மொழிவை ஏற்றுக்கொண்ட பிறகு, தற்போது “முடிவு” ரஷ்யாவின் கையில் உள்ளதாக வெளியுறவுத்துறை செயலாளர் மார்கோ ரூபியோ கூறியிருந்தார்.

ஆனால் டிரம்புக்கும் புதினுக்கும் இடையே நேற்று நடைபெற்ற தொலைபேசி உரையாடலைத் தொடர்ந்து வெளியான வெள்ளை மாளிகையின் அறிக்கை, யுக்ரேன் உடனான அந்த ஒப்பந்தத்தைப் பற்றி எதுவும் குறிப்பிடவில்லை.