இந்திய ஏற்றுமதி அமைப்புகளின் கூட்டமைப்பு (FIEO) இந்த முடிவு மிகவும் அதிர்ச்சியளிப்பதாக கூறியுள்ளது. வரி விதிக்கும் முடிவு இந்தியாவிலிருந்து அமெரிக்காவுக்கு செய்யப்படும் பாதிக்கும் மேற்பட்ட ஏற்றுமதிகள் மீது தாக்கத்தை ஏற்படுத்தும் என அந்த அமைப்பு நம்புகிறது.

டெல்லியைச் சேர்ந்த ‘குளோபல் டிரேட் ரிசர்ச் இனிஷியேட்டிவ்’ (GTRI) என்ற சிந்தனைக் குழு, அமெரிக்காவிற்கு இந்தியாவின் ஏற்றுமதி 40 முதல் 50 சதவீதம் வரை குறையலாம் என்று மதிப்பிடுகிறது.

GTRI-யின் நிறுவனர் அஜய் ஸ்ரீவாஸ்தவா, பொறுமையை கடைபிடிப்பது அவசியம் என அறிவுறுத்துகிறார். “இந்தியா அமைதியாக இருக்க வேண்டும். அச்சுறுத்தல் அல்லது நம்பிக்கையின்மை நிலவும் சூழலில் பயனுள்ள பேச்சுவார்த்தைகள் நடைபெற முடியாது என்பதை புரிந்துகொள்ளவேண்டும்,” என்று அவர் கூறுகிறார்.

சில ஆய்வாளர்கள், டிரம்பின் கோபத்திற்கு ரஷ்யாவிடமிருந்து எண்ணெய் வாங்குவதை இந்தியா நிறுத்தாதது மட்டுமல்ல, யுக்ரேனில் போர் நிறுத்தத்தை ஏற்படுத்த முடியாததும் காரணம் என்று கருதுகின்றனர்.

தேர்தலுக்கு முன்பு, 24 மணி நேரத்தில் ரஷ்யா- யுக்ரேன் போரை நிறுத்துவேன் என்று டிரம்ப் பெருமையாகக் கூறியிருந்தார். ஆனால், அவர் பதவியேற்று ஏழு மாதங்கள் ஆகியும் இது சாத்தியமாகவில்லை.

இந்தச் சூழலில், இந்தியா ஒரு எளிதான இலக்காக மாறிவிட்டதா?

சில நிபுணர்கள் டிரம்பின் கொள்கையில் ஆழமான உத்தி குழப்பம் இருப்பதை பார்க்கின்றனர். பெய்ஜிங்கை சேர்ந்த அரசியல் அறிவியல் பேராசிரியர் ஹுவாங் ஹுவா இந்த வரிவிதிப்பு தாக்குதல் தொலைநோக்கு இல்லாதது என நம்புகிறார்.

“இந்தியா இழப்புகளை சந்திக்கும். ஆனால் டிரம்பின் வெளிநாட்டு கொள்கை இந்தியாவைப் பொறுத்தவரை தவறான பாதையில் செல்வதால் அமெரிக்கா அதைவிட அதிக இழப்புகளை சந்திக்கும் என நான் நம்புகிறேன்,” என்கிறார் ஹுவாங்.

இது இந்தியாவை சீனாவுக்கு நெருக்கமாக கொண்டுவரக்கூடும் எனவும் அவர் நினைக்கிறார். எதிர்காலத்தில் அமெரிக்காவின் அழுத்தத்தை சமாளிக்க இந்தியாவும், சீனாவும் ஒன்றாக நிற்கும் என ஹூவாங் கருதுகிறார்.

ஷாங்காய் ஒத்துழைப்பு அமைப்பு (SCO) உச்சிமாநாட்டில் பங்கேற்க பிரதமர் நரேந்திர மோதி சீனாவுக்கு செல்லக்கூடும் என்பது குறிப்பிடத்தக்கது.

தற்போதைய சூழலில், மோதி ஷி ஜின்பிங்குடன் மேடையை பகிர்ந்துகொண்டாலே, அது இந்தியாவை அழுத்தத்தால் அடிபணிய வைக்கமுடியாது என்ற செய்தியை அளிக்கும்.

டிரம்பின் இரண்டாவது பதவிக்காலத்தில் இந்தியாவுக்கு சிவப்பு கம்பளம் விரிக்கப்படாது என தோன்றுகிறது. பிரேசிலுக்கு பிறகு இப்போது இந்தியாவுக்கும் 50 விழுக்காடு மொத்த வரி விதிக்கப்பட்டுள்ளது.

இந்தியா தொடர்ந்து ரஷ்ய எண்ணெயை இறக்குமதி செய்வதுதான் இதற்கு காரணம் என வெள்ளை மாளிகை தெரிவித்துள்ளது.

இந்தியா தொடர்ந்து ரஷ்ய எண்ணெயை இறக்குமதி செய்வது ரஷ்யாவை தனிமைப்படுத்தும் அமெரிக்காவின் முயற்சியை பலவீனப்படுத்துவதாக டிரம்ப் சொல்கிறார்.

இந்த அறிவிப்புக்கு இந்தியா மிதமான பதிலையே அளித்துள்ளது. இந்தியாவின் வெளியுறவு அமைச்சகம் இந்த முடிவு ‘பொருத்தமற்றது மற்றும் ஆதாரமற்றது.’ என விமர்சித்துள்ளது.

இந்தியா அதன் தேசிய நலன்களை பாதுகாக்க அனைத்து நடவடிக்கைகளையும் எடுக்கும் என அந்த அறிக்கை வலியுறுத்தியது.

டிரம்பின் இரண்டாம் பதவிக்காலத்தில் அமெரிக்காவின் ராஜதந்திர அணுகுமுறை மாறியிருப்பதை புரிந்துகொள்வதும் அவசியம். இம்முறை டிரம்ப் தனது ராஜதந்திரத்தை வர்த்தகத்தை நோக்கி திருப்பியுள்ளார்.

முன்னாள் இந்திய தூதரக அதிகாரி ஷரத் சபர்வால், “கடந்த காலத்தில் பல நாடுகளை பற்றி அதிபர் டிரம்ப் அவசர முடிவு எடுத்துவிட்டு பின்னர் மாற்றியிருக்கிறார். பலமுறை பேச்சுவார்த்தையில் அழுத்தத்தை ஏற்படுத்துவதற்கு மட்டுமே அவரது அறிவிப்புகள் செய்யப்பட்டிருக்கின்றன.” என்கிறார்

இந்த வரிவிதிப்பு கொள்கை அமெரிக்காவுக்கு பாதகமாக அமையும் என பேராசிரியர் ஹுவாங் ஹுவா நம்புகிறார்.

டிரம்பிடமிருந்து வரும் இதுபோன்ற அழுத்தத்தை சமாளிக்க இந்தியா சீனா இடையே மேலும் வலுவான உறவுகள் ஏற்படவேண்டும் என்கிறார் அவர்.

இந்த விஷயத்தில் பிரதமர் மோதி சீனாவுக்கு மேற்கொள்ள சாத்தியமுள்ள பயணம் மிக முக்கியமானதாக அமையக்கூடும்.