டிரம்புடன் பேசியிருந்த ஸெலன்ஸ்கி, அந்த உரையாடல் பல்வேறு பிரச்னைகள் குறித்த “நல்ல மற்றும் விரிவான கலந்துரையாடல்” என்று கூறினார். மேலும், யுக்ரேனுக்கு வருகை தந்துள்ள அமெரிக்க கருவூல செயலாளர் ஸ்காட் பெசென்ட்டையும் சந்தித்ததாக தெரிவித்தார்.

“யுக்ரேனைவிட வேறு யாரும் அமைதியை அதிகம் விரும்பவில்லை. அமெரிக்காவுடன் இணைந்து, ரஷ்ய ஆக்கிரமிப்பை நிறுத்துவதற்கும், நீடித்த, நம்பகமான அமைதியை உறுதி செய்வதற்கும் எங்கள் அடுத்த நடவடிக்கைகளை நாங்கள் வகுத்து வருகிறோம்” என்று ஸெலன்ஸ்கி பதிவிட்டார்.

“மேலும் தொடர்பைப் பேணவும், வரவிருக்கும் சந்திப்புகளைத் திட்டமிடவும் நாங்கள் ஒப்புக்கொண்டோம்.” என்றார்.

அமெரிக்கா மற்றும் யுக்ரேன் தலைவர்களுக்கு இடையிலான தொலைபேசி அழைப்பு ஒரு மணிநேரம் நீடித்ததாக ஏ.எஃப்.பி செய்தி முகமை தெரிவித்துள்ளது.

செவ்வாய்கிழமை வெளியிடப்பட்ட தி கார்டியன் நாளிதழுக்கு அளித்த பேட்டியில், அமைதி ஒப்பந்தத்தின் ஒரு பகுதியாக இரு நாடுகளும் தங்கள் கட்டுப்பாட்டில் உள்ள மற்ற நாட்டு பகுதிகளை விடுவிக்கலாம் என்று ஸெலன்ஸ்கி தெரிவித்திருந்தார். ரஷ்யாவின் மேற்கு குர்ஸ்க் பிராந்தியத்தில் யுக்ரேன் கட்டுப்பாட்டில் உள்ள பகுதியை, யுக்ரேனில் ரஷ்யா கட்டுப்பாட்டில் உள்ள பகுதிகளுக்கு மாற்றாக பெற்றுக்கொள்ளலாம் என்று அவர் பரிந்துரைத்தார்.

“இது சாத்தியமற்றது,” என்று புதினின் செய்தித் தொடர்பாளர் பெஸ்கோவ் தெரிவித்துள்ளார்.

“ரஷ்யா அதன் பிராந்திய பரிமாற்றம் குறித்து ஒருபோதும் விவாதித்ததில்லை, விவாதிக்காது. யுக்ரேனிய படைப்பிரிவுகள் இந்த பிராந்தியத்திலிருந்து வெளியேற்றப்படும். அழிக்கப்படாதவர்கள் அனைவரும் வெளியேற்றப்படுவார்கள்.” என்றார்.

தனது நாட்டுக்கான எந்தவொரு பாதுகாப்பு குறித்த நடவடிக்கையிலும் ஐரோப்பிய நாடுகள் மட்டுமல்ல, அமெரிக்காவும் ஒரு பகுதியாக இருக்க வேண்டும் என்றும் ஸெலன்ஸ்கி வலியுறுத்தி வருகிறார்.

“அமெரிக்கா இல்லாத பாதுகாப்பு உத்தரவாதங்கள் உண்மையான பாதுகாப்பு உத்தரவாதங்கள் அல்ல,” என்று அவர் கூறினார்.