தொடர்ச்சியான தவறான நடவடிக்கைகள், பெருமை பேசுதல், புவிசார் அரசியல் மற்றும் உள்நாட்டு அரசியல் அழுத்தம் ஆகியவை பேச்சுவார்த்தைகளை முறித்ததாகத் தெரிகிறது.

டிரம்பின் வசைமொழிகளுக்கு இந்தியா இதுவரை பதிலளிப்பதில் கட்டுப்பாடுகளுடன் இருந்து வந்துள்ளது. ஏனெனில் இறுதியில் இப்படியான ராஜதந்திரம் ஒரு வர்த்தக ஒப்பந்தத்தைப் பாதுகாக்க உதவும் என்று இந்தியா நம்புகிறது. ஆனால் டிரம்பின் நிர்வாகத்தில், எந்த உத்தரவாதமும் கிடையாது.

தொடக்கூடாத புள்ளிகளாக இந்தியா கருதும் பல விசயங்களில் டிரம்ப் கருத்து கூறி வந்துள்ளார். அதில் மிக முக்கியமானது இந்தியாவையும் அதன் எதிரி நாடான பாகிஸ்தானையும் ஒரே அளவுகோலில் வைத்து டிரம்ப் பேசியது.

இந்தியாவுக்கும் பாகிஸ்தானுக்கும் இடையில் ஒரு கசப்பான மோதல் நடைபெற்ற சில வாரங்களிலேயே பாகிஸ்தான் ராணுவ தலைவர் அசீம் முனீரை வெள்ளை மாளிகைக்கு அழைத்து விருந்தளித்தார் டிரம்ப்.

பிறகு பாகிஸ்தானுடன் வர்த்தக ஒப்பந்தம் கையெழுத்திட்டார். அதில் பாகிஸ்தானுக்கு சாதகமான வகையில் 19% வரிகள் மட்டுமே விதிக்கப்பட்டன. மேலும் பாகிஸ்தானின் எண்ணெய் வளங்களை மேம்படுத்தும் வகையிலும் ஒப்பந்தம் மேற்கொள்ளப்பட்டது. ஒரு நாள் பாகிஸ்தான் இந்தியாவுக்கு எண்ணெய் விற்கக்கூடும் என்று சொல்லும் அளவுக்கு டிரம்ப் சென்றார்.

இந்தியாவுக்கு எரிச்சல் தரும் மற்றொரு விசயம், இந்தியா பாகிஸ்தான் இடையில் தானே சண்டை நிறுத்தத்தை கொண்டுவந்ததாக டிரம்ப் மீண்டும் மீண்டும் கூறிக்கொள்வது.

காஷ்மீர் குறித்து பாகிஸ்தானுடனான தனது மோதலை இந்தியா எப்போதும் தனது பிரச்னையாகவே பார்க்கிறது. இதில் மூன்றாம் தரப்பு மத்தியஸ்தத்தை இந்தியா எப்போதும் எதிர்த்துள்ளது.

பெரும்பாலான உலகத் தலைவர்கள் இந்த விவகாரத்தில் இந்தியாவின் நிலைபாட்டை புரிந்துக் கொண்டவர்களாகவே இருந்துள்ளனர். முதல் முறை அதிபராக இருந்த போது டிரம்பும் அப்படிதான் இருந்தார். ஆனால் இனியும் அப்படி இல்லை.

“எந்த நாடும் மத்தியஸ்தம் செய்யவில்லை” என்று மோதி நாடாளுமன்றத்தில் கூறிய பிறகும், டிரம்ப் தனது கூற்றை தொடர்ந்து வலியுறுத்தி வருகிறார்.

மோதி டிரம்ப் அல்லது அமெரிக்கா என்று குறிப்பிடவில்லை, ஆனால் வெள்ளை மாளிகைக்கு தலைவணங்கக் கூடாது என்று அவர் மீது உள்நாட்டு அரசியல் அழுத்தம் அதிகரித்துக் கொண்டிருக்கிறது.

“இந்தியா-பாகிஸ்தான் மோதலுக்கு பின்பு அமெரிக்காவின் உயரிய மட்டத்தில் பாகிஸ்தானுடன் உறவுக் கொண்டிருக்கும் நேரத்தில் இவை எல்லாம் நடப்பது இந்திய அரசுக்கும், மக்களுக்கும் மிகவும் எரிச்சலூட்டுவதாக இருக்கும். அமெரிக்காவை ஒரு நம்பத்தகுந்த கூட்டளியாக கருத முடியாது என்று இந்தியாவில் சிலர் கூறி வரும் கருத்தை மேலும் கூர்மையாக்குவதாகவே இந்த நிகழ்வுகள் அமையும்” என்று தெற்கு ஆசிய நிபுணர் மைக்கேல் குகல்மேன் கூறுகிறார்.

இந்தியாவுக்கு இருக்கும் கோபம் சில, “பனிப்போர் காலத்திலிருந்து” வருவதாக இருக்கலாம் என்றும் ஆனால் இந்த முறை அவை சமீபத்திய நிகழ்வுகள் மூலம் தீவிரமடைந்துள்ளன என்றும் அவர் கூறுகிறார்.

தேசியவாத விவகாரங்களை வைத்தே மோதி அரசு நடைபெறுகிறது, எனவே இந்த விவகாரத்தில் அமெரிக்காவுக்கு எதிரான வலுவான எதிர்வினையை அரசிடமிருந்து அதன் ஆதரவாளர்கள் எதிர்ப்பார்ப்பார்கள்.

இது ஒரு இக்கட்டான சூழல், இந்தியாவுக்கு அமெரிக்காவுடன் ஒரு வர்த்தக ஒப்பந்தம் வேண்டும். அதே நேரம் டிரம்பின் அழுத்தத்துக்கு படிந்து போனதாகவும் இருக்கக் கூடாது.

இந்தியா தான் கொண்டிருந்த கட்டுப்பாடுகளை மெதுவாக தளர்த்தி வருவதாக தெரிகிறது.

ரஷ்யாவிடமிருந்து எண்ணெய் வாங்குவது குறித்து அமெரிக்காவின் கோபத்துக்கு பதில் அளித்த இந்தியா தனது “தேசிய நலனையும் பொருளாதார பாதுகாப்பையும்” உறுதி செய்ய “அனைத்து முயற்சிகளையும்” எடுக்க உறுதி பூண்டுள்ளது என கூறுகிறது.

ஆனால் கேள்வி என்னவென்றால், இந்தியாவின் விருந்தோம்பலை விரும்பிய டிரம்ப், இந்தியாவை நல்ல நாடு என்று முன்பு கூறிய டிரம்ப், தனது நம்பதகுந்த கூட்டாளிக்கு எதிராக ஏன் வசைப்பாட தொடங்கினார்.

சில நிபுணர்கள், அமெரிக்காவுக்கு சாதகமான வர்த்தக ஒப்பந்தத்தை மேற்கொள்வதற்கான உத்தியாக இந்தியா மீது திணிக்கப்படும் அழுத்தத்தை பார்க்கின்றனர்.

“டிரம்ப் ஒரு ரியல் எஸ்டேட் அதிபர், பேச்சுவார்த்தைகளில் கடுமையானவர். அவரது பாணி ராஜதந்திர ரீதியில் இல்லாமல் இருக்கலாம். ஆனால் ராஜதந்திரத்தின் மூலம் என்ன விளைவுகள் கிடைக்குமோ, அதைதான் அவர் எதிர்ப்பார்க்கிறார். எனவே அவரது நடவடிக்கைகளை பேச்சுவார்த்தை உத்தியின் ஒரு பகுதியாகவே நான் பார்க்கிறேன்” என்று இந்திய முன்னாள் தூதரும் தற்போது ஒபி ஜிண்டால் குலோபல் பல்கலைகழக பேராசிரியருமான ஜிதேந்திர நாத் மிஸ்ரா கூறுகிறார்.

இந்தியா அமெரிக்காவுக்கு பல சலுகைகள் கொடுத்ததாக இந்திய அரசில் உள்ள ஒருவர் கூறினார்.

தொழிற்சாலை சார்ந்த சரக்குகளுக்கு வரி விலக்கு, கார் மற்றும் மதுவுக்கு படிப்படியாக வரி குறைப்பு, ஈலோன் மஸ்கின் ஸ்டார் லிங்க் இந்தியாவில் தனது நடவடிக்கைகளை தொடங்க ஒப்பந்தம் ஆகியவற்றை இந்தியா வழங்கியது என்றார்.

ஆனால் இந்தியாவுடன் வர்த்தகத்தில் உள்ள 45பில்லியன் டாலர் பற்றாக்குறையை குறைக்க இந்தியாவின் விவசாய மற்றும் பால் துறைகளில் நுழைய விரும்பியது.

ஆனால் இந்த துறைகள் மோதிக்கு தொடக் கூடாத சிவப்பு புள்ளிகளாகும்.மோதி மட்டுமல்ல எந்த இந்திய பிரதமருக்கும் இது பொருந்தும்.

இந்தியாவில் விவசாயம் மற்றும் அதை சார்ந்த துறைகள் 45% வேலைவாய்ப்புக்கு காரணமானவை. அடுத்தடுத்த வந்த அரசுகள் விவசாயிகளை மிக தீவிரமாக பாதுகாத்துள்ளன.

அமெரிக்காவின் நிபந்தனைகளுக்கு ஒப்புக்கொள்வது இந்தியாவுக்கு சாத்தியமில்லை என்கிறார் குகல்மேன்.

“முதலில் மக்களின் கோபத்தை தணிக்க வேண்டும், அழுத்தத்துக்கு பணிய மாட்டோம் என்று தெளிவுப்படுத்த வேண்டும். இவை உள்நாட்டு அரசியல் காரணங்களுக்கு முக்கியமானதாகும்” என்கிறார் அவர்.

ரஷ்ய அதிபர் புதினுடன் டிரம்புக்கு அதிகரித்து வரும் கோபம் காரணமாகவே இந்தியா ரஷ்யாவிடமிருந்து எண்ணெய் இறக்குமதியை நிறுத்த வேண்டும் என்று டிரம்ப் வலியுறுத்துவதாக அவர் கருதுகிறார்.

“ரஷ்யாவுடன் வணிகம் செய்ததற்காக அபராதம் விதிப்பதன் மூலம் ரஷ்யாவை அதன் மிக முக்கியமான எண்ணெய் வாங்குபவர்களிடமிருந்து துண்டிக்க முயற்சித்து, டிரம்ப் தொடர்ந்து தனது அழுத்த தந்திரோபாயங்களை முடுக்கி விடுவதை பார்க்கிறோம்,” என்று அவர் கூறுகிறார்.

ஆனால் இந்தியா ஒரே நாளில் ரஷ்யாவிடமிருந்து எண்ணெய் வாங்குவதை நிறுத்திவிட முடியாது.